LEILUNG A HIM LO

LEILUNG A HIM LO

Mi zokhal kan him lo. Ziangmi ram khal a him lo. Leilungpi rengreng hi a him nawn lo. Adam le Eve le rulpi pawlih buainak hin tui’ni tiang leilung buainak hrihram a pehpar ter i tui’ hnu khalah cui buainak thotho hi a si vivo hrih ding. Ram uknak khal a buai, Kawhhran uknak khal a buai, minung uknak khal a buai ih minung zaten buainak khur ah kan pil. 

Buainak hi minung i' remthat theih thu a silo ruangah, remnak thu hi khuahlan ihsin Vancungmi khal’n an phuang, minung khal’n an zuam-asinan leitlun ah hlawhsam a si ringring. Hi buainak in leilung hi siat lam ah a fehpi hnu siat tawpkhawknak kan thleng ngaingai zo. Curuangah kan umnak leilung hi a him lo.


Ralpi ralte a tam deuhdeuh thisen luannak lei ram. Linghnin le thlisia le tilet a tam deuhdeuh thlaphannak lei ram. Sualnak le sualtu a karh deuhdeuh camsiat mi lei ram a si. Nun a tawi, san a net, himnak cu Pathian cahnak sung lawngah a kim.

Ziangahtile:-
1 John 2:15-17 Hi leilung le a sungih thilri hi tlaihsan hlah uh; hi leilung hi nan tlaihsan asile Pathian duhdawtnak nan nei lo a si. 16 Leilung ta a simi thil hmuahhmuah: Sualnak tisa in a hiar mi, milai in an hmuhmi le an duhmi thil, minung in hmaihngal porhawknak ih an ruahmi thil hmuahhmuah hi pakhatte hman Pa hnen ihsin a rami an si lo. A zate in leilung ihsin a rami an si theh. 17 Leilung le a sungih a ummi thilri, milai ih an tlaihsanmi pawl hi an hloral vivo zo; asinain Pathian duhnak a tuahtu cu kumkhua in a nung ding.