Tihal Nunhar A Har: Tidai Thiang Kan Ṭul

Tihal Nunhar A Har: Tidai Thiang Kan Ṭul 
(A tamtuk le ṭihnung, a maltuk le nunhar)>>>

Leilungpi hi ṭhenthum-then ih ṭhenhnih (2/3) cu ti ih khahmi a si ahcun ziangtinso tidai kan sam thei? Mi hrekkhat cun tidai harsa ding an ruat dah lo. Cuih tidai ih zatek pathum (3%) lawng tithiang in ṭha a si thu mithiam pawlin an sim.

Leilung nikhua a siat sinsin ruangah tithiang kan ngah mal sinsin. Minung kan pungkarh deuhdeuh ti hman tam deuhdeuh, tibal kan suah tam sinsin tithiang amal sinsin. Curuangah hitin mithiam pawlin an ngan;

> Mi million (1) hrawng tidai harsatnak ruangah natnak a phunphun tuarin kumtin an thi. (water.org).
> Mi billion (2) hnak tamin tidai harsatnak kan tuar rero (UN, 2018).

> Mi million (700) cu kum 2030 ahcun tidai daihawk loin vaivak a ṭul ding (GWI, 2013).
> Mi billion (4), leilung mipum a hrek zikte cu kumkhat ah thlakhat hrawng kumtin tidai harsatnak kan tuar (M&H, 2016).
> Ti putnak lei tawne ih tihna hram pawl tla a tlasia vivo zo (Richey et al., 2015).
> Mi billion (5.7) cu kum 2050 ah tidai harsatnak nasatak kan tuar dingih cumi lakah (73%) cu Asia ram a luar cuang ding (Burek et al., 2016).

Kan taksa ruangpumpi khalhi a hrek hnakih tam cu ti a si. Thlakhat lai rawl loih um a theih na’n, tidai loin zarhkhat hman nun a har. Minung ih ei-in, sinfen, hman thilri tinkim hi ti tel loih tuah theih a um lo tluk a si. Ziangtluk in tidai a thupi. Zuu palaang khat ngahnak ding ti gallon tamtuk a cem. Veikhat dailen daibualnak ah ti tamtuk a cem, kan in mi hnakin a tam sawn.

Leilung pi le minung kan hmailam thu ruah tikah tithiang kan harsat vivo cun natnak a pung sinsin ding. Minung cu kan ṭhangso deuhdeuh dingih tidai hmanmi a tam deuhdeuh ding. Thingkung hrampi an mal deuhdeuh dingih tidai kan ngah mal sinsin ve ding. Cuticun leilung cu umnak ṭha lo ah a cang vivo ding.

Tulai tidai kang le nikhua sattuk ruangah ruahpi hrang thla kan cam. Tidai hrang thla kan cam. Nikhua daihnak hrang thla kan cam. Kan harsatnak Pathian in theisak hramhram seh. Kannih khalin tihna, dawhhna, tiva pawl kan kilkhawi ve pei. Tidai thiang tampi kan ngahnak dingah thingkung hrampi siatsuah lo lawng siloin cing, phun ih zaiter a thupi tuk.

Elijah thlacam ah vanruah a sur bang le Moses sawhmi lungpi tiput bangin ruah le tithiang kan ram ah sur in put hram seh! Amen!

Tihal Nunhar A Har: Tidai Thiang Kan Ṭul