Ziangruangah Santhar Christian Mino An Ṭumsuk?
1. Kawhhran daan ih ṭul tengteng mi khal siloin cangvaihnak, mi thu
cawngih cawngmi a tamtuk tikah nun lem a karh vivo. Cangvaihnak tinah
thu lawng a ngah lo, sumpai a ṭul. Sumpai ngah theinak dingah Kawhhran
cu bazaar vek thil zuarnak le leiba cawhnak ah a cang. Sumpai semrel mi
pawl tla cun biakinn ih khawm hnakin tohmun le tappi ih video, audio
thawn sermon ngai hi hlawksawn ah an ruat. Ziangahtile
biakinn thlen cu fund hawlnak ticket, mission hrang, harsa bomnak hrang
tvp a tamtuk. Cucun biakinn cu sumpai nei lo deuh le sumpai semrel mi
hrangah khawm ding hreh-um in a cang. A muril thlarau le thutak thu
ngaihven hnakin Fund hawl le sumkarh balance ah kan buai ta rori.
Theihthiam a harmi thlarau lam ṭumsuknak kapkhat a si.2. Pathian daan (Bible principal) thlun le thlun lo thu ahcun elawknak a um lem lo. Asinan Kawhhran daan thlun le thlun lo thu ahcun santhar zumtu mino tampi hrangah hremnak vek fang a si. An theihmi cu Kawhhran daan thawn pehparin hruaitu pawlih diklonak, thleidan mithmai zohnak le meeting thusia pawl tla khi! Ziangahtile Kawhhran hruaitu khalih thlun lomi daan cu member mino cun thlun tlakah an ruat lo. Sim tikah “Aw” an ti nain a tak ram ahcun “A poi lo” ti a si ko. Cucun thlarau lamah ṭumsuknak a thuk sinsin. Ziangahtile Kawhhran lenglam ah Christian nun pitlinnak a um thei vek a bang nain a dik ciah lo.
3. Kawhhran cu pawlkom bu menmen a si lo. Pathian thu ih dinmi a si ruangah Pathian daan thawi' a nungmi a si. Curuangah tuisan zumtu mino tampi in Kawhhran sungih um cu an vuivai lo nain a hrampi Pathian daan thlun cu thupi ah an ngai lem lo. Sakhua dangih um kher si loin Christian sungih um tho siin Pathian daan thlun lo cu thlarau lam ah ṭumsuknak pittawp a si.
No comments:
Post a Comment