Nu le Pa le Fale Karlak Ih Ruahnak Pekmi Sex Thu Phun (7)
Nu le pa thu, nunau mipa sinak (sex) thu vun rel hin
zokhal a suallam mithlam a rungsuak ttheu. A ngaingai cun sex timi cu Pathian
laksawng a si ruangah, duhdawtnak langternak le Pathian duhzawg in hmang thiam
ding hi a thupi bik mi a si ko.
Pastor pakhat (Yangon ah) cun cabu a zuar ih cumi cu a
thup tein a zuar rero. Cabu lei duhzet tu ka si tikah, “sayapa na cabu zuarmi cu lei ka duh ve,” ka ti
tikah, “Aih” tiah i let. “Kum upa pawl hrang lawngah ka zuar mi a si,” tiin in
rak sim bet.
Ka sim duhsawn mi cu Laimi cu a tlangpi in sex lam kan
theihnak, hmuhnak a bituk, kan theihnak
a maltuk ruangah thil cangsual a um sawn ttheu. A ngaingai cun nu le pa
ihsin thok, fale siseh, mino pawl siseh fimvarzet in zirhawknak a um lo ruangah
a caan a kim tikah a tthangmi mino tampi cu sex thu ah a thuptein thinlung
buainak a tuartu tampi a um ding a fiang.
Curuangah Bible ih zirhmi sex thu lam kan lut hlanah
nauhak hnenih nu le pa in simzirh dingmi sex thu phun 7 pawlhi kan zohtlang
hrih pei.
1. Tuantein sim cia aw. Nu le pa pawl
in mai sungsuak fale cu zinpeng a zawhsual lo nak dingah a hmaisabik duhsaknak cu a nauhak tet lai ihsin a nunram
ah sim ngah, zirh ngah a thupi. Tongfim hitin a um “Nang in na sim lo le,
midang in an sim ding” ti a siih, sim duhmi cu mai sungsuak fale ih theih ttul
mi thu cu nu le pa in tuan tein simcia
lo a sile mi dangih simmi an thei thotho ding. Curuangah
midang ih simmi thu an
theih hmaisa hnakin nu le pa ih simmi thu an theih hmaisa a thupi sawn. Na fale
ih thutheihnak hrampi na si theinak dingah a hmaisabik ah na fale ih theih ttulmi
sex thu cu nangmah rori in sim hmaisabik ding zuam aw.
2. Ruahnak hlawm ringring aw. Nauhak kum 4 mi cun nunau le mipa ih danglamnak
tete theih a cu ve zo. Curuangah nauhak in an theih duh mi tlun ah thu an suh
tikle an theifel, fiangfai dingin simfiang a ttul. Veikhat sim men cu nauhak hrangah
a tawk lo ding. Nunau le mipa bangawklonak thu pawl na fa in a suh tikah a daan
men in le a lungkimnak men in let hlah aw, a theihfiang theinak dingah tthatein
simfiang aw.
3. Na fale ih thusuhnak cu leh aw. Vei tampi nauhak in anmah thawn pehpar lo
zawngin tla thusuh an hmang thei. Cucu midang hnenah sim duhmi an neih ruangah
tla a si thei. Nu le pa tampi in sex lam thuhla ah nauhak in theih a ttul lo
tiin an thusuhnak pawl ngaihsak lo a si ttheu. Nu le pa in fale ih thusuhnak cu
leh sak lo a si ahcun midang hnenah an sut thotho leh ding. Cutikah midang in
ziangtin an leh sak ding ti theih a si lo. Midang hnen ihsin thudik hnakin capo
thu men lawng a ngah a si le fale ih thutheihnak cu capo thu lawng in a tawp
ding.
4. Thudik simzirh aw, santiluan cu
sihlah seh. Kiangkap kan zoh tikah sex thu kan pom dan a dik lo. Sex timi ih
sinak, thupitnak le sullam kan theihdan a hman nawn lo. A ngaingai ahcun sex
timi cu a bal, a sual, a borhhlawh mi a si lo. Hihi milai zokhal ih covo pakhat
a si. A mawi lo, a sual zawng, daan leng ih a hmangtu cu sual a si. Curuangah
nauhak, fale cu fiangfelzet in sim, zirh ding a si. Sex thu ah an kum zir in an
theiduh mi kha simfiang ding a si, cumi cun innsang an din tikah nupa karlak ah
theihthiamawknak tampi a suahpi leh ding. Sex cu sual nomcennak ah hmang lo in
Pathian laksawng a si ti an thei ih Pathian duhzawng in hman ding a sizia theih
ter ding a thupi.
5. Thinlung phurnak le Tisa phurnak.
Thinlung phurnak in tisa hiarnak a suahpi vekin thinlung lam feeling tthatlonak
in taksa damlonak a suahpi thei. Kum
thawn milaw lo in sex khawvel ih nomcennak le hmansualnak pawl ruangah
damlonak besiabik tiang a um thei tihi nauhak, fale hnenah simzirh ding a si.
7. Thudik sim thei dingin na thinlung
sangka ong sak aw. Nauhak cu an ruahnak a tawi ih rangzet in thil an tuah ttheu
ruangah tuahsual mi tampi an nei. Veitampi nu le pa hnenah an harsatnak thuthup
tampi phuan duhnak an nei ttheu. An bulpak thuthup le harsatnak, buainak pawl
an sim ngam theinak dingah thu ruahpi aw, capo phah aw la a duhnak theithiam
sak aw. Tuahsual mi an nei hmanah
ngaithiam in thinhengnak langter lo dingin zuam aw.
7. Bawmtu si zuam aw. Bible sungah
Christian nunzia mawi thuhla thawn pehpar in sex thu lam zirhnak tampi a um. Na
fa kha thusuh ding hmaisong hlah aw. A lo sim hmaisa ngam lo tla si thei,
curuangah nu le pa in suh hmaisa in a ttulsamnak zawnah bawmtu si zuam aw.
(7
Suggestions for Talking to Children About Sex) a remcang
danin ka lehsal mi a si.
–Charisma News
Uk Mangbk
26 July 2015
No comments:
Post a Comment