NUNDAN KAN ZIR PEI (III)

NUNDAN KAN ZIR PEI (III)

Zanmang ahtla kan man dahlo mile kan ruahnak khal in a ban lomi hmunah khua le ram a umih cutawk ahcun kan um. Kan semsuahnak khua le ram tanta in khuadang ramdang pan vivo in zatlang kan liam hnuah a mawi sinsin mi khua le ramah kan thleng. Lam hla deuhdeuh kan fehih thil mak le khuaruah harza thil tam deuhdeuh kan hmu, kan hna in a thei. Cutawk ahcun titheimi zianghman kan nei lo, nauhakte bangtuk kan si. Kan theidah lomi minung hnenah kan thiamhrih lomi le kan tuahdah lomi hnatuan kan tuanih, kan eidah lomi tirawl kan ei in tikah kan hrangah zirding lawngte an si. Cuihhmuh ahcun kan thiamcia kan titheinak pawl cu san an tlai nawn lo. Cuticun nundan thar zir kan tul tikah zirhtu tla tampi kan tul ve. Nauhak hnen ihsin ka zir a tulmi a um bangin, mino hnen ihsin, cun pitar le putar hnen ihsin kan zir tulmi tampi a um.

Nikhat hnu nikhat a liam rero miin kum khal a liampi vivo ih kan hmuhtonmi tla a tam sinsin ding vekin

kan zirdingmi tla a tam sinsin ding. Cutin ramtharah kan tlangleng laiah kan kiangkap ih kan hmuhtonmi ziangtinkim ah zir ngah ding a thupi zet. Tongfim ah “hmuhtonnak cu zirhtu thabik a si” tin a um bangtuk in kan humhtonmi parah zirthiamtu hrang ahcun zirnak thabik an thei ngah a si. Zirding tampi a um laiah zir duh loin kan caan a liam deuhdeuh le buainak tam deuhdeuh kan tongding ti a fiang.

Thil tha le thil thalo thu ah zirding tampi a um lai. Hih thuah sim ding tampi a um. Ziangahtile thiltha kan timi le thil thalo kan ti theumi pawlhi an tha thluhlo ih an sia thluh ve cuang lo. Caan khatih thil tha kan timi cu nehhnu caan khatah thil thalo ah a cang thei. Atuih thil thalo kan timi tla nehhnu caan reilo ah thil thazet ah a cang sal thei thotho. Thil tha le thil thalo kan timi hi a caan, a hmun, a minung le a thu parah a thum aw theu. Cucu caan tawite sungih a danglam mile caan rei hnuah a thlengawmi tla a um. Cun milai thupom ruangih thil tha cu thalo ah le thil thalo cu thil tha tin remsal caan a um thei thotho. Culawnghman silo kan khawvel boruak danglamnak ruangah thil tha le thalo kan timi cu a danglam thei. Asinan, khawvel boruakih thudik le thuhman cu an danglam thei lo. A liamcia caan ah, a hlan kan um hmuh ah, ka hmaisa minung thawn kan tuahmi thil tha cu caan thar ah, hmun thar ah, le mithar thawn a milawk thei lo nakzawn a um thei men. Leitlun ahhin cuvek thu harsa a um theu ruangah nundan zir kan tultuk tihi a fiang. Ka duh le duhlo ruangah silo in kan duh khalle duhlo khalle zozokhal nundan zir kan tul, el ding a tha lo. Curuangah Bible intla leitlun nun hi rinsan ding le hngalpi ding zianghman a um lozia a simcia thluh a sihi.

Mifim, mithiam pawl le khuaruahthiam pawl in nundan lamhmuhtu le hruai awknak dingah daan tampi an tuah mihi thil tha a si. A ruat theitu in midang hrang duhsaknak a neihmi ruangah cuih thu cu cabu sungah le hmuhtheih, ngaitheih ding in tuah a si. Daan thatha ziangtluk in tam hmansehla cumi nihcun minung ih ruahnak a hruai camcin thei cuang lo. Ziangahtile zozokhal in mai’ bulpak thupom le daan kan nei ve. Cucu ziangvek daan khal in a uk thei lo, daan hmuahhmuah lakah daan sangbik a si leilam thu ahle Pathian thuneihnak hnuai ah. Amah minung lala hmanin amah le amah a ukawk thei lo. Hih thu ruang ahhin leitlunn ih uknak sangbik cu mah le mah ukawknak a si. Mi thawng tampi cu thuneihnak le daan in a uk thei dingnan mi thawng tampi in mi pakhat ih thinlung cu a uk thei lo caan a um ding. Cule mah le mah ukawk ding tla a har bikmi a si thotho. Hih thuhi a hmu thiamtu hrang ahcun midang thawn pawlkomnak thuah hmuhdan le theihdan an thiam ding. Ziangziang thuhla ah an phurh a zang ding. Curuangah nundan hi thiam ding har hmansehla zir kan tul tinak a si.

Hnatuan nak thuhla thawn simthiam a harzetmi nundan hman le hmanlo tin a um theu. Minunghi hnatuan neilo in umci kan si lo. Ziangahtile hnatuan nei lo in kan um tikah biaknak lam le uknak lam ih khapmi thil thalo tla tuahpang a olte. A san cu ziangtal tuahmi nei lo in kan um thiam lo theu. Curuangah hnatuan tha kan nei lo ahcun thil thalo tal tuah kan duh theu.

Zangzel ruangah hnatuan neilo pawl cu an zangzelnak kha an palhnak a si. Mi lawzet hrangah tuanding hnatuana umlo ahcun cucu leitlun ih famkim lonak phunkhat a sive. Cun, law tla law, hnatuan tla nei cingin damlonak le buainak a phunphun ruangih hnatuan lo ih um khal hi leitlun ih famkim lonak a si thotho. Mi hrekkhat cun paihtuk lo cingin pawmcawmnak hrang tiah a mawilo le tuah sian lomi thil tiang in an tuah. Mi hrekkhat lala cun a tultuk lo nain nomnak le diriamnak duhah hna an tuan ve. Mi hrekkhat cun thansonak hrang tiah sun zan in an tuan ih an ngahmi cu ei lo in lo in an suup aw. Mi hrekkhat pawl cu lawmhtlak ngaingai an si. Ziangahtile mai’ hrang lawng ruat in mi tampi hamtamnak thawn hna an tuan laiah annih cun midang zawnruat in hna tampi an tuan suak a si. Minung hrangah hnatuannak thuhla hi kan thuhla a siruangah nitin kan buaipibik mi thu tla kan hnatuan thuhla a si theu. Hnatuannak hmunah upadeuh, nautadeuh tin a um bangin a thiamdeuh, le thiam lodeuh tin kan um. Hlawhman tamdeuh le maldeuh tin kan umih hnatuan sangdeuh le niamdeuh tin kan um fawn. Hivek kan bangawk lonak tete a um ruangah buainak tete a um ve theu. Cutin nitin kan buaipi bikmi kan hnatuan thu khalah nundan kan thiam lo ahcun kan nitin nun cu a buai ve ding.

Leilungpi hi kan hnatuannak le kan pumpuarnak hrampi a si. Zianghman tuahlo in zianghman kan ngah thei lo. Asinan thil pakhat na tuahah cun ziangtal ngahsal lo dingin leilung in a siang velo. A caanah malte lawng kan tuanmi sung ihsin tampi in ngah terih, a caanah tampi kan tuan nan malte lawng kan co caan tla a um ve. Pumcawmnak hrangih hantuan hi a tha. Asinan nunnomnak le duhhamnak ruangih hnatuan cu a tha lo thinbangnak a suah ter. Thupoi pakhat cu milai hin duhtawk kan thiam lo theu. Pumcawmnak hrang thil thalo a tuahtu le nomnak, hiarmi diriamnak hrang thil thalo a tuahtu karlakah bangawklo a um. Thil thalo tuah veve an sinan pumcawmnak hrang cu tuahlo a theih lo caan a umih nomnak hrang cu tuah lo a theih ringring. Thil thalo sihmansehla pumcawmnak hrangah a tuah lo ahcun a thi ding, asinan nomnak hrang cu tuah lo khalle a thi lo ding a si. Hih thu hi hnatuan hmuahhmuah hrang a si lo, thihding le luatding dunhmun thawn pehparaw ih hnatuan hrang lawng a si. Amahbelte nomnak hrang tuah duhmi a tuah lo ahcun har a tiaw zet ding. Cumitla cu lei tisa duhnak men a siih tulmi a si fekfek lo ruangah a hrial thei tutu in hlawknak tamsin a ngah ve. 

Verse (3) 30 Dec. 2010 

NUNDAN KAN ZIR PEI (IV) siar peh aw...