EMAIL-GMAIL HMANDAN THUPI (7)

EMAIL-GMAIL HMANDAN THUPI (7)
1. Cakuat Editsal, Thulhsal, Hlonsal le Kuatsallo Tuahnak (Undo Send) 

Na Gmail sungah na lut hnu ah vorhlam kap tlunlam ih Setting kha hmet awla, cule “Settings” timi kha hril aw. Cule General tab tanglam ah “Undo Send” timi na hmu ding. “Enable Undo Send” timi kha tick (or) click awla na duhzat seconds (5, 10, 20, or 30) hril ding a si. 

Thupitnak: Ca na kuat tikah send na hmet leveten a tlunlam ah yellow color ca “Undo link” na hmu dingih na ca kha edit sal, kuatsal lo, lole remsal na duhdan vekin na tuah thei. Mai’  hrilzat second sungah Undo hmet theinak caan a um ve.

2. Gmail Account Tampi Hmangdan (Use Multiple Gmail Accounts)

Browser (Chrome, Mozilla, Internet Explorer) pakhatkhat hmang in Gmail account pakhat hnak tam na hmang duhle account pakhat na “sign in” hnu ah na profile zuk umnak kha click aw. Cule

“My Account” timi tanglam ah “Add account” timi le “Sign out” na hmu ding. “Add account” kha hmet awla na duhmi account dang cu veikhat ah na hmang cih thei vivo ding.

Thupitnak: Veikhat in account pakhat hnak tam thawn Gmail hman na duh tikah sign out tuah ih a dang lutsal ttul lo in veikhat in na duhzat hman a theih. 

Mi tampi cun Gmail account pakhat hnak tam nei in hnattuan a phunphun ttuan a si ruangah hi khal hi a thupi ve ngaingai.

3. Messages Langter (or) Langterlo Labels Tuahdan (Drag Messages or Labels)

Inbox sungih a lutmi ca, messages zate langter duhlo ah siseh langter duh ah siseh labels tuah theih a si. Account Setting sungah lut in Labels timi tangah “Show” le “Hide” timi kha hril ding a si. Langter duhmi cu “Show” ret a siih Langter duhlo mi cu “Hide” click sak ding a si. 

4. Kapkhat Zohnak le Data Hmanmi Zohnak (Preview in a Pane)

Account Setting lut hnu ah “Labs” timi kha hmet ding a si. A tanglam ah “Preview Pane” timi kha “Enable” tuah ding a si. Cule Inbox page ah lutsal in vorhlam kap tlunlam Setting lutnak kiangah box met ding pakhat a lang ding. Cutawk ih ah “No Split”, “Vertical Split”, le “Horizontal Split” tin a lang ding. Vertical lole Horizontal pakhatkhat hmet tikah Account Date Space (15GB) sungin ziangzat hmang zo tile ziangzat a tanglai ti a lang. 

5. Account Hmin ah (.) Dots Betdan le Hmandan (Use Dots in Your Email Address)

Gmail ih danglamnak pakhat cu hman ciami account hmin pakhat ih cafang karlak tete ah (.) lole dots tete bet tikah a poilomi hi a si. Curuangah “@” hlan ih account hmin ah khan (.) tete bet in cakuat a theih.

Tahthimnak ah: account hmin cu pangparmawite@gmail.com  sibang sehla, pang.par.mawite@gmail.com, pang.par.mawi.te@gmail.com, p.a.n.g.p.a.r.m.a.w.i.t.e@gmail.com tivekin a phunphun ih a ngah thluh. “Sign in” luh tikah le cakuat tikah hman theih kop a si.

Thupitnak: Thungai ten sim duhlomi midang in gmail address diltikah le a cekci theihter duhlo mi hnen ah hman theih a si.

6. Sign In Zate Sign Out Tuahdan (Sign Out Remotely)

Gmail sign in lut phot ding a si. Cule vorhlam kap tanglambik ah “Details” timi kha click ding a si. Cule “Sign out all other web sessions” kha hmet ding a si. 

Thupitnak: Computer in siseh, Phone in siseh, Tablet in siseh hman rero laimi “sign in” cia gmail account pawl kha midang in a zoh theilo nak dingah hmunkhat ihsin azaten “sign out” theih a si.

7. A Thupimi pawl Hmaisabik ih Ret (Important First)

Mai’ pulpak cakuat mi pawl siseh, group ca pawl siseh hmaisabik ih ret le langter duh tikah hman ding a si. Culole inbox sungah mail lut thar zate date serial vekin a um thluh tikah mit a ti hnok thei zet. Important First kan tuah asile website dangdang ihsin a lutmi advertise tivek pawl le siar duh lemlomi group ca pawl cu a dang ten a tanglam ah an um ve mai ding. 

Tuahdan: Setting lut hnu ah Inbox timi menu tangah a um.

1. Inbox type: Important Fist ret ding.

2. Unread message in the first section kha tick sak ding.

3. Important Maker kha inbox sungih mark tuahnak hmun ah mai duhmi ca le group pawl kha mark tuah sak ding.

A siartu na parah ka lungawi!

-Amoschin Bk

29 August 2015