NUNDAN KAN ZIR PEI (II)

NUNDAN KAN ZIR PEI (II)

Nundan zir cingin, ni thla siarin, hmailam thlirin, dunglam cuansalin ruahsannak thwn hmai nor vivo ding kan si. Leitlun ahhin ruahding, zirding, tuahding le tuah loding tla a tamtuk. Thinbangnak, riahsiatnak, harsatnak, duhthusam kim lonak sungzatlaknak le lungawi nomnak, hlawhthilnnak beiseinak pawl cu leitlun ih kan covo an si. Aw….ziangvek dinhmun ah kan um khal le kan dinhmun ah nundan thiam dinghi a thupi bik.

Milai kan nun ahhin damlonak, vanduainak, sungzatlaknak a phunphun in in nehtikah thanau in le zianghman beiseinak, ruahsannak nei lo in caan liam a olte. Kan taksa le thinlung ih tuar theinak kan neihmi in a tlin lo tikah
leitlun kan hringnun hin titheimi zianghman neinawn lo in a thi hrih lo mi minung fangah in canter theu. Lungawinak cu sankhua a daih lo ih caan sung ah a liam vemai ding. Cuvekin riahsiatnak khal caan in liampi vivo lo bangsehla zoinso leitlun ah nung a ngamding? Thihnak sawn kan hrilcio lo ding maw. Nunnak cu lungawinak le riahsiatnak thawn a fehtlangih lungawinak le riahsiatnak cu Pathian thuneihnak hnuai ah an um.

Lungawinak a hawltu in lungawinak, riahsiatnak a hawltu in an hawl vekin an hmu fingfing. Hih thil pahnih hi hmuhtheih thil an silo, asinan tontheih an si. An pahnih hi tuahtuannak ih rah an si. Harhdam dingin ralring zettu tla khua caanah damlonak ihsin a luat cuang lo. Hardamnak thawn a kalhawmi thil a hmangtu, tuahtu tla natnak in a nehthluh ve cuang lo. Damlonak cu kan ralring lo laiah le kan theihmanlo lai ah a thlengmi a si. Minung in mah duhmi tuahtheinak kan nei nain kan duhmi famkim tertheinak kan nei lo. Curuangah a cangmi tlunah lungkim theihi a tha ih a thupituk, cukhalcu Pathian thluasuahnak le remruatnak a si. Zingah ni a suak cun ziangtin sun ni ka liampi ding ti ralringcia kan tul.

Zing kan tho cun tumtahnak tampi kan nei kodingnan sunah le zamlamah ziang a thlengding ticu kan theicia lo. Tumtahnak lawnghi kan neihmi a siih cuih tumtahnak cun ruahsannak a suahpi. Curuangah ruahsanak pakhat lawnghi a sunglawibik le a thupibik le man a khungbik kan neihmi a si. Zozo khal kan suahkehnak cu a bangawk cio. Taklawng ih a suakmi hlir kan si. Nunau in nunau sinak, mipa in mipa sinak lawng kan nau’ pumsung ihsin kenmi le suahpimi kan nei. Thildang hrimhrim kengbetmi zianghman kan nei lo. Milian hausa nunau in siseh, farah zonzaimi nunau in siseh an pumsungih naute hrangah thilri pakhat tehman an pe thei lo. Asinan, kan thihnak cu kan suahkehnak vek a sinawn lo. Suahkehnak cu bangawknak asinan thihhnak cu danglamnak a si. Suahkehnak le thihnak thuih bangawklonak piahralih bangawknak phunkhat a um — cucu zozokhal veikhat kan suakih veikhat lawng kan thi ding. Hih thu khalhi Pathian ih remruatnak a siih milai in duhhril theinak kan nei lo. Nunau in nau a hrin dingni a thawn thei lo vek in kan thihding ni khal kan thawn thei lo. Cutin kan damsung ahhin kan duhhrilnak tello in a cangmi thil a tamtuk. Curuangah nundan zir kan tulzetnak a si.

Minung hi mahlawngih um ding cu sia a rem lo. Sungkhat unau, rualpi thawn khua a sami kan si. Nupi le pasal neih tla hi a tul ruangah a sibik. Pawlkomnak thuah ralring ding tampi a um. Ziangahtile minungih buainak, harsatnak a tamsawn cu thilri ruangah a silo, mi pakhat le pakhat pawlkomnak thu ruangah a sisawn. Curuangah minung ih harsatnak cu minung hnen ihsin a ra. Ziangahtile thilri le thil dangdang hnak in minung in buainak a suahpi sawn. Mi pakhat ih harsatnak cu a innsang, unau sungkhat, le rualpi hnen ihsin a thlengmi a tambik. Hih thu ruangah nundan kan zir vivo a sicu.

Verse (2) 1 Sept. 2010

NUNDAN KAN ZIR PEI (III) siar peh aw...