Father’s Day Thuanthu Tawi

Father’s Day Thuanthu Tawi
Pa le pawl Sunloihnak ni (Father’s Day) hi 1910 ah American ram Washington State, Spokane khua mi Sonora Smart Dodd in an khua ih YMCA center ah a thok hmaisabik mi a si.
Anna Jarvis in 1909 ih a thokmi Nu Ni ah nu le pawl an sunloihnak sermon a ngai hnu Sonora cun Pa Ni um ter duhnak a neive. Ziangahtile suahpi unau (6) an umtlang ih a nu cu nautabik fa a neih laiah naunei harsatnak ruangah vansiat ah a thi.
Cuihhnu an unauza cu a pa William Jackson Smart in nupi dang nei nawnlo in fale duhdawtnak thinlung tumruh ruangah a tungdingpi. Sermon a ngaimi ah Nu pawlih thupitnak le sunloihtlak sinak pawl tampi a thei tikah anih hrangih cutluk thupi le sunloihtlak Nu cu a nei nawn lo. Rinsantlak a pa cu nu le pa dinhmun kaphnih ah a fale a cawmdawl thu a ruah tikah Pa Ni hungsuak theinak dingah a phunphun in nasatak in a zuam.

Sonora cun American ramsung hruaitu upa a dotdot hnen ah kum reinawn caan lak ih thuhla a suahpi  hnu 1966 ah President Lyndon B. Johnson in June thla zarh (3) nak cu Pa Ni ih hmang dingah a hngetter hnu kum ruk, 1972 ah president Richard Nixon in Pa Ni cu rampi zungpitni si dingah a hngetter sin a si.

Pa Ni hi June 3rd Sunday (Zarhthumnak) ah hmanglo in ni dangdang ah a hmangtu ram tampi an um. June Zarhthumnak ih a hmangtu ram pawl cu: Ameria, Antigua, Bahamas, Bangladesh, Bulgaria, Canada, Chile, Columbia, Costa Rica, Cuba, Cyprus, Czech Republic, France, Greece, Guyana, Hong Kong, India, Ireland, Jamaica, Japan, Malaysia, Malta, Mauritius, Mexico, Myanmar, Netherlands, Pakistan, Panama, Paraguay, Peru, Philippines, Puerto Rico, Saint Vincent, Singapore, Slovakia, South Africa, Sri Lanka, Switzerland, Trinidad, Turkey, United Kingdom, Venezuela le Zimbabwe pawl tla an si.

Note: FCC Bulletin  hrangah ka nganmi a si.