Muangtak Umtu Innteekpa

Muangtak Umtu Innteekpa

     

Umtu innteekpa pakhat in muangtak pa a si theinak tuh in a naper te tsiltsang ngai in le maan ngai in a per puah kul si. Naper (duty) tinak heh per ot lekhaw per, per ot ngawl lekhaw per ngawl theihnung naper si ngawl si. Per ot khen, per ot ngawl khen per kultsam nak naper si. Tsimita, innteek pa naper kei tiphang a per kultsam nak naper rel nuamnak si.

Pathian Thaw Naper

Innteekpa pakhat hen Pathian nenah pumpe nun a masaber in nei kul si. Tutu sikhen Pathian nenah kei pum, nun kei ap, pe tu in Bible in a zirhnak te si sing. Tsimibangin, Pathian nenah pumpenun, pumapnun kei nei phangbek in leivum ah naper kei nei nak te lawhding in tsanglen theih nung si. Innteekpa tekhen innsang kelen, lamhuainak ah Pathian nenah a masa in a nunnak a ap masa kul nak si. Heimansim tiphangin, Pathian in innsang khansonak, mawinak, lawhdingnak, remnak, nuamnak teheh innsang sungah kimtiar tuin a deihsaknak si. (Romans 14:12: Ecclesiastes 12:13). Tsimibangin Pathian nenah pumapnun, nunapnun nei thahlam in innsang a khangso pitu innteekpa tsain a thupiber a sirhsan tuhnak heh Bible si.

Tenawn, Tsanawn Te Tsa Naper

Mipa takhem in innteekpa kei sima in naper thupi ngai nei dang si sing. Innteekpa a si ongla ten mahni le mahni ralring tuh le tsate zirh tu, dangval lai takhem in ralring ham in thei masa kul nak nei dang si sing. Heisim tiphangin, kei taksa tsa a pha ngawl thil te; zuu, zaa, rithei a phunphun te heh pial, tsang tuhnak si. Tsimibang riithei, taksa tsa a phangawl thil te man in hing lai ngawl nak a suak tulai tsanawn te tsa phatngawlnak tampi leng thei si. Na sungsuak tsa tele, a sual tulai tsate tsa PA pha hen tsimi bang thil pha ngawl te tsang khokho tuh nak si. Hausanak, mingthangnak, thuneinak, sahnungnak te tahin umnak, diktsangnak, muangtaksinak teheh a masa in innteekpa takhem le mipa takhem in kei zei, nei masa kul nak si.

Nupa Sinak Naper

Innsang tinak heh mi panih te tepan nak a si bangin pasel heh zii te lu si in Pawlpi heh pasel tu lu si. Meheh, Pathian thusuah asimanin kei eel tuh heimah om ngawl si. Lu sinak naper a nei tu hen itnak, pumpenak, muangtak sinak, thu maanak te thaw khangso tuhnak si. Tsimita, innteeknu, zii vumah muangtak ngawl innteekpa heh tsa te tsa khen muangtak pa si ngawl kha men tu si. Tsimi heh, nupa sinak ah muangtak sinak vum ah a thupi ber in ruat tuhnak si. Bible sungah Pathian naper dan le thusuah dan te kei pan phang nupa sinak ahkhen lu (head) sinak heh innteekpa nen ah Pathian in a pe lam mu thei si sing. (Ephesians 5:23).

Bawmtu Naper

1Timothy 5:8 ah kei mu bangin innteekpa hen innsang sungah kul le samnak hem ah khawmu in a kim tiar kul si. Thazawng ngawlin naper tuin le innsang heh innkawpi te tsa luatnak pe tu a si tuhtian in na per tuhnak si. Tsimibek zongawlin, innteekpa hen raula lam thuzirhtu sinak naper khen nei si. Zii le tsa te lamhuaitu, thuzirhtu, thuruatpitu, kelen tuamlawmtu, nuntsan zirhtu pha si thei nak tuhin omdan, awnkam, napernak, kelentsawmnak, nuntsan leitdat, mi pawlkomnak ah tsuungtaak, muangtaak situ in zuam kul si. (Ephesians 4:6: Proverbs 22:6).

Ralring pha thu a om zong heh, hai kha po ol a sing. Innteekpa in kontikkhen, "keimah innteekpa, ka thu thu" tibangin mah le mah heh innsang ah daak ber in koihtsawm tuhnak si ngawl si. Tsimitahin, nunnemnak, ngeihharnak, bawm otnak, itnak thaw sawn in innsang ah thinlung put tuhnak si.   

Muangtak Umtu Innteekpa  

Dawltaber in, Jesuh Khrih innsang ah innteekpa heh thu neitu, khawkhantu, lamhuaitu, zirtu, Pathian nen ah innsang vaseng a lenpi tu situ in naper nei pa si. Amah heh tsa te pa, innsang dintu, innsang kelentu, tsawmtu, bawmtu, lingtu a si manin muangtak umtu Christian si kul masaber si.

Innteekpa takhem nenah Pathian thupha muitsu om ta sen!