Thursday, 9 January 2020

Thlacam Karbak (4)

Thlacam Karbak (4)
#Pathian_Thangṭhat_Uh_Si
Pathian a sinak thangṭhat uh si; Rundamtu a sinak thangṭhat uh si; A cahnak le huham ruangah thangṭhat uh si; Mangbangza a tuahmi ruangah thangṭhat uh si; Sersiamtu Pathian a si ruangah thangṭhat uh si.

#Kan_Ṭulsam_mi_Dil_Uh_Si
Ziangkim Amai’ ta a si ruangah dil uh si; Kan ṭulsam mi pe theitu a si ruangah dil uh si; Dilmi pek dingah thu in tiam mi a si ruangah dil uh si; Kan hrang thil ṭhasawn theitu le remruattu a si ruangah dil uh si; Kan ṭulsam mi a theicia na’n kan dilnak ngaitu a si ruangah dil uh si.

New Zealand ah Khristian Ṭumsuk: 2019 ah Non-Religious Tambik

New Zealand ah Khristian Ṭumsuk: 2019 ah Non-Religious Tambik
Khristian tambik a rak si dahmi New Zealand ram cu biaknak hrimhrim a cohlang lo (no religion) pawl an tambik tiah TVNZ thuthang in September 24 ah a than.

2013 ah Khristian hi 47.65 percent asinan tuikum ahcun 37.31percent rori tiang a tlak. 2018 ah biaknak cohlang lo mibur hi 48.59 percent an kim, 2013 ahcun 41.92 percent lawng an rak si dah.
2013 ihsin 2018 biaknak mipum karhdan cu Sikhs biaknak 19,191 ihsin 40,908 karh, Islam biaknak 46,149 ihsin 40,908 le Hindu biaknak 89,319 ihsin 123,534 tiang, Khristian siar lo biaknak dang pawl an karh fingfing a si. (Source: https://www.tvnz.co.nz/one-news).

Ziangruangah Santhar Christian Mino An Ṭumsuk?

Q&A – Thusuhnak & Thulehnak (I)
Ziangruangah Santhar Christian Mino An Ṭumsuk?

1. Kawhhran daan ih ṭul tengteng mi khal siloin cangvaihnak, mi thu cawngih cawngmi a tamtuk tikah nun lem a karh vivo. Cangvaihnak tinah thu lawng a ngah lo, sumpai a ṭul. Sumpai ngah theinak dingah Kawhhran cu bazaar vek thil zuarnak le leiba cawhnak ah a cang. Sumpai semrel mi pawl tla cun biakinn ih khawm hnakin tohmun le tappi ih video, audio thawn sermon ngai hi hlawksawn ah an ruat. Ziangahtile biakinn thlen cu fund hawlnak ticket, mission hrang, harsa bomnak hrang tvp a tamtuk. Cucun biakinn cu sumpai nei lo deuh le sumpai semrel mi hrangah khawm ding hreh-um in a cang. A muril thlarau le thutak thu ngaihven hnakin Fund hawl le sumkarh balance ah kan buai ta rori. Theihthiam a harmi thlarau lam ṭumsuknak kapkhat a si.

AN PALH A SI LO MAW?

AN PALH A SI LO MAW?
Chin mi Pathian thusimtu tampi in piangthar le piangthar nun an palh a si lo maw? Piantharnak thu an sim tikah piangthar nun an sim ṭheu. Curuangah mipi kan vaivuan. Piangthar hrih lo pawlin piantharnak hi piangthar nun nei ah an ruat, an buai, piangthar thei dingin an zum aw lo.

Mi piangthar cia khal thusimtu hrekkhat in piangthar hrih lo ah an can ter. Piangthar hrih lo khal an duh tikah mi piangthar ah an siar. Piantharnak le baptisma tla an rawi. Baptistma lak hi piantharnak a si lo an ti nan an duhmi cu piangthar le thar lo thei cuang loin hlawknak hrangah baptisma an pek thotho.

Riahsiatza India Christian Pawl Hremnak

Riahsiatza India Christian Pawl Hremnak
September 8, Open Doors USA thuthang ih a than mi vekin tulaifang India ram ih Christian pawl Jesuh Khrih dungthlun an sinak ruangah tidai phihsak, rawl lei sianlonak, tlawngkai sianlonak le thlankhur man kaihnak pawl tla an tuar laifang a si.

India ah Christian hremnak a sosang sinsin, ziangruangah so?
2014 ah Christian hremnak nasabik ram (28) nak asinan 2019 ahcun ram (10) nak rori a si. 2018 sung lawngah Christian hremnak vei (775) a um; thahnak (14) a um, hrem tuartu mi (50,819) an siih mipa (18,956) nunau (18,858) le nauhak (12,790) an si.

Hitiih thil umdan zoh tikah 2014 ihsin 2018 karlak hi India Christian pawl hremnak a sosang sinsin ti a lang. Christian le biaknak tenau deuh nunau tampi cu hramhram ih ihpi an si, cucu hremdan phunkhat ah an neihmi a si.

“BIBLE SUAL”

“BIBLE SUAL”
“Bible Sual” hi (Wicked Bible, Adulterous Bible, Sinners’ Bible) tiah kawh a si. King James Bible suah salmi a siih kum 1631 ah Robert Barker le Martin Lucas in London khawpi ah an suahmi a rak si.

Ziangruangah Bible Sual tiah kawh a rak si tile cuih Bible sungah Thukham (10) sungih pakhat ngansual ruangah a si. Cucu Suahlannak 20:14 ah “Ṭangṭawm sualnak nan tuah lo pei” timi zawn ah “LO” pakhat ngan hrelh ruangah a si. Mirang in “Thou shalt not commit adultery” tiih ngan ding asinan “Thou shalt commit adultery” tin ngan sual a rak si. Cucun, a sullam cu “Ṭangṭawm sualnak nan tuah pei” tiah a letling ta riai!

Control Ka Lo Pek (I Give You Control)!

Control Ka Lo Pek (I Give You Control)!
~~~~~~~~~~~~~~~~~~~~~
MMID nehzul, MM Election hrang timlamnak, AA ralbuainak, Australia Meikang, US-Iran buainak pawl thawn January kan lut tlang. 

Veikhat cu ka tomi taxi driver lamzin a fehsual ruangah thlen olnak lamzin i sut, ka theihtuk mi lamzin ti nana cu ol ten ka sim thei. Cutin tluangten tikcu tlai lo ten kan thleng thei. Taxi cu ka mawng lo nain diver cu ka control ko.

US le Iran Buainak Christian Tlang-au

US le Iran Buainak Christian Tlang-au
•••••••••••••••••••••••••••••••••••••••••••••
Nan thei maw, US><Iran buainak le leitlun ralpi hnakih a tihnung sawnmi ralpi cu SUAL ral a si. SUAL ralpi cun meithal, cerek le ralthuam ralhriam a keng lo. Veto power neitu ram lal a simi Trump, Putin, Boris, Philippe, Jinping pawl khal a ngam tuk. Sual sir lo le sualnak tuah man cu thihnak a si Rom 6:23. 

Trump cun US cozah le a ralkap pawl thu a pek thei. Cozah rambawi pawlin anmai' ramri sungah thu an nei. Kan Pathian cun ziangkim, miphun hmuahhmuah tlunah thu a nei (Saam 22:8).

Tuesday, 3 September 2019

Siar Cawk lo Kum Ka Siar

Siar Cawk lo Kum Ka Siar
Atu caan timi a um lo,... Atu kan ti laiah cuih caan cu a liam cih zo,... A liamcia caan le hmailam caan lawng a um an ti,.... Caantha kan hmang ngahmi zaten an liam zo... Pathian in caantha in pekmi hmang thiam uh si.

Caan hi zohman ih simfiang thei lomi a si,... Caan siarnak nazi khalin cuih caan cu cekci a siar thei lo,... Caan hminsinnak khal a siar thiamlotui hrang man a nei lo,... Caan siarnak sun le zan timi khal hi leilung kapkhat hrang a si,... Caan hi a liam rangtuk kan ti, taktak ahcun a kelte a si ringring.

Second khat hi siar malbik a si lo,... Second khat sungah veisarih ka siar man,... Second khat sungah voi siar cawk lo a um,... Second, minutes ti pawl hi a siar thiamtu hrang men a si,... Kei cun Pathian siardan in semtir hlan ihsin kum ka siar,... Curuangah ka suahcam ah siar cawklo kum ka siar!
(FB August 18)

Khuai hi

Khuai hi...
1. Khuaitizu tuah thei khuai in pumpi pahnih an nei. Pakhat cu rawl hrang, pakhat cu khuaizu hrangah a si.
2. Khuaitizu tuah thei khuai pakhat in nikhat ah pangpar 2,000-5,000 lai a fu thei.
3. Khuai hi Bible ah a langtel mi a si ve.
4. Khuai ahhin hnatuantu, bawinu, le cithlahtu tin an um fingfing.
5. Khuai nun in zir theih mi cu:
- Lungrualnak le pumkhatnak
- Burkhawmnak le hmunkhatnak
- Hnatuan taimaknak le zuamnak
- Iksikawk lonak le huatawklonak
- Tumtah hmunkhatnak le midang hrang thiltha tuahnak


Zuk le video: Chongkak khuai (FB June 27)

"Pa Ni hi..."

"Pa Ni hi..."

1. Pa hi milian, mifim le a thiamthil tlintlaknak ruang lawngah upat si loin semnak, hringtu Pa a sinak ruang rori ahhin upat pek kan si. Cuti si lo sehla upat tlak lo mi Pa kan tamtuk. Bible cun Thufim 23:22 ah (A lo hringtu na pa ih thu ngai aw; Amah um hlah sehla na seem lo ding) tiah in sim a si.

2. Pa a si lomi pai' tuanvo a latu Nu pawl upat tlak an si. Pai' hnatuan a sawngtu zaten upat ding an si ve. Culosehla Pa Ni hi mikip hrang thil remcang lo mai a si. Mi tampi cu Pa veikhat khal hmu ngah lo, Pa ko dah lo (keimah vek) vonlai pai' thihsan mi khawvel ah kan tam tuk. Mi tampi cu sentet laiah pai' thihsan an si. Mi tampi cu Pa nung lai nan tong ngah hrih lo, pai' kut veikhat khal kai hrih lo ralhla ih thenawk an tamtuk. Mi hrekkhat phei cu Pa hman theih sian lo mi an um sisi. Hibangtuk fate hrangah Pa Ni cu ruahnak titamtu le thinlai kekkuai nak ni duhnung lo men a si.

Zumtu Zalennak

Zumtu Zalennak
Zumtu hi a zalen mi kan sinan pumpak zalennak si loin Kawhhran sungah burkhawm zalennak le kaihhruainak sungah a um mi kan si. Cuih ramri kan lan ahcun Satan thangkam ah awk a ol tuk.

Lungawinak...
Zumtu pawl hmunkhat ih umkhawm le Pathian thu sungah pawlkomawk tlang hi khawvel ih kan co mi lungawinak hlubik a si.

Hotu / Hruaitu cun...
Kum tawkfang thiam lo cingin group leknak ka hoha ve, ka thiam ruangah si loin - tuah vivo tikah thiam vivo sawn mi a si. Zozo

Kuala Lumpur Baptist Church (KLBC)

Kuala Lumpur Baptist Church (KLBC)
KLBC hramthoknak Pathian thu simtu USA missionary Miss Jessie Green (Southern Baptist) cu 1951 August ah Malaysia a thleng. Jalan Pasar (atui Pudu Bazaar) zin parih innkhan teah thlacamnak le Bible zirnak tete an nei thok. Cuihhnu ah Hongkong missionary Miss Lau Ching Han, Miss Mak Kwai Lan le Pastor Loh Yan Kwong pawlin an ṭanpi ih an ṭhangso deuhdeuh.

Kumkhat a rei hnu 1952 December 14 ah zumtu member (18) thawn Kuala Lumpur Baptist Church tiah cozah theihpimi Kawhhran hlawhtling takin dinsuak a rak si. Culai ah Dr. Eugene Hill cu pastor (honorary) a siih Pastor Loh Yan Kwong cu mission hnaṭuan hotu a rak si.

Biakinn neih theinak dingah innhmun le biakinn thilri an khawlkhom hnu kum (2) sungah atui' KLBC biakinn hmun hi an ngah. Biakinn sak khal thokcih a siih 1955 November 20 ah KUALA LUMPUR BAPTIST CHURCH biakinn cu Pathian hnen pekhlannak an rak nei thei. Culai ah pastor cu Ps Loh Yan Kwong a rak si.