LUATNAK (FREEDOM)

LUATNAK (Freedom)

Leitlun ah ziangsi a thupibik tin thusuhnak,  um bang sehla a dangdang kan sim cio ding. Sisehla, damnak, lennak, fimnak, mawinak, paisa, tvp tampi simding a um. Cumi lakih kan hrelh thei lo ding mi pakhat cu luatnak (zalennak) a si. Dam lonak hi bulpak thu a siih mawinak tla a si thotho.  Lennak cu mipi le bulbak karlak ih thu a si. Cuvekin zalenak khal mipi le bulpak karlak thu a si ve.

Nauhak kan si laiah nu le pa hnen ihsin luatnak kan duh. Tleirawl kan si tikah hruaitu le zirhtu hnen ihsin luatnak kan hai. Mino kan vun si cun rualpi, biaknak, uknak karlak ah luatnak kan hawl. Mi pitling nu le pa cun biaknak le uknak daan sungah luatnak lam an tuah. Ukmi cun uktu thuneihnak hnuaiah, hruaimi cun hruaitu hnen ihsin luatnak kan hai. Cutin luatnak cu
mah le lamzin ciar ah mah’ ti thei dandan in hawlsuak a si ttheu. A ngaingai ahcun, luatnak famkim a congah taktaktu kan um lo. Ziangahtile leitlun ah luatnak taktak a um lo. Thuneihnak hnuai ih a tlangleng mi hlir kan si. 

Leitlun minung zate hrang luatnak phunkhat a um. Luatnak kan timi cu duhmi tuah theinak, ruah theinak, sim theinak, feh theinak tin a phunphun a um. Cuti asinan, duhduh vekih um theinak a si cuang lo. Luatnak cu dawnkhamtu um lo tinak silo in, dawnkham mi tla silo in, dawnkhamnak daan hnuaiih luatnak a si. Ziangahtile daan a um lonak hmunah luatnak a ttul ve lo, ih luatnak khal a um thei lo. Luatnak timi cu daan lengih luatnak silo in daan sungih luatnak khi a si.  Daan leng ahcun luat le luatlo ti a um nawn lo. Luatnak taktak cu daan sungah daan vekin dikzet ih hna ttuan theinak a si. 

Minung in daan tthattha tampi kan tuah nan, cuih daan pawl cu thlun loin midang parah thutthennak sawn  kan canter ttheu. Tongdang in sim sehla mai’ phuahcop daan hmang in mi parah thu kan rel ttheu. Cuvek cu mi dingfel pawlih nundan a si lo ding.  Ram tampi ih uknak kan zoh tikah daan vek silo in duhvek in miuk an tam ruangah luatnak duhah donak authawng leitlun ah a thang. 

Luatnak cu uktu hrang lawng a si thei loih ukmi hrang a sive. Uktu cu ukmi hnak in a mal sawn ringring. Curuangah ukmi pawlih duhbik mi cu daan sungih a dikmi luatnak a si. Cumi luatnak cu uktu in a duhduh in a kham ih thu a neih a si ahcun  mipi hrang hremnak phunkhat a si zo. Uktu cun mipi in ziang an duhti thei lo in mipi hrang thilttha tampi tuahsak hmansehla luatnak a pek lo ahcun an thin a dam cuang lo ding.  Uktu le ukmi cun daan lengih a tuahmi cu daan vekin cawhkuannak an tong ding. Curuangah uknak daan lawng hi thunei tubik a si.  Ukmi pawlih thin nat tertu, uktu in daan lengih a tuahmi kha daan tatnak ihsin a luat awter tikah a si. Sihmansehla ukmi cu daan vekin dantatnak a tuar. Hihi luatnak thuah buainak a siih zohman in cumi hrang daan an tuah lo.  

Farah ruangah, damlo ruangah, fimnak tlasam ruangah,  vansiat ton ruangah tiin a phunphun ruang ah luatnak co ngahlo milai kan mallo ding. Kan farah tikah mi hausa pawlih thuneihnak kan ngai a ttul. Kan damlo tikah midam pawlih thu kan awih a ttul. Fimnak kan nei mal tikah a fim deuh pawlih thu kan lung a ttul. Hihi luatnak lam an siih, a ttuldan vekin lungkim pi ding a ttha.  Mi farah cun milian pawlih kuthnuai ah a um ringring tinak a si lo. Milian pawlih thu a  ngainak ruangah milian ah a cangve ding sawn kha a zuam ding a si.  Mi damlo khal in midam pawl ih thu a ngainak ruangah midam ah a cangsal ding kha a ttulmi a si. Cuvekin midang thu kan ngainak sung ihsin luatnak lam kan hawlsuak ding le luatnak kan sersiam ding a thupi.  Ziangahtile luatnak cu ttuannak ih rah a si. Curuangah luatnak cu mi hmuahhmuah hrang ah a si. 

Mi zapi karlak ah luatnak a umih, mah bulpak luatnak tla a um. Mah bulpak luatnak cu mahte sersiam a ttul. Mipi hnen ihsin luatnak cu midang parah a tthum aw. Midang hnen ihsin kan duhzat luatnak kan ngah thei lo dingnan kan hawl ahcun kan hmu ding. Mahte luatnak cu kan duhzat kanmah le kanmah kan pekawk ding khi a si. Mi zokhal, midang ih thuneihnak hnuaiih a nungmi kan si ruangah leitlun ah midang thawn luatnak famkim a um thei lo. Pasal khal a nupi ih thu a ngai, nupi khal in a pasal ih thu a ngai, cun fale pawlin nu le pa ih thu an ngai ve. Asinan pasal in siseh, nupi in siseh, fale khalin siseh mahte luatnak kan nei cio. Cumi luatnak hi a thupibik. Ziangahtile mahte luatnak kan neihmi hi zohman in in kham thei lo. Mahte luatnak cu thinlung lam luatnak a si. Curuangah mahte luatnak cu thawnginn sung khalah a danglam cuanglo. Ruangpum cu a phunphu in hrem le kham a theih nan, thinlung cu zohman in kham a theih lo. Curuangah mi ralttha tampi cun an nun tiang an liam ngam. Cucu an luatnak ruangah le an  luatnak hrangah a si. An ruangpum  cu thah an sinan an luatnak cu thah a tuar loih thihnak tiang a neh sawn a si. 

Mahte luatnak cu mahte sersiam a siih mahte fehsuak a si. Cuih lamzin ahcun buainak, harnak, sunnak a phunphun a um. Sihmansehla a fehsuaktu cun luatnak an hmu ding. Midung thlun phahin luatnak a um thei lo. Luatnak cu midang ih pek silo in mahte pekawk mi a si. Midang in luatnak an pe hmanah mahten a peaw thiam lo tu cun a luat cuang lo ding. Hmansehla midang in luatnak an pek lo hmanah mahte luatnak a peaw thiamtu hrang ahcun khuitawk khalah luatnak a um ringring.  Mi kuttang ihsin luat hnu ih mahte luatawkter thiamlotu hnak cun mi kut hnuaiah um cingin mahte luatnak a hawl thiamtu hrang ah luatnak leiram a kausawn. Luatnak cu a hmang thiamtu' hrangah hlawknak a sinan a hmang thiamlotu hrangah cun hloralnak a si.
Verse (1) 28/01/2011 -Amos Uk Mangbk