Kuala Lumpur Baptist Church (KLBC)

Kuala Lumpur Baptist Church (KLBC)
KLBC hramthoknak Pathian thu simtu USA missionary Miss Jessie Green (Southern Baptist) cu 1951 August ah Malaysia a thleng. Jalan Pasar (atui Pudu Bazaar) zin parih innkhan teah thlacamnak le Bible zirnak tete an nei thok. Cuihhnu ah Hongkong missionary Miss Lau Ching Han, Miss Mak Kwai Lan le Pastor Loh Yan Kwong pawlin an ṭanpi ih an ṭhangso deuhdeuh.

Kumkhat a rei hnu 1952 December 14 ah zumtu member (18) thawn Kuala Lumpur Baptist Church tiah cozah theihpimi Kawhhran hlawhtling takin dinsuak a rak si. Culai ah Dr. Eugene Hill cu pastor (honorary) a siih Pastor Loh Yan Kwong cu mission hnaṭuan hotu a rak si.

Biakinn neih theinak dingah innhmun le biakinn thilri an khawlkhom hnu kum (2) sungah atui' KLBC biakinn hmun hi an ngah. Biakinn sak khal thokcih a siih 1955 November 20 ah KUALA LUMPUR BAPTIST CHURCH biakinn cu Pathian hnen pekhlannak an rak nei thei. Culai ah pastor cu Ps Loh Yan Kwong a rak si.

KLBC cu a ṭhangso sinsin ih KL Baptist Desa Park City biakinn ropi zet pakhat 2013 ah sak ṭhehbet a si. Cun, KLBC ih zohkhennak hnuaih kum 15 a um hnu KL Baptist Cheras Center kawhhran khal 2015 January 1 ihsin thok anmah ten an ding thei zo.

Pathian mithmai zohin atufang KLBC biakinn alak ih hman termi ramdang mi pawl cu: Filipino, Myanmar, Falam, Mizo, Korea, Nepal pawl tla kan si. Biakinn ahhin nauhak ihsin mino tiang fimzirnak tlawng le kum upa pawl zohkhennak ministry a umcih. Thawhsal Ni (Sunday) tinten KLBC biakinn ih Pathian biakkhawmtu zaten mipum 1,000 lenglo a si ringring.

Ref: KLBC website le KLBC Bulletin (FB)