Bualkhaw Christmas

19. Bualkhaw Christmas
(Bualkhua version)
Tenreh huihhio no nemzel in ra atsia
Tsop siarsuar-a a ra tsopsik huihhio a leng phang
Christmas ngaklah in thanop dang veng sising

Kangro thingkaak kuai naupangrual tele
Roding sangthing tsomsah nupi patsang te
Ro bulsum thing khawi hamtseih suakthuan val rual tele
A mawi parte bangot ngai mawi te khen
Phuntsang, hintsang in vaimuak dangveng maw Christmas

Kei silhvan te a pher phang a sikhen
Kei rong a rawp phang a sikhen
Biakinn thaw kei khawla phang a sikhen
“Christmas phang vang,” tin neek tsawm dang veng sising

Hampalak le mualniam note panin khaw kei zo phang
Sen sersur-a a mawi Zaizong parte
Hing demdum-a a mawi Tsaar thing note
Dumlak-a mehur Ankam phaphate kei mu phang
Christmas thanop dangtseih sinasingnge maw

Mi vuan le lo laiah a sikhen
Mahni vuan le lo laiah a sikhen
Tsuu luan sangsang, Banla tsawn hoihhoih
Siisu min derdur, Thinghaa, Balhaa tak kawngkawng
Thawpat rah urur le kamrah hin tsangtsang le 
Kawltsang, laitsang Ngantun lom rim vengvung te
Kei mu phang, kei tawk phang, kei nei phangin
Inn hawl (Carol singing) tu thanop thei leita hne maw

Heibangin khawsik, atsop pelhta sikhen
Tsawlin bain zongawl ngelngel thahlam a sikhen
Eihmuat heibang-a a veizo nungngawl pelh takhen
Vanmi te bangin kei aw a rem ngawl pelh sikhen
Patsang pawl, Nupi upa pawl, Nupi nauta pawl
Dangval pawl, Khangngai pawl tiin
A zasah nung, a rem, a sa sahnung, a thatho thei
Christmas la zirh dang tseih ian, a khomnakin
Tsawp letlutin lazir puai dang sahnung leita maw

Khawdang ramdangah khawsa in omte a sikhen
Khualvak in kawnaikhawzong  a leng tekhen
Vanzuang, Meileng, Mawtaw, Mawtaw Saikal to inle
Kawng rori thaw mual tampi liamin
Lamphei, buksuk, kaiso khen naaplah ngawlin
Nisa, ruahsar, huihra khen kihhah ngawlin
Dangrum, rikaam, le ruahbang Saup khen poisa ngawlin
Hong ten, zuan ten, thanop tennak
Kei Bualkhaw Christmas si hne maw

Ang sising maw?  kei za phang
Ang sising ngei! tin ring theitawp in au dang-a
Nai innah hen angnak ther le remnak ther om tasen!
Tin Van muitsu burh dundang tselhphang
A alh lulut Biakinn tual-a Meipual zuandang leh atsia
A lum ngenngun Laphehti in uk dang lehleuin
Bulum lutin pumkhawm dang maw
Sahnunnak nihtiam bawlnak ngai dang, pan dang
Tsin, thangphatnak la sa dudut thahlam in
Meipual kawn dangtseih zing khawvar tian rori
Kei Bualkhaw Christmas 
Ni khatnak

Zing ni suakzawh a reingawlin
Khawsung Dawngtung hem pin
Vok te ai ngungun kei za phang
Simlai eitu kei thanop nak bangin
Kumkhat sung kei rongrawp dai tiartu
Christmas simlai Voksa meh khamtehin ei pek dang
Eih le in tsa naper a phunphun per dang
Biakinn tualah le inn laklawhah
Kei Bualkhaw Christmas 
Ni nihnak

Zingtawnno khawsik tsaitseih thahlamin
A zuamte khawi hamnak Tsar kuang hoihnote
Patsang dangval a zuam pawlkhat ten 
Vung dang zawng dang Biakinn tual len tian
Kei khawlhamnak lehsawng phunkim, hinkimte
Biakinn tualah khawmdang kei tselh phangin
Christmas larem te zuam dundang, sa dudut dangin
Christmas lehsawng hintsang te
Bangten noin sem dundangnak kei tso berhzawh
Christmas lehsawn khop pekin
Mahni inn tenah hongdang sising
Kei Bualkhaw Christmas 
Ni thumnak

Tsimi bangin,
A tsungnung Van Bawi Tsapa
Vanvummite thangphatnak
Tuukhalte benak
Mitsim pawlkhatte lehsawng manpha selin benak
Lei le van remnak Bawi
Santu nauno Bawi Jesuh
Suah huntsam a tsunnung Christmas
Pamhaih thahlamin 
Vailat dang  veng sising

Awle! Bualphun u le naute
Kei Bualkhaw zawl mun nuamah
Biakinn tual zawl laiah
Lengdang thei tasuh sisingnge maw
Sinapikhaw, kei thinlung raula vang
Haithong men theih nungngawl, hang khen a hang nungngawl
Kei Bualkhaw Christmas 
Kei phawk ruaruap, kei ngai ngunguih talekhaw
Me lai siar thahlamin tukum Christmas 
Kei Bualkhaw ah hong dangin mang dang a sing maw.

-Amoschin Bk