Nunu, tuarhar ti fualfo cingin, na hrangah hi ca ka ngan laiah ziangtlukin na tuar a har ve ding ti ka lo ruat tuk.
Nunu, ka lo duhtuk ti i theihsak hram aw. Nungsal ding si ningla nang
cu ka nu dingah ka lo hril thotho ding, kan innsang tla suahsemnak inn
si dingah ka hril thotho ding. Hmansehla cuvek caan ṭha cu ka hrangah a
um nawn ding si lo!Nunu, ka tuarnatnak boruak in keimah le keimah control theinak thazaang ka neih nawn lo ruangah ka duh lozetmi (mah le mah thahawknak) ka tuah hi a si. Tuarsuak thei dingin thla 13 rori ka rak zuam ṭenṭo nain ka tlintawk lo ruangah a si.
Nunu-Papa, nannih cun in theithiam sak lo men thei, kei khalin ka lo mawhthluk ngam ve lo ding. Ka ṭapa neihsun David, anih cun ni nikhat ah a theifiang leh ding, atu cu a kum a no tuk lai.
Nunu, ka pa thawn in duhzet ruangah thilri tampi in leisak, in pek ti ka thei, asinan kei cun ka hiarhal ringring mi cu duhdawtnak a si. Ka duhmi hnak tamsawn tiangin thilri in leisak, ka rualpi pawlih theihdah lomi hmun ṭhaṭha le nuam ah lengsuak in vahpi, asinan ka thinlung in duhdawtnak ka khop lo thotho. Ka sinak vekten in duhdawttu, ka thinlung tuarnak i tuarpi theitu ka hlam ringring a si. A caancaan teih kan innsang kan hni tlang, kan nuam tlang caan pawl cu zuunngai tuar bangin ka thinnatnak a sisal ṭheu. Thilri tampipi in pekmi, in leisak mi pawlin in hnem thei lo a si, keimah lawng lileng umhar ringring cu tuar a har ko.
Nunu, na ṭapa, ka pu Tony cun ka thinlung tuarnak in theihsak. Rualpi ding, thunuam relpi ding ka hiarhalnak pawl in theihsak. Nang khal, ka pa khal ka umharnak theihsak man lo ding tiangin hnaṭuannak hmunih nan buai laiah ka pu Tony cun kan inn ah in rak umpi ṭheu.
Rualpi nei loin zuklem tete thawn ka um ṭheu. Asinan ka pu Tony in in ra hnem, amah thawn lek tlang, copoh tlang le ei-in tlangin nuamtak in kan rak um. A rei vivo tikah ka pu Tony ka duhtuk, ka atcilh, amah loin ka um thei lo, ka rinsan fawn. Hmanseh, a cuih ka atcilhnak cu ka pu hrangah caan ṭha lamsialsak vek a si, kei hrangah cemralnak ah a cang.
Nunu, na tapa Tony in nupi bangin kum 3 sung rori in sualpi. Ka nu le pa, nannih in in theihsak ding ka rak zum nan, zosawn khalin nan rak thei lo tiaw. Kan dung kum ihsin thok kan inn a rat nawn lo hnu cu ka lung a kuai, um ngaihnak ka thei lo, ka thla a vang, nu le pa nan um lo ruangah tilam ka ruah tikah ka thinna ka celh lo. Amah khal ka mawhthluk ngam ve lo, ziangahtile kei in umpi duh nawn lo pang ding tiah ka phang fawn. Canada ah khual in tlawnsan hnu kei cu umhar tuar ngaihnak thei loin nun ka zuam nawn lo a si. Curuangah si, Nunu, ka tlawng cazirmi mark khal a tlak vivo. Asinan nannih cun, tuition zirhtu in kawh sak kha. Cang thei sehla ka pu Tony aiawh ter ka duh men, pom ciamco hman ka duh nan, a cang thei si lo.
Nunu, hril ding dang ka thei lo, hihi ka tuah a ṭul ko, ka umhar tuk sisi. Kan innkhan sung teah keimah te lawng ka rak um ringring ṭheu ti teh na ruat dah maw, tuihnu ah teh veikhat tal biakawk tlang caan a um leh pei maw?
Nunu, a liamcia thu nangmah lo sim ding thu dang tampi ka nei lai, asinan na thinnatnak titamtu men a si ding, cuih thu pawl cu ka thlankhur ah ka keng sawn men ding aw. Nunu, ka naupa David kha khuiah ka um ti theihter hram hlah aw maw. Cule, na rualpi, na hnaṭuanpi faate nei lai pawl kha an tikcu a tlai ve hlanah, kan thuhla pawl rak simsak hram aw, “Nu le pa tampi in faate duhdawtnak tiah thilri nan leih ṭheumi pawl hnakin faale in kan duhsawnmi cu nu le pa ih duhdawtnak taktak a si,” tiah sim hram aw. Ka nau David hrangah cun caan ṭha tampi nan nei lai, keimah in duhdawtnak azaten ka nau David in co hram seh tiah duhnak ka hlan a si.
Nunu, ka bank cazin le phone screen number, ka laptop number pawl kha na hnipuan retnak drawer sungah ka lo tan. Kei cu atui ka kut sungih siibur (thihsii) ka kaa a thlen cun ziangkim nattuarnak le umharnak hmuah thawn ka cemnak a si ve thlang ding.
Nunu, ka pa le naupa David tla ka duhdawt tuk, sim sak aw maw. Cule kan pastor khalkha ka hngih thei lo, a sermon le thlacam saupipi tla ka cing ringring, in sim sak aw. Ka rualpi pawl khalin in mawhthluk hram hlah seh, in sim sak aw maw Nu.
"Goodbye Nunu"
-----------------
1. Nu le pa pawl, nan faate pawl caan pek man lo ding tiangin hnaṭuan nan buaituk maw. Nan faate thawn caan hmang tlang ding man lo khopin thildang thupiter mi na nei pang maw? Faate pawl caan pek hram uh.
2. Nan faate pawl hnenah nan duhdawtnak theihter aw, sim aw, cule anmah ṭanpi ringring dingin sim aw.
3. Tulai online media san ah thahawknak thuthang in thuthang tampi a luahkhat. A tam sinsin lai ding sokhaw.
4. A ṭhalam ruahnak neiin faate pawlih ṭulsamnak hawlsaktu, an buainak theihpisaktu le tuarpitu siin an thu ṭhaten ngai saktu le anmah mawhthluk ih sualpuh lohli lotu nu le pa si zuam cio uh. Nan faate pawlih thinlung luahkhattubik, thinlung latu bik le an rualpi ṭhabik khal si zuam hram uh.
5. Thuṭha hlaṭha te thawn faate pawlkom uhla duhdawtawknak, rinsanawknak neiin karlak pehtlaihnak ṭhangso ter uh.
6. Harsatnak le tipalhnak lak khalah thapek thiamtu le an hlawhtlinnak parah lawm, lom a thiamtu nu le pa si hram uh.
7. Nu la pa pawl, nan faate pawlih duhdawtmi, rinsanmi, nelmi, umpi duhbikmi si ringring hram uh. Nan nauhak lai nu le pa siter nan duhdan vekkhan nan faate parah nu le pa dinhmun la theitu si rak zuam ve hram uh.
8. Efesa 6:4, Nu le pa pawl, nan faate pawl kha thinheng dingin tuah hlah uh. Cu ai-ah Christian nundan ziaza le zirhawknak thawn cawm uh.
Thuthang hram: zambianobserver.com
©Amoschinbk
No comments:
Post a Comment