NUNDAN KAN ZIR PEI (I)

NUNDAN KAN ZIR PEI (I)

Leitlun ahhin tuah ding a tamtuk. Tuah duhzet cing in kan tuah thei lo mi a um bang in, tuah duh lo cing in kan tuah a tul mitla a tampi. Duhmi lawng tuah sibangsehla misual ah kan cang theh lo ding maw. Ziangahtile leitlun ih thil um pawlhi a netnak ah sualnak lam pan pitu hlir an si. Cuticun tuah ding kha tuah dan ding siseh, tuah lo ding kha tuah lo ih hrial dan ding siseh nitin in kan zir vivo. Nitin ih nun kan timi cu lungawi dan ding kan zir vekin riahsiat dan ding le tuah, tuan dan ding zir rero mi kan si. Zir ding thu tampi lak ah nundan thu zir hi a harbik. Fimnak le thiamnak tla zir an siih zir ding a cem thei lo bangin nundan khal zir cop rero a tulih zir theh ti a umthei ve lo. Kan thih tiang zir rero cing in a nung dingmi kan si. Leitlun ahhin duh vekin a nung ding kan silo ih a tuldan vekih a nung ding kan si. Duhvek ih nungding ahcun nundan zir kan tul lo dingnan, a tuldan vekih nun thiamnak dingah nundan thiam kan tul a si.

Nundan thiam le thiam lo thuah farahnak le hausatnak an danglam lo, fimnak nei le neilo khal an bangaw thotho. Mifim khal in nundan zir a tul,

milian hausa le mi farah khal in nundan zir a tul. Tongdang in simsehla mi hmuahhmuah in nundan zir kan tul. Nundan a thiam lotu hrang ahcun leitlun hi riahsiatnak, lung retheihnak, beidonnak le riahsiatza a si. Cucu mifim, milian, mithiam khal nundan an thiam lo ahcun leitlun ah vansang an lam ding a si. Khatlam ah mi farah, nauta pawl tla nundan an thiam ahcun an leitlun nun cu harsatnak in a nehniam thei lo. Ziangahtile leiram hi duhthusam kim lonak ram a si. Duhthusam a kim lo tikah riahsiatnak a suak. Riahsiatnak cun minung ih lungawi nomnak hmuahhmuah cu a longsak thluh. Minung kan nunram ah lungawinak a cem ahcun leiram hi riatsiatnak ram ah a cang. Nundan a thiam mi cun cuvek harsatnak karlak ahtla a tuarzia a thiam ih a nunnak cu ruahsannak in lam a hruai.

Nauhak cu nu le pa, u le pawlih fialmi tuah an si. Mino cu nu le pa, nunphung ciin le daan, le ram uknak, biaknak lam in hruaiawknak ih sianzat lawng tuah sian an si. Nu le pa cu ram uknak le biaknak lamih daan a um vekin thil tuah a sitheu. Pitar, putar pawl cu fa pawl, tu pawl, le umpitu pawlih tuahtermi lawng tuah a sive ding. Minung hin a tlunih thu vekin pakhat le pakhat pehzomnak thu ruangah tuah duhmi tuah thei loin le tuah duh lo mitla tuah a tul caan vei tampi a aum. Nauhak in thiltha a theimi kha tuah a duh hmanah nu le pa in tuah an sian lo ahcun cuih nauhak ih theimi thiltha cu thuhmi thil tha vekfang a si ding. Vei tampi cu thiltha tampi um hmansehla thil tha lo tampi ruangah thiltha tampi a hlo lak ta. Cunruangah thiltha le thiltha lo thu khalah a ruah zia, thiam kan tulih kan ruahmi tlunah a nunpidan khal thiam kan tul zet.

Minung hin theithiamnak kan nei famkim lo ruangah pakhat le pakhat mawh kan puhawk, kan toawk, kan huatawk ih kan ralawk hnu a netnakah a that khal kan thatawk men. Hihi leitlun ih thil poimawh zet a si. A mawh, a sual, na mawh, na palh kan tiawk rero mihi ka thei thluh ruangah a silo. Kan thei lo ruangah a si sawn. Kan ruahtheinak, le kan theihtheinak in a ban lo mi thudik thuhman tampi an um. Cuih kan theiban lomi thudik tampi ruangah milai in harsatnak tampi kan tuar sawn a si. Mi tampi cun kan thei taktak lo mi khal thei vekin umawk ter kan hmang, a duh khal kan duh. Na thei lo, a thiam lo tin midang in mit tampi thawn in zoh, hna tampi thawn kan thu an ngai, kaa tampi thawn kan thu an rel tikah kan lung a awi thei lo. Ka theilo, ka thiam lo, ka palh, ka mawh, ka sual tin midang hmaiih thumawk ding hi kan kan ti caan vei tampi a um. Cucu minung ih lungruhnak phunkhat a si. Lungruhtuk hi a tha lo, harsat thinpih ding a tam tikah a kuai thei. Hihthu ruangah thudik thuhman thawn thu relnak hmunah nundan a thiamlo mi cu mualpho nak an tong ding leitlun ahle Bawipai Ni ah.

Verse (1) 30 Sep 2010

NUNDAN KAN ZIR PEI (II) siarpeh leh aw...