Showing posts with label Nun Zirnak. Show all posts
Showing posts with label Nun Zirnak. Show all posts

Thursday, 20 February 2020

2020 Kum Atu le Hmailam A Tihnung

2020 Kum Atu le Hmailam A Tihnung
January thlacem kan naih ih thlakhat kan siarmi leitlun harsatnak le buainak cu a rapthlak. Vun siar ve hmanh:
January 2 – Australia ram meikang ruangah minung 33 thi, rannung-ramsa 500 million / (1 billion) an thi tiah cozah in a rak than.
January 3, 7 – USA in Iran ralbawi Soleimani a thah sak ruangah Iran mipi siarcawk lo zuun tuarnak le ramsung buainak a mak.
Cuih ruakvuinak ih palthat mi 56 an thi, hliam tuar 200 hrawng an si.
January 8 - Ukraine vanzam Iran pawlih kap tuarin mi 176 an thi.
January 9 - ISIL ralhrang in Nigerien ralkap 89 an kapthat.
January 18 – Yemeni Civil War thubuai ah ralkap 111 hriam tuarin an thi.
January 21 – China ramih Wuhan coronavirus natnak tihnung in leitlun thla a phang ter.
World Health Organization (WHO) emergency meeting an to. Mithi, mina ziangzat ti kan thei cio ko khah, mi ziangzat thihnak a thlenpi pei maw! (Source: 2020 Wikipedia)
January 25 - Chin state thlanglam ih raltlan mi 1,800 a kim, Chin state milu umzat ruah ah riahsiatza a si. (Source: OHCHR)

Zumtu Tleirawl Fala (Kum 15) A Thahawk Hlan Thucah

Zumtu Tleirawl Fala (Kum 15) A Thahawk Hlan Thucah - Lessons for all family
Nunu, tuarhar ti fualfo cingin, na hrangah hi ca ka ngan laiah ziangtlukin na tuar a har ve ding ti ka lo ruat tuk.
Nunu, ka lo duhtuk ti i theihsak hram aw. Nungsal ding si ningla nang cu ka nu dingah ka lo hril thotho ding, kan innsang tla suahsemnak inn si dingah ka hril thotho ding. Hmansehla cuvek caan ṭha cu ka hrangah a um nawn ding si lo!

Nunu, ka tuarnatnak boruak in keimah le keimah control theinak thazaang ka neih nawn lo ruangah ka duh lozetmi (mah le mah thahawknak) ka tuah hi a si. Tuarsuak thei dingin thla 13 rori ka rak zuam ṭenṭo nain ka tlintawk lo ruangah a si.

Nunu-Papa, nannih cun in theithiam sak lo men thei, kei khalin ka lo mawhthluk ngam ve lo ding. Ka ṭapa neihsun David, anih cun ni nikhat ah a theifiang leh ding, atu cu a kum a no tuk lai.

Nunu, ka pa thawn in duhzet ruangah thilri tampi in leisak, in pek ti ka thei, asinan kei cun ka hiarhal ringring mi cu duhdawtnak a si. Ka duhmi hnak tamsawn tiangin thilri in leisak, ka rualpi pawlih theihdah lomi hmun ṭhaṭha le nuam ah lengsuak in vahpi, asinan ka thinlung in duhdawtnak ka khop lo thotho. Ka sinak vekten in duhdawttu, ka thinlung tuarnak i tuarpi theitu ka hlam ringring a si. A caancaan teih kan innsang kan hni tlang, kan nuam tlang caan pawl cu zuunngai tuar bangin ka thinnatnak a sisal ṭheu. Thilri tampipi in pekmi, in leisak mi pawlin in hnem thei lo a si, keimah lawng lileng umhar ringring cu tuar a har ko.

2019 THLATIN THUTHANG

2019 THLATIN THUTHANG
"2019 Kum Ih Thlatin Leitlun Buainak: Leilungpi Nikhua Siat Ṭihnung Dinhmun A Si Zo"
January 28: U.S. Justice Department in Chinese Huawei company daantat a thok.
February 27–28: Hanoi, Vietnam khuapi ah US president Donald Trump le N. Korean chairman Kim Jong-un veihnihnak an tongawk.
March 10: Ethiopian Airlines Flight 302, Boeing 737 MAX 8 a tlak ih mi 157 an thi.
April 15: Holy Week sungah, Paris ih kum 900 lenglo Notre-Dame Cathedral biakinn pi a kangziam ṭheh.
April 21: Sri Lanka hmun 8 (biakinn 3, hotel 4 le inn pakhat) ah bomb phuahnak a um ih mi 259 an thi, mi 500 lenglo hliam an tuar.
May 3: Kivu Ebola ruangah mi 1,000 lenglo an thi.
May 5: Russia khuapi Moscow ah Aeroflot Flight 1492 vanzam mi 78 tomi a tlak ih mi 41 an thi.

Thursday, 9 January 2020

Lungput

"Lungput"
Mi tampi ih theihpalhmi cu Christian lungput le minung lungput thleidan thiamlonak a si. Minung lungput hi a tlangpi in phunhnih a si tiah lungput lam mithiam pawlin an sim. Cucu (1) karhtawp lungput (fixed mindset) le (2) karhṭhang lungput (growth mindset) an si.

(1). Karhtawp Lungput (Fixed Mindset)
Karhtawp lungput a neitu pawl cun midang ih hleih ding, lan ding an phang ih an duh lo. Tlawngkaipi siseh, hnaṭuanpi siseh, member pi siseh anmah hnakih thiamsawn, hlawhtling sawn le thiltitheisawn an um tikah tuarnatnak an nei. Thupoi pakhat a um tikah kan dik maw_dik lo tihnakin kan neh maw_neh lo ti an thupi ter sawn. A poi betmi cu ruahnak pekmi, palhnak le thildik simfiang tik khalah an cohlang duh loih rem-awk an tum fawn lo. An pianpi theihfimnak, thiamnak le thiltitheinak an neihmi thazang pawl kha hitiang hi a tawk tiah an duhtawk-aw. Karh ter an tum lo, karhbet thei ding khalin an zum-aw lo.
(2). Karhṭhang Lungput (Growth Mindset)

"Man le A Man"

"Man le A Man"
Thilṭha mankhung zet hmang loih ret men mi, a um men mi hnakin a ṭul caan ih hman mi thil zaran te khi um man nei taktak a sisawn.

Minung khal Pathian ih hman mi kan si caan khi nunnak ih man a neihbik caan a si.
Mi zokhal nun man nei, mankhung le mi thupi kan si. A thupibik mi cu Pathian hman mi, hman theih mi le hman duh mi nun a si.

Mawinak, fimnak, thiamnak, lennak, hminthannak, titheinak kan neihmi a zaten Pathian ih hman mi si hram seh! Amen!

Zuk: Zoh tikah a sia zet zo nain hman rero lai mi asinak in man nei ah a cang. Pudu bazaar dawr pakhat ih hmian lai ka zukmi a si.

Man le A Man: October 12, 2019

Bualkhaw Minung Kumternak

Bualkhaw Minung Kumternak
Bualkhaw ah kum 70 vum kumter mi (50) val Pathian in nunternak muitsu a burhnak te angpi dang sising. Damnak, thinnuam angnak thaw Pathian in lamhuai sak reng sen!

Bualkhaw ah milu 800 val om sungpin kum 70 vum mi 50 lun om asita Bualkhaw mi kumternak heh atawn in minung (16) ah mi (1) kum 70 val nung ti theihnung si. Theidik dang a sing.

Tsin kum 70 vum mi 50 kawnvel lakah mipa le nupang dinmun pan phang (2/5) khennga a khennih bek mipa a si manin Bualkhaw ah nupang te kumter nung sawn si.

"Thilṭha tuah tikah Thiṭha lo do A Telcih"

"Thilṭha tuah tikah Thiṭha lo do A Telcih"
#Christian pawl ziangruangah hremnak kan tuar timi thu (5) ngan mi lakah, "thilṭha kan tuahmi tampi cu midang ih diklonak langter, doneh khi a si," tiah an ngan. Midang siatnak tuah cu asilonan Jesuh dungthlunnak ruangah thilṭha kan tuahmi tampi cu midang, khawvel mi le Pathian zumlotu hrangah huat-umza khi a si ko.

#Minung khat le khat kan lungput danawknak ruangah kawhhran sungah, khuatlang ah, pawlkom sungah, innsungsang le rualpi lakah thilṭha kan tuahmi tampi cu a duhlotu pawl hrangah thinhennak men a si. Kan tuahmi a ṭhat lo ruangah siloin thilṭha a duhlotu hrangah cun mualphonak a si ruangah a si.

Malaysia hi a sia ngaingai maw si?

Malaysia hi a sia ngaingai maw si?
Tuikum August thla ihsin thok Malaysia cozah ih siannak in (B4G) program ah (C.I) thawn ramdangmi 138,901 an tlungkir a si.
Immigration lam hotu ih sim vekin Indonesia mi (53,328), Bangladesh mi (38,734), India mi (22,964), Myanmar mi (6,923) le ram dangdang ihsin an si. Culak ah Chin mi tampi kan tel ve a si.
>
A liamcia kumthum lam ihsin 2018 June thla tiang work permit tuahsal dingih paisa thawn hmin aptu mi 744,000 an si. Asinan permit a ngahtu cu 110,000 lawng ti a si. Curuangah ramdangmi ngaihventu pawlkom hotu pawlin napin cozah an mawhthluk. Miphunpi rualpi mitheih hrekkhat pawl khal sumpai tampi cem nan permit ngah lo laklah an tel thotho.

Mi Zalen Single

Mi Zalen Single
#Single Sinak Phunthum
1. Nupi-pasal nei loih caan liam ruangah
2. Nupi-pasal ih thihsan hnu neihsal lo ruangah
3. Nupi-pasal thawn ṭhen-awk ruangah

#Single: Nupi-Pasal Neihlonak Phunthum
1. Single si dingih ruahcia sinak ruangah mihrek cu single sinak cu an suahpimi a si, mihrek cu nupi ṭhit lo dingah ciibel hlonmi an si, mihrek cu Vancung uknak Pathian hnaṭuan ruangah a si (Matt. 1911-12; 1 Kor 7:25-40).

Tlawngkai Lai Mino Pawlih Ṭulmi (7)

Tlawngkai Lai Mino Pawlih Ṭulmi (7)
1. Kawhhran Pakhat Pehzom Ding: 
Collage / University kai dingin inn le khua ih na kawhhran na suahsan ruangah pumkhawm na luat tinak a si lo. Na umnak asilole na tlawnginn thawn a naihbik mi Kawhhran pakhatkhat ah ṭhaten pehtlaih awla rualpi tla nei in mino lakah tel ve aw.
2. Bible Study Group ah Telve Ding:
Na tlawngkai pi lakah Khristian rualpi an um ve ko ding. Curuangah nan tlawng, umnak campus sungah Bible study/ Bible siar group a um zo asile telve awla, a um hrih lo asile rualpi sawm aw in thok cih tum aw.

Tuesday, 3 September 2019

Siar Cawk lo Kum Ka Siar

Siar Cawk lo Kum Ka Siar
Atu caan timi a um lo,... Atu kan ti laiah cuih caan cu a liam cih zo,... A liamcia caan le hmailam caan lawng a um an ti,.... Caantha kan hmang ngahmi zaten an liam zo... Pathian in caantha in pekmi hmang thiam uh si.

Caan hi zohman ih simfiang thei lomi a si,... Caan siarnak nazi khalin cuih caan cu cekci a siar thei lo,... Caan hminsinnak khal a siar thiamlotui hrang man a nei lo,... Caan siarnak sun le zan timi khal hi leilung kapkhat hrang a si,... Caan hi a liam rangtuk kan ti, taktak ahcun a kelte a si ringring.

Second khat hi siar malbik a si lo,... Second khat sungah veisarih ka siar man,... Second khat sungah voi siar cawk lo a um,... Second, minutes ti pawl hi a siar thiamtu hrang men a si,... Kei cun Pathian siardan in semtir hlan ihsin kum ka siar,... Curuangah ka suahcam ah siar cawklo kum ka siar!
(FB August 18)

"Pa Ni hi..."

"Pa Ni hi..."

1. Pa hi milian, mifim le a thiamthil tlintlaknak ruang lawngah upat si loin semnak, hringtu Pa a sinak ruang rori ahhin upat pek kan si. Cuti si lo sehla upat tlak lo mi Pa kan tamtuk. Bible cun Thufim 23:22 ah (A lo hringtu na pa ih thu ngai aw; Amah um hlah sehla na seem lo ding) tiah in sim a si.

2. Pa a si lomi pai' tuanvo a latu Nu pawl upat tlak an si. Pai' hnatuan a sawngtu zaten upat ding an si ve. Culosehla Pa Ni hi mikip hrang thil remcang lo mai a si. Mi tampi cu Pa veikhat khal hmu ngah lo, Pa ko dah lo (keimah vek) vonlai pai' thihsan mi khawvel ah kan tam tuk. Mi tampi cu sentet laiah pai' thihsan an si. Mi tampi cu Pa nung lai nan tong ngah hrih lo, pai' kut veikhat khal kai hrih lo ralhla ih thenawk an tamtuk. Mi hrekkhat phei cu Pa hman theih sian lo mi an um sisi. Hibangtuk fate hrangah Pa Ni cu ruahnak titamtu le thinlai kekkuai nak ni duhnung lo men a si.

Editing Age (Edit San)

Editing Age (Edit San)
Ziangkim hi edit san ah kan thleng.
Edit ti cu a umcia mi thil pakhat kha a ṭuldan vekin rem, tuahṭhat le a ṭulmi bet ih a ṭul lomi hlon khi a si.

Thinlung Edit: Ca le Video-zuk pawl cu a langlomi langtertu an si. Minung hi a langmi lenglam cu edit (makeup) a ol zet. Kan ṭul taktak mi cu thinlung editor Thlarau Thianghlim a si. Tisa duhnak cun lenglam a edit ih Thlarau Thianghlim cun sunglam a edit hnu ah lenglam a mawi ter, a thianghlim ter, a ṭha ter ih dik le famkim in a tuahṭha a si.

Video&Zuk Edit: Duh lomi hlon, duhmi zawn lak, a dangdang kom, color mawi terih cangan mawizet le music duhmi thawn video mawi le ṭha sersuak a si.

Rualpi Kan Hawl (Urgent)!

Rualpi Kan Hawl (Urgent)!
💞Fala le Tlangval tampi rualpi nei lo lileng in an tawivak. Duhmi an co na'n rualpi an nei lo. Degree an ngah na'n rualpi an nei lo. Tlawngkai rualpi le hnaṭuan rualpi lawng an neih ruangah tlawng ṭheh hnu le hnaṭuan bangh hnu ah rualpiawknak a cem vivo ih a rei cun nelawknak a mal ih pehzomawknak a cat. Lungawi riahsiat ṭawmpitu rualpi an hawl. Rualpi neih lo ruangah mi hrekkhat in zuu le ritsii thawn an hnemawk, siatralnak sawn a si. An ṭul taktak mi cu rualpi a si. 

🤴👸Milian zet le larzet hrekkhat cu rualpi an nei na'n an kawm man lo, caan an pekawk thei lo i poimawh caan lawngah an tongawk. Thunuam relpi ding, lenvah pi ding, nomnak le harnak ṭawmpitu taktak rualpi an nei lo. Curuangah mi hoklak vekin an tawivak i holam thil tete an tizok rero. Khikhi an aat thu men a si lo, rualpi an ṭul ruangah a si. Kiangnai ah dai theih rualpi a um lo ruangah le a um na'n caan an pekawk thei lo ruangah a si.

Saturday, 1 June 2019

A Netnak

A Netnak 
#Internet a siat ding
#Connection a siat ding
#Online um nawn lo ding
#Facebook tla a hlo ding
#Website zaten an cem ding
#WWW hman theih a si lo ding
#Leilung khal umnak a ṭha lo ding
Cutikah cun siar lo mi Bible an hlam ding
Zumlonak thinlung sualmawhnak a lang ding
Sirawknak caan ṭha a cem cuahco cih ding
Rinsan cencilh mi lei thil zate man nei lo ding!
#Biaknak muril tlansan tikah
#Zumnak ah ṭhang lo tikah
#Thutak ziangsiar lo tikah
#Leikhawvel ceen tikah
#Sual in a uk tikah
#Nun thar lo tikah
#Thuṭhen tikah
#Thihnak!

FB Post >> May 18 at 11:15 PM

Thursday, 9 May 2019

PAWLPI ITNAK

PAWLPI ITNAK

Khrih ah heh Pawlpi-a luu si (v.23). Jesuh kei it asile khaw Pawlpi it si sing. Pawlpi heh pawlkom menmen si ngawl. Nuam phang it, nuam ngawl phang haw theih nung ngawl. Pawlpi heh kei it tuh si.

Pawlpi in Khrih ah petsawm si (v.24). Pawlpi in Khrih vumah thu nei ngawl. Lu a si Jesuh upatnak le ultungnak pe sawn si. Pawlpi minung hem in Jesuh Khrih itnak thaw pum petsawm in Pawlpi it tuh si.

Thursday, 11 April 2019

TUARNAK LUNGAWINAK (TL&TA)

TUARNAK LUNGAWINAK (TL&TA)
Hitin a si, tui hlahah a hmin ka thei dah lo. Hruaitu pawl tharthawh pawlkomnak (retreat) ah rin lo piin a hmai (biang) na nawnin in ka khawng ngah. Zapi lek tlang caan ih tihrim si loin khawng pangmi asinan hruaitu kum no FALA ti fam cu in ngaithiam lo. Kei khalin thiamtawk ngaidam ka rak dil nain in hro ciamco ih a raak auhnawh sisin ruangah biakinn tual lam panin ka rak kiansan. A poizet lala mi pakhat cu hitin a si. Biakinn tual ka thlen ciah ah hruaitu lakih group hotu pawl le pastor pawl meeting le a ṭulmi tete hrilnak, ngankhumnak tuah laifang a si. Cuih program cu ka thei cia lo, zohman in in theihter cia fawn lo, cucu Pastor le ṭuanpi hrekkhat in a thoknak ka khel lo ruangah in mawhthluk. Kei khalin zamrang theitawkin an tuahzat le ṭhehzat tifel ka zuamsal ih hna cu ka lim.

Thursday, 7 March 2019

HNAHSAWL PHAH NAUHAK THLACAM

HNAHSAWL PHAH NAUHAK THLACAM
 
Kumhra a rei hnuah hitawk hmun hi ka thleng sal. Thutak sungih hmaisakbik ka rualpi (2) thawn Sunday sun khawm ṭheh tinten thla kan cam ṭheunak hmun a si. Hitawk ahhin camping kai lai le follow up sungih hrinthar sinak sung lamih Thlarau hnaṭuan mangbangza pawl kan rel ṭheu. Cun, ring theitawp in camping hlabu sungih hla pawl kan sak, aw neihtawp suahin thla kan cam. Khawsung ihsin a hlatnak tlang lehlam rawn hramlak a si ruangah mi ih theih ding kan phang lo, kan ning a zak fawn loih sinak zate thawn Pathian kan biaknak hmun a si.

"Innsang Kumruk Lungawinak"

Innsang Kumruk Lungawinak
A um lo um tertu
Pumhnih pumkhat tertu
Cung Pathian remruahnak
Nikhat hnu kumruk kim tiang
Fanau rilrah malsawm thawn
Innsang hruaitu Pathian thangṭhat!


Ni, Thla le Kum
Siar thok hlan ihsin
Kei cu kei, Anih cu anih
An fehnak lamzin tluanah
Ninu Thlapa thim le tleu cu
Sun le zan Pathian Thu a si!

Tuesday, 23 October 2018

SUNDAY

SUNDAY
1. Lai fala pawlih mawibik ni
2. Lai tlangval pawlih style bik ni
3. Nauhak hrangah Sunday School kai ni
4. Pathian hnatuantu pawl hrangah hnatuan tambik ni
5. Tlawngta hrangah tlawngpit ni le homework tuah ni
6. Fala le tlangval duhdawk hrangah tonawk remcang ni
7. Zuuva pawl hrangah ni zalen nomnak phunphun tuah ni
8. Mitha hrangah that sinsin ni, misual hrangah sual sinsin ni