KAWHHRAN LE MINO

KAWHHRAN LE MINO

Pangpar ih mawinak cu a kung ah silo in a parnak ah a si sawn. Cuvek in kawhhran ih mawi nak cu mino pawl an si. Pangpar cun harhdam ten a par lo ah cun mawi ding vek in a mawi thei lo. Kawhhran ih mino pawl tla an dam lo ahcun Kawhhran hrang ah mawi ten an par thei ve lo. Curuang ah a harhdam mi pangpar in mawiten a par thei bang in Kawhhran mino pawl an dam ahcun mawiten Kawhhran hrangah an par thei ve ding.

Kawhhran timi cu

Kawhhran timi cun ‘A hran teih kawhmi mi thiangpawl’ khi a sim duh mi a si. Pathian in a mai mithiang pawl si dingah Jesuh Khrih sung ihsin a kawhsuak mi mibur, pawlkom khi a si. A hran ih kawhmi kan ti tikah
Pathian ih thleidan nak thu silo in zumtu cu tisa mi lawng sinawn loin thlarau mi sizo nak sawn kha a si. Ziangah tile Pathian in milai hmuahhmauh bangran in a duhdawt hai ih Jesuh Khrih ah in hawl, kawh nak thu Bible ca in a sim fiang. 

Jesuh Khrih sung in Pathin ih kawhnak a cohlang tu mi hmuahhmuah cu Kawhhran mi siding ah Pathian in tumtah nak a  nei. Curuangah zumtu  diktak cun kawhhran thawn

hngetzet in pehzom nak a nei ringring ding. Paul in Kawhhran cu Jesuh Khrih ih ruangpum thawn tahthim  in a simfiang. Jesuh Khrih cu kawhhran in lubik (thunei tubik)  a si. Kawhhran cu milai pawl ih dinruangah a cang rero menmi a si lo. Curuangah kawhhran cu Jesuh Khrih ta a si. Milai ih duhdan vek in din rero men ding a mawi lo. Jesuh Khrih ruangpum a simi kawhhran cun ruanghnge tampi a nei ih cuihmi lakah mino  pawl tla kawhhran ih kut, ke kan si ve. 

Kawhhran Hrangah Mino

Mino tampi cun kawhhran hi thupi ah ruat loin buaipi lo theu. Christ zumtu mino hrangah cun khawhhran hi leitlun ih hmunhma thupi bik a si. Kawhhran hnatuan nak le pawlkom nak umlo bang sehla umkhua a vahar awm e. Kawhhran hi mino hrangah nun humhim tu tiseh la a sual lem lo. Ziangahtile zumlotu hrangah cun zarhpini (Sunday) hi man (cawl) caan le duhduh tuah caan a siih titsa hiarnak pawl tuahni tla a si. Asinan zumtu cun cuihni cu Ni Thianghlim ah hman a si tikah tisa duhhiarnak tuah ding a rem nawn lo. Cucu zumtu (mino) pawlih hlawknak   a si. 

Kawhhran neitu Jesuh Khrih in mino pawl a tul tihi hngilh siang hlah uh si. Kawhhran ah (Jesuh Khrih) a hmel mawiten a lang ih a famkim theinak dingah (mino) kan  caan, fimnak, cahnak, le sumpai kan siangmaw? Maw mino! Kawhhran hrangah tiin seherh nak na neih le milai zoh loin Jesuh Khrih lawng cuan in a tul mi cu tuan mai aw. Milai na zohpang le na tha a nau ding. Ziangah tile palhnak tampi thawn mi fam kimlo  hlir kan si.  

Nu le pa pawl in teh kan fa nu, fa pa pawl kawhhran thanso nak hrang hnatuan ding kan forh dah maw? Thu lawng in forhfial rero ih fa le mino pawl ih caan pek in kawhhran ah hnatuan tik ah a phunzai tu kan si pang maw? Duhsak taktak nak thawn thla kan cam sak maw? Nu le pa tampi cun man tiklawngah fale pawl kawhhran hna tuanter kan duh. Fa le hi Bawi pa’h lak sawng an si ti kan thei ko nan a mai hrang hlan sal dingah kan phurh a rit pang maw? Mino pawl in kawhhran ah an nuam theinak dingah cun nu le pa pawl ih thazang pek nak tam tu an tul. Ziangah tile kawhhran khal in mino pawl a tul ve. 

Mino Hrangah Kawhhran

Caan cu thlengawk lo hmanseh la, kan san a thlengawk rero bang in kawhhran sungah mino pawl ih hmunhma tla a danglam rero. A liamcia kum 20/30 lai ih kawhhran mino pawl le a tu mino pawlih hmunhma a bangawk thulh thei nawn lo. Hlan ih zuamdah mi pawl cu a tu ah cu zuam  an si nawn lo. Cuvekin a tuih zuammi pawl tla hlan ah ruat hrihlo mi tla an si thei. Hlan mino pawl cun kawhhran hnatuan nak le cangvaih nak cu mai bul hna vekin an ruat ih an tang tha. Hla sak an paih ih an thiam. Hnatuan an zangzel lo. Hruai tu ih hruainak ah lungrual ten hna an tuan tlang thei. Kawhhran thanso nak hrang hnatuan an paih. Kawhhran ih tulsamnak tinah pumpek in hnatuan an ngam. Curuangah Mino hrangah kawhhran cu a sunglawi. Duhthusam kim nak hmun a si. 

A tu kan san ah cun kawhhran tampi ah mino pawl thangzang derdai nak a lang.  Kawhhran sung ah mino a mal vivo. Mino tampi in kawhhran an thupi ter thei nawn lo. A san hawl haisehla a mal lo ding. Kawhhran in mino pawl a thupit ter velo ruang ah tla si thei. Kawhhran in mino pawl ih tulsam bikmi thlarau rawl khop zet in a fah lo ruangah tla a si thei. Hruaitu pawl ih hruaiawk daan tluangtlam lo ruangah tla a si thei. A thupi bik cu Pathian thu ah lungrual thei lo ruangah, lole Satan ih nehsawh nak ruang ah tla a si thei.   Kan san hi pumcawm nak hrang le maih tulsam nak hrang caan daihtawk lo san a si tik ah midang (kawhhran) hrang hnatuan ding cu thil har zet cu a si ko.  

Maw mino! Kawhhran na duh dawt maw? Aw Kawhhran! Mino na duh dawt maw? Kan duhdawt awk a sile lungrual ten kan fehtlang pei uh. 

-Amos Uk Mangbk