Siar Cawk lo Kum Ka Siar

Siar Cawk lo Kum Ka Siar
Atu caan timi a um lo,... Atu kan ti laiah cuih caan cu a liam cih zo,... A liamcia caan le hmailam caan lawng a um an ti,.... Caantha kan hmang ngahmi zaten an liam zo... Pathian in caantha in pekmi hmang thiam uh si.

Caan hi zohman ih simfiang thei lomi a si,... Caan siarnak nazi khalin cuih caan cu cekci a siar thei lo,... Caan hminsinnak khal a siar thiamlotui hrang man a nei lo,... Caan siarnak sun le zan timi khal hi leilung kapkhat hrang a si,... Caan hi a liam rangtuk kan ti, taktak ahcun a kelte a si ringring.

Second khat hi siar malbik a si lo,... Second khat sungah veisarih ka siar man,... Second khat sungah voi siar cawk lo a um,... Second, minutes ti pawl hi a siar thiamtu hrang men a si,... Kei cun Pathian siardan in semtir hlan ihsin kum ka siar,... Curuangah ka suahcam ah siar cawklo kum ka siar!
(FB August 18)

Khuai hi

Khuai hi...
1. Khuaitizu tuah thei khuai in pumpi pahnih an nei. Pakhat cu rawl hrang, pakhat cu khuaizu hrangah a si.
2. Khuaitizu tuah thei khuai pakhat in nikhat ah pangpar 2,000-5,000 lai a fu thei.
3. Khuai hi Bible ah a langtel mi a si ve.
4. Khuai ahhin hnatuantu, bawinu, le cithlahtu tin an um fingfing.
5. Khuai nun in zir theih mi cu:
- Lungrualnak le pumkhatnak
- Burkhawmnak le hmunkhatnak
- Hnatuan taimaknak le zuamnak
- Iksikawk lonak le huatawklonak
- Tumtah hmunkhatnak le midang hrang thiltha tuahnak

Zuk le video: Chongkak khuai (FB June 27)

"Pa Ni hi..."

"Pa Ni hi..."

1. Pa hi milian, mifim le a thiamthil tlintlaknak ruang lawngah upat si loin semnak, hringtu Pa a sinak ruang rori ahhin upat pek kan si. Cuti si lo sehla upat tlak lo mi Pa kan tamtuk. Bible cun Thufim 23:22 ah (A lo hringtu na pa ih thu ngai aw; Amah um hlah sehla na seem lo ding) tiah in sim a si.

2. Pa a si lomi pai' tuanvo a latu Nu pawl upat tlak an si. Pai' hnatuan a sawngtu zaten upat ding an si ve. Culosehla Pa Ni hi mikip hrang thil remcang lo mai a si. Mi tampi cu Pa veikhat khal hmu ngah lo, Pa ko dah lo (keimah vek) vonlai pai' thihsan mi khawvel ah kan tam tuk. Mi tampi cu sentet laiah pai' thihsan an si. Mi tampi cu Pa nung lai nan tong ngah hrih lo, pai' kut veikhat khal kai hrih lo ralhla ih thenawk an tamtuk. Mi hrekkhat phei cu Pa hman theih sian lo mi an um sisi. Hibangtuk fate hrangah Pa Ni cu ruahnak titamtu le thinlai kekkuai nak ni duhnung lo men a si.

Zumtu Zalennak

Zumtu Zalennak
Zumtu hi a zalen mi kan sinan pumpak zalennak si loin Kawhhran sungah burkhawm zalennak le kaihhruainak sungah a um mi kan si. Cuih ramri kan lan ahcun Satan thangkam ah awk a ol tuk.

Lungawinak...
Zumtu pawl hmunkhat ih umkhawm le Pathian thu sungah pawlkomawk tlang hi khawvel ih kan co mi lungawinak hlubik a si.

Hotu / Hruaitu cun...
Kum tawkfang thiam lo cingin group leknak ka hoha ve, ka thiam ruangah si loin - tuah vivo tikah thiam vivo sawn mi a si. Zozo

Kuala Lumpur Baptist Church (KLBC)

Kuala Lumpur Baptist Church (KLBC)
KLBC hramthoknak Pathian thu simtu USA missionary Miss Jessie Green (Southern Baptist) cu 1951 August ah Malaysia a thleng. Jalan Pasar (atui Pudu Bazaar) zin parih innkhan teah thlacamnak le Bible zirnak tete an nei thok. Cuihhnu ah Hongkong missionary Miss Lau Ching Han, Miss Mak Kwai Lan le Pastor Loh Yan Kwong pawlin an ṭanpi ih an ṭhangso deuhdeuh.

Kumkhat a rei hnu 1952 December 14 ah zumtu member (18) thawn Kuala Lumpur Baptist Church tiah cozah theihpimi Kawhhran hlawhtling takin dinsuak a rak si. Culai ah Dr. Eugene Hill cu pastor (honorary) a siih Pastor Loh Yan Kwong cu mission hnaṭuan hotu a rak si.

Biakinn neih theinak dingah innhmun le biakinn thilri an khawlkhom hnu kum (2) sungah atui' KLBC biakinn hmun hi an ngah. Biakinn sak khal thokcih a siih 1955 November 20 ah KUALA LUMPUR BAPTIST CHURCH biakinn cu Pathian hnen pekhlannak an rak nei thei. Culai ah pastor cu Ps Loh Yan Kwong a rak si.

Bible hi Cahnah Par Lawngah Si loin A Thu le Thinlung ah A Si

Bible hi Cahnah Par Lawngah Si loin A Thu le Thinlung ah A Si
Khawmpi zawh cu kan phur, Conference cu a tam ih zawhtu khal tam, Bible Conference le Study cu a malih zawhtu khal mal.

Crusade le Camping cu Zarhtin khawm tlukin kumtin tuah ringring. Gospel Concert khal tuah ringring. Sing Song Service le Worship Night tivek khal tuah ringring. Dinhmun khal si ding awmang hnakin puitling thei cuang lo kel ringring.

Sermon, Crusade le Camping tinten Bible siar kan ṭulnak simzirh asinan siar cuang lo, hnasiat tunsan men.

Holy Bible version (3) le hrinhnam ṭong (tampi) in kan nei zo asinan a siar taktaktu malzet thotho.

Editing Age (Edit San)

Editing Age (Edit San)
Ziangkim hi edit san ah kan thleng.
Edit ti cu a umcia mi thil pakhat kha a ṭuldan vekin rem, tuahṭhat le a ṭulmi bet ih a ṭul lomi hlon khi a si.

Thinlung Edit: Ca le Video-zuk pawl cu a langlomi langtertu an si. Minung hi a langmi lenglam cu edit (makeup) a ol zet. Kan ṭul taktak mi cu thinlung editor Thlarau Thianghlim a si. Tisa duhnak cun lenglam a edit ih Thlarau Thianghlim cun sunglam a edit hnu ah lenglam a mawi ter, a thianghlim ter, a ṭha ter ih dik le famkim in a tuahṭha a si.

Video&Zuk Edit: Duh lomi hlon, duhmi zawn lak, a dangdang kom, color mawi terih cangan mawizet le music duhmi thawn video mawi le ṭha sersuak a si.

Rawl thiang ei uhsih!

 Rawl thiang ei uhsih!

Nunnak hi Pathian pekmi a si, rawl cu nunnak dingah kan ṭulmi a si. Rawl khopkham ten ei hi nun damnak a si. Asinan rawl ei sual hi natnak-thihnak a si.

Rawl ei-in ruangah natnak phun zaran 200 le cancer tiang kan ngah thei. Ei-in thianglo ruangah natnak ngahtu hi mi pahra ah pakhat (1/10), cutin 420,000 kumtin an thi. Cumi lakah nauhak 125,000 kumtin an thi.
Rawlsuan pu (chef) rualpi pakhat in, "kan dawrih zuarmi cu ka ei duh lo, ka ei ding cu a dangten ka suang," tiah in sim.

Rualpi Kan Hawl (Urgent)!

Rualpi Kan Hawl (Urgent)!
💞Fala le Tlangval tampi rualpi nei lo lileng in an tawivak. Duhmi an co na'n rualpi an nei lo. Degree an ngah na'n rualpi an nei lo. Tlawngkai rualpi le hnaṭuan rualpi lawng an neih ruangah tlawng ṭheh hnu le hnaṭuan bangh hnu ah rualpiawknak a cem vivo ih a rei cun nelawknak a mal ih pehzomawknak a cat. Lungawi riahsiat ṭawmpitu rualpi an hawl. Rualpi neih lo ruangah mi hrekkhat in zuu le ritsii thawn an hnemawk, siatralnak sawn a si. An ṭul taktak mi cu rualpi a si. 

🤴👸Milian zet le larzet hrekkhat cu rualpi an nei na'n an kawm man lo, caan an pekawk thei lo i poimawh caan lawngah an tongawk. Thunuam relpi ding, lenvah pi ding, nomnak le harnak ṭawmpitu taktak rualpi an nei lo. Curuangah mi hoklak vekin an tawivak i holam thil tete an tizok rero. Khikhi an aat thu men a si lo, rualpi an ṭul ruangah a si. Kiangnai ah dai theih rualpi a um lo ruangah le a um na'n caan an pekawk thei lo ruangah a si.

A Netnak

A Netnak 

#Internet a siat ding
#Connection a siat ding
#Online um nawn lo ding
#Facebook tla a hlo ding
#Website zaten an cem ding
#WWW hman theih a si lo ding
#Leilung khal umnak a ṭha lo ding
Cutikah cun siar lo mi Bible an hlam ding
Zumlonak thinlung sualmawhnak a lang ding
Sirawknak caan ṭha a cem cuahco cih ding
Rinsan cencilh mi lei thil zate man nei lo ding!

#Biaknak muril tlansan tikah
#Zumnak ah ṭhang lo tikah
#Thutak ziangsiar lo tikah
#Leikhawvel ceen tikah
#Sual in a uk tikah
#Nun thar lo tikah
#Thuṭhen tikah
#Thihnak!

FB Post >> May 18 at 11:15 PM

Tihal Nunhar A Har: Tidai Thiang Kan Ṭul

Tihal Nunhar A Har: Tidai Thiang Kan Ṭul 
(A tamtuk le ṭihnung, a maltuk le nunhar)>>>

Leilungpi hi ṭhenthum-then ih ṭhenhnih (2/3) cu ti ih khahmi a si ahcun ziangtinso tidai kan sam thei? Mi hrekkhat cun tidai harsa ding an ruat dah lo. Cuih tidai ih zatek pathum (3%) lawng tithiang in ṭha a si thu mithiam pawlin an sim.

Leilung nikhua a siat sinsin ruangah tithiang kan ngah mal sinsin. Minung kan pungkarh deuhdeuh ti hman tam deuhdeuh, tibal kan suah tam sinsin tithiang amal sinsin. Curuangah hitin mithiam pawlin an ngan;

> Mi million (1) hrawng tidai harsatnak ruangah natnak a phunphun tuarin kumtin an thi. (water.org).
> Mi billion (2) hnak tamin tidai harsatnak kan tuar rero (UN, 2018).

PAWLPI ITNAK

PAWLPI ITNAK

Khrih ah heh Pawlpi-a luu si (v.23). Jesuh kei it asile khaw Pawlpi it si sing. Pawlpi heh pawlkom menmen si ngawl. Nuam phang it, nuam ngawl phang haw theih nung ngawl. Pawlpi heh kei it tuh si.

Pawlpi in Khrih ah petsawm si (v.24). Pawlpi in Khrih vumah thu nei ngawl. Lu a si Jesuh upatnak le ultungnak pe sawn si. Pawlpi minung hem in Jesuh Khrih itnak thaw pum petsawm in Pawlpi it tuh si.

NUNAU ZAWNRUAHNAK

NUNAU ZAWNRUAHNAK
# Kum Kim lo Nupiṭhitnak:
2011-2020 karlak ah nunau kum 18 kim hrih lo nupi ih ṭhit tuar (pasal neihter) mi 140 million an si ding.

# Nunau Harhdamnak:
Women Deliver Report - 225 million nunau in family planning an tuah thei lo tikah 74 million in tum lo nau an pai ih kum tin 36 million nauthlak a si.

# Nunau Serhzim Tannak:
Biaknak thu le nunphung thu ruangah nunau ih duhnak tel in siseh, tel lo in siseh nunau serhzim tan tuar le hmuhsuam tuartu an tam.

TUARNAK LUNGAWINAK (TL&TA)

TUARNAK LUNGAWINAK (TL&TA)
Hitin a si, tui hlahah a hmin ka thei dah lo. Hruaitu pawl tharthawh pawlkomnak (retreat) ah rin lo piin a hmai (biang) na nawnin in ka khawng ngah. Zapi lek tlang caan ih tihrim si loin khawng pangmi asinan hruaitu kum no FALA ti fam cu in ngaithiam lo. Kei khalin thiamtawk ngaidam ka rak dil nain in hro ciamco ih a raak auhnawh sisin ruangah biakinn tual lam panin ka rak kiansan. A poizet lala mi pakhat cu hitin a si. Biakinn tual ka thlen ciah ah hruaitu lakih group hotu pawl le pastor pawl meeting le a ṭulmi tete hrilnak, ngankhumnak tuah laifang a si. Cuih program cu ka thei cia lo, zohman in in theihter cia fawn lo, cucu Pastor le ṭuanpi hrekkhat in a thoknak ka khel lo ruangah in mawhthluk. Kei khalin zamrang theitawkin an tuahzat le ṭhehzat tifel ka zuamsal ih hna cu ka lim.

CHRISTIAN LUNGAWINAK

CHRISTIAN LUNGAWINAK (1 Thes. 5:17-18)
> Leilung le Christian Dinhmun:

Leilung hi ram (195), mipum 7.6 billion (76,000,000,000) hrawng kan si. Leilung hi Bible ih simcia vekin nikhat hnu nikhat a siat vivo a si. Leitlun biaknak 4,200 lakah Christian hi biaknak tumbik kan si. Leitlun Christian hi leitlun mipum zatekih 31.2% hrawng kan si.
Leitlun biaknak lakah hremnak a tuarbik biaknak kan si. (Thlatin: 255 thah, 180 sualpi, 160 thawngthlak, 104 zuar, 66 kawhhran siatsuah..). Leilung tleunak Rundamnak thu phuang dingah thlahmi kan si. Satan ih siatsuah mi, do mi, sual forhmi kan si.

> Christian Sinak le Leitlun Buainak:

HMUHDAN THAR - HMUHNAK THAR

HMUHDAN THAR - HMUHNAK THAR
(Thuf 29:18; Saam 17:15)

A. Hmuhnak, Hmuhmi, Hmuhdan
1. Hmuhnak:
- Tisa mit thawn hmuhnak (Thuf. 20:12)
- Thinlung thawn hmuhnak (Saam 19:8; Job 36:15)
- Thlarau mit thawn hmuhnak… (Zumnak thawn….2 Kor. 5:7; Heb. 11:1)

2. Hmuhmi:
- A si vekin hmu (2 Siang. 6:14-15)
- A si vekin hmu lo (2 Siang. 6:16-17)
3. Hmuhdan:
- Pathian hmuhdan (1 Sam. 16:7; Heb 4:13)
- Zumtu ih hmuhdan (2 Kor 5:16)
- Zumlotu ih hmuhdan (Rom 1:18-32)

Sunday Thlalang ah Christian A Mualpho

Sunday Thlalang ah Christian A Mualpho

March thla lai hrawngih thuthang lar pakhat cu Christian biaknak hi a remdaih mi biaknak a si lo tiah UK Immigration in Iran refugee a cohlan duhlonak a ruang an tarlangmi a si. 

Christian sinak hi biaknak pakhat vekin vun thlir cun porhdawk ding silo'n ningzak za sawn a si. Christian pawlin kan aupi mi cu rundamnak, remdaihnak, zangfahnak, ngaidamnak le ziaza ṭhatnak pawl a si. Asinan nitin Christian ram, Christian tampi nun ih a langmi cu thilṭha tampi lakah sualnak, ziaza siatnak pawl a si sawn.

HNAHSAWL PHAH NAUHAK THLACAM

HNAHSAWL PHAH NAUHAK THLACAM
 
Kumhra a rei hnuah hitawk hmun hi ka thleng sal. Thutak sungih hmaisakbik ka rualpi (2) thawn Sunday sun khawm ṭheh tinten thla kan cam ṭheunak hmun a si. Hitawk ahhin camping kai lai le follow up sungih hrinthar sinak sung lamih Thlarau hnaṭuan mangbangza pawl kan rel ṭheu. Cun, ring theitawp in camping hlabu sungih hla pawl kan sak, aw neihtawp suahin thla kan cam. Khawsung ihsin a hlatnak tlang lehlam rawn hramlak a si ruangah mi ih theih ding kan phang lo, kan ning a zak fawn loih sinak zate thawn Pathian kan biaknak hmun a si.

HAPPY & UNHAPPY CHIN NATIONAL DAY

HAPPY & UNHAPPY CHIN NATIONAL DAY
Miphun rel ding nei lo, thei lo lakah minung san thuanthu ih Chin mi ih siar, kawh kan si hi lungawiza ngaingai a si.
 Pipu Calai, Nunphung - Thuam le Tong nei lo tampi lakah a neitu kan si hi lungawi za ngaingai a si.

Kan ram, kan leilung ti ding nei lo tampi lakah Lairam, Zoram neitu kan sihi lungawi za ngaingai a si(Chinrawn cu kan ta a si ngaingai lo)
Farahnak le Atnak lamah a makbik pawl kan si ve nain Sersiamtu Cung Pathian mitheih, hril mi kan si ve hi lungawiza ngaingai a si.
Asinan, riahsiatza cu:
A do aw mi miphun kan si,
A iksik aw mi miphun kan si,
A ṭhekdarh mi miphun kan si,
A luat hrih lo mi miphun kan si,
A cemral vivo mi miphun kan si!
Chin mi, Laimi, Zo mi, Chinlung suak zate hnenah Chin National Day nikhat ninu a suak ding hngakin, camkhat Happy Chin National Day 2019!
FB>>> February 20 at 12:12 PM

"Innsang Kumruk Lungawinak"

Innsang Kumruk Lungawinak
A um lo um tertu
Pumhnih pumkhat tertu
Cung Pathian remruahnak
Nikhat hnu kumruk kim tiang
Fanau rilrah malsawm thawn
Innsang hruaitu Pathian thangṭhat!

Ni, Thla le Kum
Siar thok hlan ihsin
Kei cu kei, Anih cu anih
An fehnak lamzin tluanah
Ninu Thlapa thim le tleu cu
Sun le zan Pathian Thu a si!

Ṭong "Kamkhat"

Ṭong "Kamkhat"

#Pastor pakhat in a sermon ah, "1/10 pek cu sual a si," tin thu a sim ih cui ni veikhat te lawng rakhawmtu nupinu pakhat cun a lungkim tuk i 1/10 a pek dah lo mi a lunghmui zet.
#Kawhhran upa pakhat in pastor hnen, "Saya pa 1/10 kan pek lo sokhaw," tin messenger voice a kuat i pastor khalin hmundang ah an pe a si ding tin a ruahsak ih, "aw si maw," tin voice a kuat sal.

#Nupa hauawk thinheng phah cingin an fapa cu a nu in a kawk i, "na pa na zon pei, hiti ringring hauawk hi ka ning tuk zo," tin a hei hro cuh a fapa in, "kei khalin ka ning tuk," tin a let lohli.
#Homecell hruaitu fala mawizet in a rualpi tlangval pakhat Homecell khawm a vun sawm, "ka ṭhian, na man leveten in ko aw...ka lo hngak," a timi kha tlangval pa in "in do aw" tin
a thei sual i Beer buu (5) thawn a pok cih.
Mirang ṭong ahcun "Yes" le "No" tiin tong kamkhat in thu a fel thei. A sinan kan tong cun "Si" le "Si lo" tin a si ve i, hihi tong kamkhat veve in pom a tul.

Nun Phun (4)

Nun Phun (4)

Sual khawthim sungih a um hrihmi nun. Mi zozokhal tleunak Jesui' rundamnak sungih a um lomi pawl cu khawthim sungih tlangleng mi an si. Phundang in kan sim asile thimnak bawi Satan faate an si.

Pathian fa si cingin le Satan fa si cingin nun hi ro car nun (nun cau) si a ol te. A hleice in Pathian faate pawl kan nunnak hrihrampi Bawi Jesuh thawn kan pehzom ringring lo ahcun kan nun a ro car vivo a si. Hnah tha, kung tha, rah tha kan si theinak dingah kan kungpi cu Jesuh lawng a si. 

Pathian a rinsantu mithiang pawl cu lei harnak sualram hmanah an nun a hninghno ringring. Daihnak le hnangamnak thawn nun hninghno ram ah bulpak, innsang, pawlkom, kawhhran, khawtlang le ram miphun tiin a hninghno a si.

Hahdam, colhdamnak taktak cu Pathian lawngin mi a pe thei. Lei nun hi a hahdam ziangahtile sunglam thlarau nun a dam taktak ruangah a si. Nun cu leilungah hram bun loin Van lam thu ah hram a bun a si. Nun colhhahdamnak taktak ramah buainak in a ciim ban nawn lo, cucu Bible in tlamtling nun, duhdim nun a timi a si. Hallelujah!

Zuk: Bualkhaw > January 30

"NAUHAK LAMZIN"

NAUHAK LAMZIN

"Nauhak kha nundan dik zirh aw, A tar tiangin cuih lamzin ihsin a pial lo ding" (Thuf. 22:6).

USA ih Lai pacang (3) pawlin state dangdang an umnak ihsin USA ih Laimi nu le pa tampi in faate kilkhawi lo, nun zirh lo le caan pek lo thu an hmuhtonmi tampi in sim dah. A hleice in faate pawl Pathian biaknak ah an hruai thlen lo ih Pathian lamzin ah an fehpi lo tihi a poibik mi a si. Hihi USA thleng Laimi pawl lawng siloin ramsung ramleng ih Laimi nu le pa tampi nih kan tlaksamnak zawn a si. 

Kawlram in, Malaysia in hmailam kan faa le hrang tiah ramthumnak (USA, Australia...) ah an feh san an sim rero nan a ngaingai cuih ram an thlen tikah nu le pa tampi cun pumcawmnak sumpai hawl hnatuan buai ah faate lamzin dik ah an hruai ta nawn lo.

An Theicia Lo

An Theicia Lo

Abaraham in zumnak thawn inn ihsin a poksuak laiah hmailam ih a ton dingmi harsatnak tampi a theicia thluh lo. Pathian ih tiamkam mi lawng thlirin zumnak thawn a feh ko.

Joseph kha zuar a si laiah cun zangfakza te a si. Asinan sal a cannak cu bawi tohkham karbak a thoknak a si sawn. Bawi a si tikah cun lungawiza ngaingai a si. Sal dinhmun ih a um laiah bawi a si leh ding tiah a ule pawlin an thei cia lo.

"Minung ih fehnak lamzin cu Bawipa in a sial sakih an nuncan parah a lung a awi" (Saam 37:23)

Zum Hlah!

Zum Hlah!

Cupa in, cu nu in cutin khatin a sim, a sermon tiah ol-ai tukin zum hlah. Pathian hnen ihsin a ra mi thlarau a si maw a si lo ti hniksak ding a si. Bible siar lo in hna lawngih theihmi zaten zum hlah, Bible thawn check ding a si (1 John 4:1-3; Tirh 17:11).

Pathian Thu ih kan huap termi Bible thu, Kawhhran thu, Minung thu, Sual thu, Rundamnak thu, Satan thu, Vancungmi thu, Hellram thu, Vanram thu, Sancemnak le Thawhsalnak thu tivek pawl a huap theh ruangah Pathian Thu ngaingai felfai thei ngaingai lo cun sim mi pohpoh zum hlah!
Pathian (Pa, Fa, Thlarau Thianghlim) thu le A Thu (Bible) hi Pathian Thu huaptu hrihram a siih a dang hmuahhmuah cuih Thu sungah ah a um ruangah A Thu siar lo thu dangdang cu zum thluh hlah!

Pathian le A Thu hman zum ngaingai loin thu dangdang le minung ih thusuak cu zum tuk hlah. Pathian zumnak lo cun Amai' lungawinak lung kan ton thei lo a si (Hebru 11:6).

Zuk: 2017 Bethel Homecell Hruaitu thlacam

"Pathian in Thu A Nei"

"Pathian in Thu A Nei"
A liam zo A um nawn lo
A theh zo mi nun
A cem zo mi caan
A um nawn lo mi kha
Pathian in thu a nei zo!

A thok zo
A um lai rero
A feh rero mi nun
A cem thei lo mi caan
A um ringring ding mi kha
Pathian in cat lo thu a nei zo!

Vei thawngsawmzahra ka nolhsal
"Pathian in Thu A Nei"
Pathian in Thu
A Nei

Matt 28:18
January 6

Thimzan Christmas

Thimzan Christmas

Ṭahnak ruamah an ai,
Tuarnak ramah an ram,
Ṭhenawknak caan a kim,
Thinnatnak ramah an vai,
Thimnak sungah an hram,
Thlemnak thangah an awktal,
Thihnak ṭhennak tuarnak pawl...
Mitthli a luang caanah Christmas!

Herod a thin a har,
Jerusalem mi an thinhar,
Mifim pawl khal lamzin pial,
Nauhak thisen luannak a rap,
Rundamtu Bawi khal ral a tlan,
A buai tuk mi Christmas 2018 ah,
Kannih le annih teh cui' thimzan ah;

"Christmas Lungthlitum"

"Christmas Lungthlitum"

Na mit ka duh, i zoh aw
Na kut ka duh, i kaifek aw
Na hmur ka duh, i hnam aw
Na aw ngai ka duh, i biak aw
Na ke ka duh, ka hnen ah ra aw.

Ka lo duh, i duh ve aw
Ka lo hril, ka hnen um aw
Ka lo ham, cohlang ve aw
Ka lo pom duh, timtuah ciaaw
Ka lo thit ding, kumkhua hrang.

Nang hawl dingah ka ra
Nang run dingah ka rung tum
Nangmai hrangah har ka tuar
Nangmai hrangah nun ka pek
Nangmai hrang rori ah ka nung.

Kei tlukih lo duhdawttu um lo
Kei tlukih lo ngaihsaktu um lo
Ka sinak zaten ka lo duh bang'n
Na sinak zaten ka lam hoi ve aw
2018 Christmas ah ka lo hngak.

A thulu:
"Christmas Lungthlitum" a si. 
December 9, 2018