TUARNAK LUNGAWINAK (TL&TA)

TUARNAK LUNGAWINAK (TL&TA)
Hitin a si, tui hlahah a hmin ka thei dah lo. Hruaitu pawl tharthawh pawlkomnak (retreat) ah rin lo piin a hmai (biang) na nawnin in ka khawng ngah. Zapi lek tlang caan ih tihrim si loin khawng pangmi asinan hruaitu kum no FALA ti fam cu in ngaithiam lo. Kei khalin thiamtawk ngaidam ka rak dil nain in hro ciamco ih a raak auhnawh sisin ruangah biakinn tual lam panin ka rak kiansan. A poizet lala mi pakhat cu hitin a si. Biakinn tual ka thlen ciah ah hruaitu lakih group hotu pawl le pastor pawl meeting le a ṭulmi tete hrilnak, ngankhumnak tuah laifang a si. Cuih program cu ka thei cia lo, zohman in in theihter cia fawn lo, cucu Pastor le ṭuanpi hrekkhat in a thoknak ka khel lo ruangah in mawhthluk. Kei khalin zamrang theitawkin an tuahzat le ṭhehzat tifel ka zuamsal ih hna cu ka lim.

Tlailam tlun cam a kim thlang ruangah Bus a thleng, group hotu ka si ruangah mi pakhat in tonak in kian ih hmailam tohkham ah ka to. Asinan tonak kan daihawk lo ruangah neta ih Bus sung a luttu a cuih FALA cu ka tonak hmun kianin ka to ter. Kei cu Bus khaltu ih kiangah sangka ban pawk (kai) phahin lenglam ah keimah lawing ka ding. Kan tlunnak lam hmunso ah lamzin ṭha lo thawn tlak ding phangzet cingin ralring te’n ka ding ko. Vansiat le malmak ah Bus lut thei ceo, tlem ciahciah in lamzin sirih thingkung tumpi a tlukmi in lamzin a kham kha phuduk tin ka hmu. Alah! Ka thih ni a kim ti lawng ka ruat man! Culeveten Bus feh cungin ka dawptla. Lamzin thlangah mal lai ka ril nain – Oh! Ka thi lo ti ka thei aw. Dawp lo ta ningla cuih thingkung tumpi le Bus karlak ah cepparh in thi cih ding khi ka si.

Zamrang ten ka tho ih ka lu ka vun tung, khua ka cuan, mit ka tang…ka hnukulh, ka ṭahsuak. Ziangahtile Bus cun in tlansan. Bus sungih to pawl hlasak phah, hnihsuah sai phahin an nuam tlang laifang a si tikah khatih vansiat ka ton khal driver telin ziangah in siar lo (an thei lo a bang). Vancungmi pawlin in kilhim ti lobak rel ding ka nei lo. Ka aw neitawp suahin ka au, kut thlirin ka zap rero nain Bus cun in tlansan thotho. Lamzin laih hnaṭuantu pawl khalin in seherh ih in tlansantu Bus kha an rak auh ve ciamco. Kei khalin thinnau lo tein thapi suahin ka dawi ve ciamco. Tawkfang ka dawi hnu Pangpar Hmuan hmun nuamzet kiangah Bus cu ka dawi man. Bus sung ka zoh, zohman an um nawn lo, Pangpar Hmuan sungah nuamtak in an vaak tlang ka hei hmu. Hliamhma thihnai pi thawn camkhat thu ka vun ruat. Midang tonak kianin midang remcannak hrang kut khat lawngin Bus sangka pawkih mi zawn ka ruah ruangah hitiih harsat kan ton hi an thei ko nan…tiah, asinan zohman ka mawhthluk lo.

Bus hmaiah ka ding, van lam zohin mit ka sing ih thla ka cam laifang ah ka umnak lam panih ra tlan rero mi pakhat mithlam ah ka rak hmu. Mangbang tukin mit ka mengsal, khua ka vun thlir ih mi pakhat in in ko rero ngaingai. Ka thisen, ka hliamhma le a tlekmi ka hnipuan pawl ka hngilh ṭheh, lunghmui zetin ka va vaih ve. Anih khalin mithmai pan ten ka kut i kai ih in pom. A lungawinak thu in sim; ziangahtile amah tonak kian in a zawn ka ruahnak a thei. Ngaidam i dil; ziangahtile amah tihrim loin a hmaibiang ka khawng pangmi ngaidam ka dilnak in ngaidam lo mi a sirawk sal. Kei khalin lungawi thu ka sim ve; ziangahtile harsat ka ton lai ah ka rinsan mi pawlin zianghman ah in siar lo, in thei sak lo laiah anih cun i ra pan ih i tuamhlawm. A mithmai ka hmuh tikah ka tuarnatnak zaten a damih ka thinlung ah lungawinak a khat. Anih khalin lungawi tuk mithmai thawn ka hmin cu TUARNAK LUNGAWINAK timi FALA ka si, nang khal TUHMI ATSAL tiin ka lo ko ringring thlang ding tiah in sim. Cutin Pangpar Hmuan sung kan thleng ve ih khua a vang.

Facebook>>March 26 at 5:43 PM