BIAKINN LAMZIN

BIAKINN LAMZIN
Tusan Khristian mino pawl ziangruangah biakinn an pan duh lo, biakinn an thleng lo, an khawm lo?
Mino kum 20-30 karlak pawl biakinn an thleng theilonak thu hitin an sim:
~ 34% cun tlawngkai ruangah an ti,
~ 32% cu soisel le relsiatnak a tam ruangah mipi ton an duh lo,
~ 29% cun biaknak lam rualpi neih lo ruangah biakinn an ngaina lo,
~ 25% cun kawhhran thuzirhnak le fehdan an lungkim lo ruangah khawm an paih lo,
~ 24% cu hnaṭuan buai ruangah biakinn an thleng thei lo.
Hihi LifeWay Research hnaṭuantu pawlin 2017 US ramsung kawhhran mino dinhmun an zingzoimi a si.

Laimi (Chin) Khristian mino dinhmun teh, ziang kan bang? Ramsung um pawl cu biakinn a thlengtu a ṭhahnem deuh ko ding. Ramleng um lakah: Singapore, China, Malaysia ih um pawl cu thlakhat veikhat biakinn thleng lo an tamsawn pei maw? USA, Australia ih um pawl teh thlakhat veikhat biakinn thleng lo an tam thotho ko ding. Curuangah kawhhran in biakinn area (compound) ah hitin hnaṭuan hmalak sehla:
1. Lehpannak (Sport)
2. Awnmawi (Music)
3. Media: Calai, Zuk, Audio, Video...
4. Ceimawinak (Fashion)
5. Sumpai-bulhram ṭhansonak (Business)
6. Harhdamnak (Health)
7. Bible le biaknak thu zirnak

Hi pawl hi biakinn sungah tuah ṭheh ding tinak a si lo. Himi pawl biakinn compound sungah asilole khawhhran in hmunhma tawlrel in biakinn lamzin ah mino pawl Bible thawi mil-aw in kaihhruai ṭul san kan thleng a si.

Mino pawl biakinn pan uh si. Biakkhawmnak hmun pan uh si. Pathian biak caan pek uh si.
@Amoschinbk ·BIAKINN LAMZIN: October 20, 2019