Saya/mah Kan Si Taktak Maw?

Saya/mah Kan Si Taktak Maw?

Saya/mah cu Zo a si?

Saya/mah cu zirhtu a si ding. Zirhtu a si lawng ah zirhmi hrangah saya/mah a si ve ding. Saya/mah a sinak cu a taktak ahcun a zirhmi hrang ah a si. Midang in saya/mah tiin kawhve ding a si thluh lo. Mah zirhtu cu mai’ saya/mah a si. Midang zirhtu cu mi’h saya/mah  a si ve. Saya/mah a sinak kan ttawm thei lo.

Ziangruangah Saya/mah ti’n kan ko?

Zirhtu cu saya/mah a sile ziangruangah saya/mah ti’n kan ko thluh lo. Zirhtu ciocio ziangruangah saya/mah ti’n kan kawh thluh lo. Kawhmi le kawhlomi mi zirhtu an um hi thil dik a si pei maw? Saya/mah ti’h kawhmi zaten saya/mah an si thluh ve lo hi a kawhtu’ palhnak phunkhat a si ko lo maw?

Veikhat cu Bible tlawnginn kiangih Kawl nupinu pakhat in Bible tlawngta pawl kha, “Ziangruangah so saya/mah ti’n nan kawhawk thluh. Saya/mah tihi nan kawhawknak a si maw?” tin thu a sut. Tlawngta pakhat in aw a si ko. Kannih cu hitin kan koaw thluh, ti’n a let.

Hi thilumdan zoh tikah tulai kan pawllkom sungih saya/mah ti’h kawhmi mi hrekkhat cu

zirhtu si ruangah saya/mah ti’h kawh si lo ih a kawhtui’ kawh ruangah saya/mah a si rerotu kan bo lo.

Ziangruangah Hmaisong Hmin Kan Uar?

Mipi lam ih dik lonak le palhnak pakhat ti sehla a sual lemlo ding. Ziangruangah Bible tlawng kaitu tapoh kha saya/mah ti’n kawh a si ttheu?  Ziangruangah Biaknak leiram ah saya/mah tihi hmaisong kawhawknak hmin ah a cang? Ziangruangah Acozah leiram ahcun saya/mah cu fimzirnak tlawng lawngah hman a si pei?  Ziangruangah mahte lungtho-pumpek (volunteer) ih zirhtu tampi kha saya/mah ti’n kawhding kan hrelh, kan tlolh. Biaknak lam si ruangah olte zangkhai in saya/mah ti’n hmaisong kawh ih kawh ringring hi thil dik a si cawk lo ding. Hivek hmaisongawk khal hi a dikmi mi hmaisong nun a si cawk lo ding.

Kawhtu le Kawhmi Lungput

Hmasong kawhnak ah saya/mah hmang rero hi thuphan per rero a si. A kotu khalin saya/mah ngaingai tluk ih upat pek lo le ngaisan cuang si lo ttawngka mawinak men ah saya/mah hman rero khalhi kaphnih hrangah thuphan phuah rero a si thotho.

Thudik cun hmaisong a nei lo vekin saya/mah a si ngaingai lo mi saya/mah ti’h kawh a si tikah kotu le komi thinlung ah zumlonak a um veve. Cuihleng ah a poisawnmi cu saya/mah tiih komi thinlung ah uarawknak, hngalnak le titerawknak a sem ter ruangah lungput ttha a suahpi lo. Saya/mah tiih kawhmi ka si ruangah ka zuam ding a ti theitu mi a malzet ko ding. Porh duhnak lungput thawn saya/mah kawh cu lungput dik a si thei lo. 

Hitideuh In Si Sehla

-         Zirhtu ngaingai a si lo ahcun saya/mah ti’n ko lo mai sehla

-         Hmaisong ruangah le hmin theihfel lo ruangah ko mai lo sehla

-         Ttongka mawinak le upat langternak men ahcun ko mai lo sehla

-         Bible tlawng kai ruangah saya/mah ti’n ko thluh lo sehl

-         Zirhtu a si dah nan hnattuan a colhsan hnu khalah ko zel ko sehla