"Thilṭha tuah tikah Thiṭha lo do A Telcih"#Christian pawl ziangruangah hremnak kan tuar timi thu (5) ngan mi lakah, "thilṭha kan tuahmi tampi cu midang ih diklonak langter, doneh khi a si," tiah an ngan. Midang siatnak tuah cu asilonan Jesuh dungthlunnak ruangah thilṭha kan tuahmi tampi cu midang, khawvel mi le Pathian zumlotu hrangah huat-umza khi a si ko.
#Minung khat le khat kan lungput danawknak ruangah kawhhran sungah, khuatlang ah, pawlkom sungah, innsungsang le rualpi lakah thilṭha kan tuahmi tampi cu a duhlotu pawl hrangah thinhennak men a si. Kan tuahmi a ṭhat lo ruangah siloin thilṭha a duhlotu hrangah cun mualphonak a si ruangah a si.
#Thilṭha tahnak hi minung in kan duhmi le duh lomi parah a ṭhumawk lo. Minung hin thilṭha duh ding kan si sawn. Mikip thinlung ah sia le ṭha thleidan thiamnak kan neihmi khi bumawk a theihlomi tahnak ṭhabik a si. Christian hrangah cun thilṭha tahfung ṭhabik cu Bible a si.
#Midang ih duhlonak ruangah thilṭha cu tuah lo theih a si lo. Kan tuahmi a ṭhat le ṭhat lo cu Pathian in thu a ṭhen leh ding a si. Bible cun, "Curuangah thil ṭha tuah hi ning hlah uhsi; ning lo teih kan ṭuan ahcun a caan a kim tikah rawl kan khawm ding a si. Curuangah a remcaan tik poh-ah zo hnen khalah thil ṭha cu tuah uhsi. A hleice in zumnak lamih kan sungte hnenah tuah uhsi," tiah in zirh (Galati 6:9-10). Thilṭha tuah uh si! Amen!
No comments:
Post a Comment