HRIL DING A UM LO

HRIL DING A UM LO

Hau cia mi thingkung hrang hmanah ruahsannak a um; A cerh dingih a nungsal ding,
A hram note a tthang vivo ding (Job 14:7). Asinan minung cu veikhat thih hi lei taksa cemnetnak a si cih. Ziangvek nun harnak lak khalah beidong lo tu hrangah lungawi le hnih caan a cem hrih lo. A tho thei nawn lo thih a hngaktu hman lungawi in a hni thei tuk lai.  Asinan mi tampi cu theicia lo, ralring man lo le hril riai lo'n an thi zo.

Mi pakhat thah hin mithattu ti a si. Mi burpi thah cun mi huaisen ti a si (TM, Malaysia PM). Doawknak hi mi tampi thihnak a si. Ral doawknak, sumpai doawknak, le nehnak cuh doawknak pawl hi nehtu hrang lawngah man nei a si. Duh hril lo'n cunah mi siar cawk lo an thi, ziangah tile thih cazin hi a nunglai minung ih tuahmi a si.

Thlisia linghnin le tilian ruangih thih hi hril ngam ci a si lo. Minung rori thilri vekih zuarin duhduhnak hrangih hman mi nauhak, nunau, tirhfialmi mipa tampi pawl teh zo so a hril ngam cuang. Natsia le tidam theih lo tursia a phunphun ruangih kum no tilo upa tilo nung cung ih tuar cuahco le harsa vangsang ih thih hi mai' thiam lo thu a si hmanah zo so tuar taktak a ngam. Mawh nei lo rori mawh phurh tuarin mai’ ruangah si lo mi’h thu ruangah thih tuar, nat tuar hi teh ziangtluk a poi, a poituk.

Asile hril lo’n hizat rori tuar ding, thihpi ding harnak in nunnak hi a fehpi laiah zianghman hril ding kan nei lo. Mai’ hril lo, mi’h hril lo tuar ding a tamtam thawn leitlun nun rengreng hi hril ding taktak a um lo. A taktak ahcun nun hi kanmai hril thu a si lo, Cung Pathian ih siannak thawngin a si.
A taksa ruangpi a nat lawng a thei, A thinlung harsatnak lawng a tuar.
Job 14:22

Zuk: Palik, miruak, le kiangkap mi vak sukso pawl. (21/9/2018)