(Ka seherhzet mi Julianna ih damlonak hin casiartu na nunnak khal thazang pek hram seh!)
Sii ih dam ter thei nawnlo mi Julianna (kum 4), Pathian rinsantu le theifiangzet tu cun inn ah nuamdai ten ka thi sawn ding tiah a nu (Michelle Moon) le pa (Steve Snow) hnen ah a dil.
Michelle: Julianna, na natnak a suaksal pang le siizung fehsal na duh maw inn ah um na duh sawn?
Julianna: Siizung ka feh duh lo. Ka hnar kua ih NT pipe khal ka ning tuk zo.
Michelle: Inn ih um na hril cu Vanram thlen (thi) ding na duhsawn tinak maw, ka fa nu?
Julianna: Aw, a si ka nu.
Michelle: Na nu le na pa kannnih thawn kan fehtlang hrih lo ding pi, nangmah te lawng fehsung ding na duh ko maw, ka fanu?
Julianna: Thinphang hlah aw, mahlawng in ka um lo dingpi, ka nu. Pathian in i umpi ko ding.
Michelle: Siizung na feh ahcun na dam deuh ding ih inn ah tla na tlungsal thei ding,
hmunkhat ah kan umtlang thei sal ding. Fa nu, cumi cu na theithiam ko tiaw. Siizung na feh ahcun Nu Nu le Pa Pa thawn kan umtlang thei hrih ding ual, na theithiam maw?
Julianna: Ka theithiam ko ka Nu.
Michelle: (Ṭap phah in) - Julianna,... ziang na cang. Ka ṭahhnawh hi na duh lo ding ti ka thei si, asinan ka lo ngai dan ding cu, in thei sak aw maw.
Julianna: A ṭha ko, ka Nu. Pathian in in umpi ko sokhaw, ka thinlung in Amah thawn pawlkomnak ka nei zo. !!!
A tlun ih biakawknak hi Julianna duhdawtzet tu a nu Michelle Moon in a fanu in siisung feh duh nawnlo thu le Vanram thlen ding hngakhlap zia a ngan mi a si. A natnak hi Charcot-Marie-Tooth disease (CMT) timi a si.
“Siizung fehsal ding cu a duh hrimhrim lo. Curuangah amai’ duhnak lungkimpi dingah kan tum ko, a zumnak le a duhnak thlunsak hi kan duh ko, tiah Michelle Moon in CNN ah a sim.
Julianna cu Oregon-Portland ih City Bible Church ah Sunday School kai ringring tu a si. Asinan tu ahcun a damlonak ruangah Sunday School khal a kai thei nawn lo. A nunnak hrang rawl khal a ei thei nawn lo. (Ka thinlung in a hrang thla ka cam, nang teh?)
A nu le pa in Julianna cu Vanram ih um dan le nom dan ding pawl an sim ṭheu. “Van ram ahcun Pathian hnen ah kan um ding, Pathian cun kanmah nu le pa ai in a lo duatzet ding. Leknak a phunphun thawn nuamzet in na lek ding, na tlan ding, na dawp ding, na duhmi na ei ding ih Pi Pi tla na va tong ding,” tiah nu le pa cun an fanu Julianna cu an hnem.Julianna ih tuarmi natnak phun hi Ameriacan nauhak 2,500 ah pakhat hrawng ih vei mi natnak besia zet phun khat a si.
_______
Hih kan nau nu te (kum 4) ih zumnak hin Christian mi tampi ih thinlung ah zumnak a hnget ter ih mi nun a ṭhangharh. Pathian theifiang le zumnak fiang nei thei dingah a nu le pa ih zirhnak khal hi kan cawntlak Christian nu le pa ih ṭuanvo a si. Kan naunu te a damsal ah siseh, a nunnak cu amai duhhril vekin inn ah a cem khalah siseh, Pathian in a sunlawinak hrangah hmang hramseh tiah thlaza ka cam. Amen!
-Christian Headlines, CNN, Daily Mail
No comments:
Post a Comment