NUNDAN KAN ZIR PEI (IV)

NUNDAN KAN ZIR PEI (IV)

Kaihruai awknak thuah hruaitu le hruaimi in zir veve ding tampi a um. Hruaimi in hruaitu ih hruainak hmunah thlundan zir kan tul. Hruaitu khal in hruaimi pawlih thluh theihding hmun ah hruai thiam a tul ve. Zozo khal caan khatah hruaitu kan siih caan khatah hruaimi kan si theh. Hruaitu cun hruaitu a sinak kha a hnatuan a siih hruaimi khalin thluntu a sinak kha a tuanvo a sive. Curuangah hruaitu in fimthiamnak, tumtahnak, theihkau- nak, thu rel thiamnak, thu then thiamnak, thinsaunak, thinlung ralthatnak, thungainak, tuar theinak, zangfah thiamnak, khuaruah thiamnak, suup theinak, le thangzang pek thiamnak pawl a neih a tul.Hruaimi khal in thungainak, thathonak, thinsaunak, theihthiamnak, thluntu tha sinak, lungrualnak le rintlak sinak pawl neih a tul ve. Hruaitu tha in dungthluntu thalo a hruai tikah le dungthluntu tha in hruaitu thalo a thlun tikah lawhtlinnak a um a um thei lo.

Hruaitu le hruaimi it theih a tulmi cu, hruaitu khal hruaitu a si ringring thei loih hruaimi khal dungthluntu a si kumkhua ding ti a theih lo. Curuangah hruaitu in ralrin a tha. Hruaimi kha ziangsiar loin a hruai a si ahcun

nikhat ni ah hruaimi kha hruaitu sang a cang sal tikah remlonak a suak thei. Cuvekin hruaimi khalin hruaitu thungai loin ziang a siarlo ahcun nikhat ni ah hruaitu a cansal tikah mipi in a thu a ngai ve lo ding. Hruaitu in hruaiawkdan a thiam dingzat a thiam hlanlo zir rero sehla hruaimi pawl in hruaitu ih tlin lonak, famkim lonak cu theihthiam sak a tul ve.

Leitlun ahhin hruaitu tin le hruaimi tin mi hleice kan umlo. Mi tampi in hnatuan ah zoahaw loin mimal nunnak ah kan zohaw ruangah hruaitu in hruaimi mawh a puhih hruaimi khal in hruaitu mawh an puh theu. Hih thuhnih hi hruaitu le hruaimi kaklak ih harsatnak tumbik le remlonak suah tertu hrampi a si. Tuanvo le hmunhma thawn a perhpar awmi asi ruangah kan tuanvo le ka umhmun, kan dinhmun in thu a nei bik. Curuangah thuneihnak sangbik cu Pathian ta a siih, leitlun boruak thuneihnak sungah a hruaiaw mi fang kan si. Curuangah hruaiawknak thu ah Pathian le boruak tlun ah zohman in thu a nei lo. Hruaitu le hruaimi karlakih thu umdan thei thiam lo ruangih mawh puhawknak, soisel awknak pawlhi a hmu thiam lotu hrangah a si.

Nundan zir ka tulmi lakah hruaitu sinak le hruaimi sinak karlak ih pehzomnak thuhla hi zir lo a tha lo. A zir paih lotu cun hruaitu le dungthluntu sinak a thei thiam lo ding. Mi a hruai thiam lo dingih, mi dung a thlun thiam fawn lo ding. Mi a hruai ah siseh, mi dung a thlun ah siseh harsatnak le phunzai ding a tong ringring. Cun, pawlkom sungah buainak tiang a suah pi thei. Hruaitu le dungthluntu sinak cu mi lian, mi hausa, mi farah, mi dam le dam lo tin thleidannak a um lo. Nu le pa cun an fale kha an duhvek in hruaitheinak thu an nei nan an ngaingai ah an duhvekin an hruai thei lo. Fale khal in nu le pa ih duhnak thlun famkim theitu an umve lo. A caan ah fale pawl in nu le pa an hruai ih nu le pa khal in fale pawlih hruainak ah thlun an tul ve. Nu le pa an sinak in hruaitu sinak an nei kumkhua lo. Nu le pa tampi cu fale pawlih hruainak an ziang an siar lo ruangah innsungsang ah buainak tampi a um theu, nehhnu ih sirsalnak cu san a tlai nawn lo.

Milai kan zate lungkimnak hi hruaiawknak a thabik a siih, zapi lungkimnak tello ih hruaiawknak hmun ah buainak a tam ding. Cubangtuk hruaiawknak cu kaihruai awknak thabik a si thei lo. Curuangah hruaiawknak thu khal hi nitin kan nunnak ih buaipi mi thu tlangpi a siruangah cumi thuthawn pehpar in nundan kan thiam a tul. Nundan kan thiam theinak dingah hruaitu le hruaimi kan sinak karlak ih pehzomnak le thuhla pawl zir kan tul. 

Verse (4) 25 Jan 2011

Casiartu na parah ka lungawi!

Amoschin Bk