"NAUHAK LAMZIN"

NAUHAK LAMZIN

"Nauhak kha nundan dik zirh aw, A tar tiangin cuih lamzin ihsin a pial lo ding" (Thuf. 22:6).

USA ih Lai pacang (3) pawlin state dangdang an umnak ihsin USA ih Laimi nu le pa tampi in faate kilkhawi lo, nun zirh lo le caan pek lo thu an hmuhtonmi tampi in sim dah. A hleice in faate pawl Pathian biaknak ah an hruai thlen lo ih Pathian lamzin ah an fehpi lo tihi a poibik mi a si. Hihi USA thleng Laimi pawl lawng siloin ramsung ramleng ih Laimi nu le pa tampi nih kan tlaksamnak zawn a si. 

Kawlram in, Malaysia in hmailam kan faa le hrang tiah ramthumnak (USA, Australia...) ah an feh san an sim rero nan a ngaingai cuih ram an thlen tikah nu le pa tampi cun pumcawmnak sumpai hawl hnatuan buai ah faate lamzin dik ah an hruai ta nawn lo.

Faate pawlih hmailam hrang duhsaknak tha kan neihmi lamzin an zawh theinak dingah tlawngkai ter, ramdang thlenpi duhtawk men loin, a thupibik cu Pathian zumfeknak le hrintharnak nunram ah kan hruai luhpi hmaisa ding hi a si.

Kan faate pawl Sunday School kai lo, Biakinn thleng lo, Pathian thu zir lo-thei lo an siih nunnak taktak co lo an si pang ahcun ziangtluk riahsiatza so a si. Faale pawl hrangih fehnak lamzin tha cu Pathian duhnak zin a si, cucu Kawhhran kaihhruainak sungah nu le pa, zirhtu le hruaitu pawl thawn tuan tlang ding hna sunglawi a si.

Zuk: 2011 Dec 10 ni, DUMC English service ah Christmas sawmnak a fehtu FCC Sunday School nauhak hrekkhat le pastor, zirhtu pawl an si. Hi nauhak pawlhi Sunday School thaten a kai ringringtu pawl tla an si.

FB- January 27