Jesuh Ruangah Lawngfangkheh, Lu Metfai le Hmin Hlonsak mi, "42" tiih An Kawhmi Korea Nu ih Tuarnak

Jesuh Ruangah Lawngfangkheh, Lu Metfai le Hmin Hlonsak mi, "42" tiih An Kawhmi Korea Nu ih Tuarnak

Ka hmin “Thawngtla 42” tiah in ko. Thawnginn ka thleng leveten a hmaisabik ah ka suahkeh hmin in hlon sak. Zing nazi 8 tinten “42” tiah in ko. An hnen ka thlen theinak dingah Zawhte bangin kut le khuk bil cingin a bok in ka feh. Ka ding thei caan um sun khalah ka lu ka kuun, kut in khihtu palik pawl in zoh siang lo.

Nitin ten ka tuarmi cu a kel ringring in a har. Ka kut dunglam ah sihin palik dung ka thlun hnu thusuhnak inn khan sungah nazi pakhat lai hitin thu in sut ringring.

Ziangruangah Taluk ramah na ra? Zo thawn nan tongawk? Biakinn na feh maw? Bible na nei maw? South Korean pawl na tong dah maw? Zumtu Khristian na si maw?

Khristian ka si ka thei aw. Jesuh ka duhdawt. Asinan ka phuang ngam hrih lo. Tuluk zumtu pawlih bom mi ka si thu tla sim ningla in that ko ding. Hmmm! Thu in suhmi “Aw” tining la thah lawng ka hmabak, in that tengteng ding.

Nitin in vuak, in sit – ka hna khatlam khatlam in beng ciamco lai kha tuar a harbik. Ka hna sungah in benghnak a natuk, in benghnak awn nazi pali sung tla a ring, nikhat tla a rei – cucu tuar a harbik, a nabik rori ko.

Zanlam ni a liam cun, thawnginn sung lamah in hruaisal. Ka umnak thawnginn cu sun ah a sazet, asinan zan cu a daizet lala. In kharkhumnak khaan cu a bizet ka zau thei ceoceo a si, cunah vei tampi cu ka it thei lo. A hrimhrim ah hramhram in khulbil ih to lawng in siang, khuk sihcin in a si – khuk daiawk lo ih to in siang lo.
Aw… ka sinak, ka dinhmun ka thei. Zumtu Khristian ka si ve hi!

Kan ram ei-in harsatnak paam a tlun laiah innsungsang pumcawmnak hrang ruatin China ka rak thleng ve. China ram ka um laiah nikhat cu rin lo pi’n mawṭaw dum pakhat ka dunglam ah a cawl. Lamzin fehnak ding i sut tum si ko ding tiah ka rak ruat. Asinan mawṭaw mawngtu le midang an ṭum ih in kai cih. Ka tha neihtawp suahin tlansuak ka tum, asinan an mawṭaw sungah in tul, sangka an khar ih in tlan pi. Culeveten ka cem thlang ti ka theiawk.

China thawnginn ah zarh malte in ret hnu, North Korea thawnginn ah in thlen. A nikhatnak ah ka hnipuan zaten phoih in fial, ka taksa pum zaten in check, thil pakhat khat - paisa ken thup mi a um pang maw ti an hawl a si bik.

Thawngto hmaisa pawl ih hnipuan sia tanmi tawk le tawk lo khalin in hruh ter. Ka lu in met kawng sak. Thawnginn mahlawng khaan sungah in um ter. Cutawk ah ka tuah thei umsun cu THLACAM a si. Midang thawngtla pawlih hrum-ainak ka thei, zohman hmuh theih an si lo. Ka tithei sun thlacam le thinlung ten hlasak lawng a tang. Aw ring a ngah lo, curuangah hitin thinlung te'n hla ka rak phuah;
“Ka thinlung in Pa Pathian ka lo ngai, Thutak lamzin cu a har ih a fiak sisi, Tuarnak phen-ah tleuvarnak a lang ding, Zumnak lo cun beidonnak hmakhua a va pit so, Ka hmai ih thimnak phardawl hi in lanpi hram aw, Tuarnak le mangbangnak a tam ding zia cu, Ziangtinso ka Bawipai’ keneh ka thlun thei ding, Ka thinlung zaten Pa Pathian nangmah ka lo ngai, Kei misual ih thlacamnak in cohlang hram aw, Na ralhruang in in kulhvel hram aw, Na thladem hnuaiah daiten in cawl ter hram aw, Van lam in na aw in thei ter awla ka nunnak nitin thlawsuahnak ah in hruai hram aw.”

Atu hitin kumkhat a liam thlang. Kum ziangzat a rei lai ding ka thei si lo. Hitawk ahhin ka nunnak a cem leh ko ding. Cutikah ka ruak an lak ding. Neta thawngthlak mi hnenah ka hnipuan sia te tla an pek leh lala ko ding. Ka umnak thawnginn khaan luahtu cu “Prisoner 42” a si ve ding. Kei cu hitin nitleu themte hman hmu ngah loin tuar hrih ko ning!

Hminsin: Open Door USA thuthang report mi a si. A peh ngan lai ding a si. North Korea hi leitlun ah zumtu hremnak nasabik ram a si. Zumtu 300,000 lenglo an um, 60,000 hrawng cu hremnak hnaṭuan khung ṭuanin kaihmi an si. Thlacam sak uh si.

Posted: October 11, 2019; October 15, 2019