MMID nehzul, MM Election hrang timlamnak, AA ralbuainak, Australia Meikang, US-Iran buainak pawl thawn January kan lut tlang.
Veikhat cu ka tomi taxi driver lamzin a fehsual ruangah thlen olnak lamzin i sut, ka theihtuk mi lamzin ti nana cu ol ten ka sim thei. Cutin tluangten tikcu tlai lo ten kan thleng thei. Taxi cu ka mawng lo nain diver cu ka control ko.
Thil tha lo tuah hi tumhrim cu a si lem lo. Tum lo phah cingin hmuhmi le theihmi thuhla pawlin kan thinlung in control caan ah zokhal thil tha lo kan tuah pang theu a si. Leitlun ah ziangdang hnakin minung thinlung hi midang-thildang control theibiktu a si. Minung thinlung hnakih raltha sawn le minung thluak hnakih fimsawn leitlun ah ziangdang a um lo. A makzet mi cu mah le mah famkim zetih control aw theitu mi zokhal kan um hrimhrim lo. Control tu kan tul a si.
Minung duhnak le thinlung a theibiktu Pathian le a dang pahnih:
1. Pathian (Saam 94:11) in a thei theh.
2. Satan (2 Korin 4:4) in tawkfang a thei.
3. Mah le mah (1 Korin 2:11a) kan theihaw ve.
DVD video kan zoh tikah remote control kan hmang. Aircon khal remote control kan hmang. Raldonak vanzam tiang remote control thawn an zam ter thlang.
2020 sungah kan lut zo. Hi kumsiar hi kan kut sungah a um mi siloin kumsiar sungah a nungmi sawn kan si. Curuangah 2020 kan nun kekar hi nunnak, himnak, luatnak, damnak, hlawhtlinnak, thansonak, le lungawinak dingah Cungnungbik Pathian nih in control hram seh!
2020 nun remote control Pathian pe uh si.
Lei le van ih thuneihnak a zaten kan Bawipa Jesuh kut sungah a um (Matt 28:18). Amen!
©Amoschinbk
No comments:
Post a Comment