Chin (Laimi) Boruak Vanduainak le Mipi Aihramnak Lawrkhawm 2015

Chin (Laimi) Boruak Vanduainak le Mipi Aihramnak Lawrkhawm

(Myanmar ram sungah mi 1,350,000 in harsatnak tong, 297,000 suahsan...)

Sankhat thuanthu a dai nawn lo dingmi July-August 2015 Chinmi ih tonmi vanduainak hi ttah le riahsiatnak a si.

Abik in July 26 ihsin August 2 tiang Bangladesh, Myanmar, le India nisuahnak lam ah Cyclone Komen (75 km/h (45 mph speed) thlisia cun ruahpi nasatak a surter. Sun le zan cawllo ih ruahpi sur ruangah Leimin le Tilian in mipi harsatnak a thlenpi.

Chin Ramkulh ah sunralnak tonmi cazin tlangpi August 8 ah Ramkulh cozah ih tarlangmi cu a tlanglam vekin a si.

A hmin               Inn/a zat  Aman (Ting)
Tlawnginn           49           1303.9

Biakinn                16          1109.5

Cozah inn            28           344.1

Bulpak inn           1812       2548.1

Lamzin                105         3309.81

Lilawn                 73           1606.15

Fanglo le tlanglo ekah 1707 305.104

Hakha lawngah Biakinn (10) leimin ruangah a siat ih (2) cu hman theih dinhmun ah an tang nan a dang (8) cu luh ttha an si nawn lo. -(The Chinland Post, August 11)

Tilian le leimin ruangah

Chin Ramkulh sungah mi (6) an thi tiah August 11 ah The Chinland Post cun a tarlang ih innsiat tambiknak Myone cu Paletwa ke Hakha an si.

Hakha ah Leimin ruangah innkhi (1,572), mipum (7,417) pawl cu inn suahsan in beunak inn dangah an um. Inn siat hi (620) luan a si. Inn siat lo nan leimin ttih ruangah um ngam nawnlo mi inn a tamzet.

Paletwa peng ah Tilian le leimin ruangah inn a siatmi (925) a si. Matupi ah inn (18) tla theihbawn tawk a si tiah The Chinland Post cun August 7 ah a tarlang.

Falam peng sungah khua (89) in harsatnak tong in inn siatzat (94) le harsatnak tuar innsang (1,337), mipum (7,128) an si.

-(Vancung Thailio, VCTH -August 15)

Tedim Myone le Tonzang Myone ah inn siat (199) a si.

(Tedim Youth Fellowship, Tedim, August 6).

Rezua le Zotung khal ah Leimin ih siatsuahmi inn (20) leng a kim.

-(Chinland Guardian, August 2).

August 11 tiangah Chin Ramkulh sungah inn suahsantu innsang (1,893), mipum (9,177) an kim zo. Inn siat, lamzin siat le loram siatsuahmi cazin pawl hi khawlkhawm rero lai a si vekin hihnak in tamsawn ding khal zum a si.

(Kanmah Lawng Kan Si Lo: Rampi Huap Tuarnak le Innhnen Ram pawl ih Tonvemi Vanduainak)

------------------------------------------------------------------------------------------------------------------------------

Sagaing, Mandalay, Kachin, Shan Sate pawl ah inn siat (17,000), harsatnak tong minung (100,000) leng a si tin Xinhua thuthang cun July 28 ah a tarlang zo. 

-(xinhuanet.com, July 28)

Rakhine ramtthen lawngah umnak neilo 140,000 an um. Myanmar rampum huap ah mi 200,000 hnak tam harsatnak tong in bom `ul an si tiah UN News Center in August 3 ah a than zo.

UNICEF cun August ni 7 ah update cazin an tarlang sal ih mithi (88), harsatnak tongtu (330,000) a si zo. Cumi lakah nauhak (112,000) a si tiah a tarlang bet. 

-(unicef.orf, August 7)

August 14 ah OCHA le NDMC cun Myanmar rampum huap siatsuahmi update an tarlang salih harsatnak tuartu mi 1.3 millions (1,350,000), ei-in tlasam mi (435,000) le inn suahsanmi (297,000) a si zo. Loram siatmi 773,000 acres a si. 

-(Myanmar National Natural Disaster Management Committee (NDMC), United Nations Office for the Coordination of Humanitarian Affiars (OCHA), August 14)

Inn hnen ramri pawl ah Tilian le Leimin ih siatsuahmi hi a tam ve zet. India’s National Institute of Disaster Management (NIDM) ih tarlanmi vek asile: West Bangal ah mi (186) an thi, harsatnak tuartu mipum (4,714,514) ih inn siatsuahmi (38,132) le siatsuahmi khua 904 a si. Manipur ah mi 20 an thi.

-(weather.com, August 5)

Vietnam khal ah July 26-August 5 tiang siatsuah a tuarcu cazin hi UN ih report mi ah mithi (16), inn siatsuahmi (3,788) a si ve.

Nipel khal ah khua tamnawn siatsuah an tuar ve ih mi (30) an thi.

-(weather.com, July 30)

Pakistan ramsung lawngah 1.6 millions in harsatnak an tong. Mithi (210), inn siat (18, 241), khua siat (3,491) tla an si. -(OCHA, August 12)

Bangladesh, Myanmar, Pakistan, India, Nepal le Vietnam ram ruk ah mithi (493) an si. 

-(weather.com, August 5)

Typhoon thlisia cun Sapain, Taiwan, Japan's Ryukyu Islands le Southeast China ram pawl ah nasatzet a siatsuah ih mi (25) leng an thi, inn le lo tampi siatsuah a si. Cuih Typhoon thlisia cu a cak sinsin lai ruangah ttihnung dunhmun a si. -(weather.com, August 14)

Leilung ih milai tambik umnak China ramsungah thli bal le hnawmbal a phunphun ih suahpimi natnak pawl ruangah kum khat sungah minung 1.6 millions an thi tiah zingzoitu Berkeley Earth group cun a than. Cumi cazin zoh tikah nitin ten mi (4,400) kiangkap an thi ringring tinak a si. Thli bal ruangih thi hi 17 percent a si. -(weather.com, August 14)

Ngansual le hrelhmi siseh, cazin diklo siseh a um thei, update sal ding a si.

-Amos Uk Mangbk