Pa Tha Sithei Ding In

Pa Tha Sithei Ding In

1. Innsang ah Caan Pek Aw

Pa in innsang ah caan tampi pek ding a thupi. HnaTuan ding tampi nei khal hmansehla innsang ah caan pek man lo ding khop in hnattuan ding a si lo. Nupi le fa le pawlin innsang ah ziang na tuah, ziangtin na kilkhawi, ziangtin innsang na kaihruai ti pawlkha an zoh ringring mi a si. Innsang cu nui’ ttuanvo tiin tan men ding a si lo. Cuhnak cun rawl ei, ti in, sinfen ihsin thok innsang hoha ding cu pai’ ttuanvo a si sawn. Fala pawl ih thlun ding daan simzirh ding ttuanvo neitu a si. (Daan. 6:6-7)

2. Pawlkomnak Tha Nei Aw

Pa tampi cu nupi le fa pawl kawk ding lawnglawng an bawh. Innsang ih nupi, fale thawn pawlkomawknak, nomnak, hni tlangnak, thunuam relnak caan neih ding a thupi. Nupi, fale ih sim duhmi le ngen duhmi ngen ngam ding le sim ngam dingin pa cun pawlkomnak neih a ttul. Nupi in ziang thu simduhmi a nei, fale pawlin ziang ngen duhmi an nei ti kha pa cun ttha tein an annka ngai sak ding a si. 

3. Duhdawtnak Funghreu Lawng Hmang Aw

Pa cun duhdawtnak funghreu thawn lawngin fale cu thawi ding a si. Thinheng ding a um tikah daantat lam siloin duhdawtnak thawn simzirh ding a si. Mai’ thinhennak pawlkha nupi, fale tlunah kut thlak ding a si lo. Nupi, fale cu an sual hmanah zirh ding, remthu relsak ding, zindik kawhhmuhtu ding a si (Col. 3:18-21).

4. Nupi Dawhdaw-upat Thiam Aw

Nauhak kilkhawnak lam zir thiamsang pawlin “Pa in a fale hrangih a tuah dingmi thupibik pakhat cu an mithmuh ah nupi upat ding,” tihi a si. Upat thiawmawton mi nupa cun an fale kha nunzia mawi an zirh ngah a si.  Bible khalin pasal in nupi cu duhdawt dingin a zirh (Eph. 5:25, 33).

5. Pathian Duhmi Daan Zirh Aw

Pathian a ttihzah thiammi pa cun a fale kha Pathian duhdawt dan le upat thiam dang ding a zirh. Innsang cu Pathian ttihzah thiammi, duhdawt thiammi a si theinak dingah pa (nu) in a hmaisabik ah Pathian duhdawtnak, ttihzahnak nei hmaisa a ttul. Cumi cu fale in an cawng dingmi nunzia a si.  (Daan. 6:5-6)

-SD News: June 15, 2015

Amos Uk Mangbk