2020 Kum Atu le Hmailam A Tihnung

2020 Kum Atu le Hmailam A Tihnung
January thlacem kan naih ih thlakhat kan siarmi leitlun harsatnak le buainak cu a rapthlak. Vun siar ve hmanh:
January 2 – Australia ram meikang ruangah minung 33 thi, rannung-ramsa 500 million / (1 billion) an thi tiah cozah in a rak than.
January 3, 7 – USA in Iran ralbawi Soleimani a thah sak ruangah Iran mipi siarcawk lo zuun tuarnak le ramsung buainak a mak.
Cuih ruakvuinak ih palthat mi 56 an thi, hliam tuar 200 hrawng an si.
January 8 - Ukraine vanzam Iran pawlih kap tuarin mi 176 an thi.
January 9 - ISIL ralhrang in Nigerien ralkap 89 an kapthat.
January 18 – Yemeni Civil War thubuai ah ralkap 111 hriam tuarin an thi.
January 21 – China ramih Wuhan coronavirus natnak tihnung in leitlun thla a phang ter.
World Health Organization (WHO) emergency meeting an to. Mithi, mina ziangzat ti kan thei cio ko khah, mi ziangzat thihnak a thlenpi pei maw! (Source: 2020 Wikipedia)
January 25 - Chin state thlanglam ih raltlan mi 1,800 a kim, Chin state milu umzat ruah ah riahsiatza a si. (Source: OHCHR)

January 26 - USA California helicopter tlaksiat ah lekthiam hminthng Kobe Bryant le rualpi 7 an thi.
January 27 - Iran vanzam mi 150 phurtu a kepelh ruangah airport kiang lamkalai ah a cangsual. Mithi thuthan a um hrih lo. (Source: Fox News). Himi ni thotho ah USA raldonak vanzam pakhat Afghan ah ral pawlin an kap tla sak.
Culakah, 2020 sung Christian harsat tuarnak nasabik ding ram an hliakhlai mi cu a tanglam vekin a si hrih.
1. North Korea
2. Afghanistan
3. Somalia
4. Libya
5. Pakistan
6. Eritrea
7. Sudan
8. Yemen
9. Iran
10. India
China cozah khalin zumtu pawl hremnak nasasin in kutthlak a tum thotho. (Source: Pew Research Report 2020)

Kumthar ahkhan damnak, hlawhtlinnak, thansonak, lungawi daihnak, lam tluannak hrangah tin a thami lawnglawng khat le khat duhsaknak kan hlanawk ta a si kha!
Aw...Christian, zumtu. Kan zawh zomi le zawh lai dingmi lamzin, ton zomi le tonlai dingmi leitlun boruak hi a rit, a tihnung, thlaphanza taktak a si.

Pathian zumfeknak, kawhhran le biakinn tlaihsannak, Christian nun ah hngetkhohzet in hmainor tlang uh si. Pathian kilvennak in na nun lo himter hram seh! Amen!

Bible siar: "Zumnak sungah kan um maw um lo ti theih fiangnak ah nanmah le nanmah cekaw uh. Jesuh Khrih kan sungah a um taktak nan ti thei maw? A um taktak lo a si ahcun nan cekawk tikah mi hlawhtling lo nan si." 2 Korin 13:5

©Amoschinbk January 26 at 11:23 PM