Wednesday, 5 September 2018

Amen!

Amen! 

Kannih cun mai' hrang kan ruat
Tufang 7.6 billion minung hrang
Christian minung 2.3 billion pawl
Leitlun mipum za ah 30 hrawng 
Kan kan kan, kan timi ih huap ban lo!

Cungnung Pathian ih rem khuaruahnak
A maksakmi tumtahnak le thuthennak
Sekan tin mi 4 nausuak le 2 mithi hrang
Adam a thok hlan ihsin Van le Hell tiang
Cucik kharbok cikhrik hringfa nun nei zaten
Lei ih tuah lei ih kir ding zatei' raltawpnak
Tulmi duhmi hmuitin thoknak netnak dangdang!
A cu bang lakah - kan ruahmi
Ka ka ka, kan kan kan le an an an thu pawl hi!
Pakhatnak thupibik a si lo - asinan
Sersiamtui remruahnak sungah a zaten zaten
A ciacia zumnak rinsannak ruahsannak zaten
A thuthu cu bik lakih bik le hmuahhmuah zaten
Amen Amen Amen vei 3 le vei 7 ding a si a si
Amen cu thlacam netnak men a si lo! Amen!
Saam 72:19 A hmin sunglawi kumkhua in
thangthat uh; A sunlawinak leilung pumpi ah
khat seh. Amen! Amen!
Saam 89;52 Bawipa cu kumkhua in thangthat uh si! Amen! Amen!
Zuk: Melaka bus par ihsin zuk mi

Tawp A Tawp

Tawp A Tawp
***************Nunau in netabik a duh
Mipa in hmaisabik a duh
Nauhak in a duhduh a duh
Mi pitling in a thatha a duh
Mi hmuahhmuah in bik kan duh!

Mithli cu tuarnak a si
Tahnak cu natnak a si
Beidongnak cu tur a si
Tihnak cu van duainak a si
Tuartheilonak cu sunnak a si!
Nunnak cu a lang lomi a si
Ruahsannak cu hmailam thu a si
Lungawinak cu sunglam nun a si
Beiseinak cu a cang hrih lo mi a si
Thazang cahnak cu tham theih lo a si!
Mi hrek in a langmi lawng an hmu
Mi hrek in a ring mi lawng an thei
Mi hrek in tham theih lawng an nei
Mi hrek in lei ih tep theih lawng an duh
Mi hrek in leilung thil lawng an tlaihsan!
Nikhat cu ni thawngkhat bangin
Ni thawngkhat cu nikhat bangin
A um zo mi le a um lai dingmi thu
A liamcia mi le a ra lai ding mi caan
A thoknak le a netnak cu Pathian ah a si!
2 Peter 3:8
Photo: Repost

Thursday, 30 August 2018

CALAICA

CALAICA

Kan dinhmun sang sinah
Kan ruahnak kau tertu Calai,
Kan zir ding, siar ding, ngan ding kan Calai,
Kan miphun kilhimtu kan nunphung a nuntertu,
Ro sunglawi calai, laica, Bible ca, CALAICA
Sandeng tiang hmun hram seh!


FCC Calai Committee Kum (10) Kim
Ka thinlung kilkhat luahkhattu,
Ka hman zo mi caan a laktu,
Ka thazang le ka fimnak,
Ka nun lamtluan remtu,
Ka thapmi canmi,
CALAICA!
FCC
13/7/2018

Refugee pawlih Pathian A Ummen Maw?

Refugee pawlih Pathian A Ummen Maw?
Refugees (50,000/68.5million)
++++++++++++++++++++++++
Umnak nei lo vakvai minung (68.5 million) pawl hi raltlan, nun humhimnak hrang bom tulmi pawl an si. Ramhuap in refugee mipum siartam mi pawl cu Central African Republic (1 million) Europe (1.4 million), Iraq (3 million), South Sudan (3.3 million), Syria (5 million), Ukraine (2 million), Yemen (2.8 million, 20 million pawl bom tul). Ram nei lo dinhmun thleng tulaifang UNHCR ih ngaihveh hlawhbik Rohingya refugee mi (7-9 million) an si. Cui tlunah leitlun refugee 2/3 cu Syria, Afaghanistan, South Sudan, MYANMAR le Somalia ram (5) ihsin an si. Hitluk leitlun refugee lakah Laimi (Chin) refugee mi 50,000 kiangkap hrang harnak thu kan ruah tikah kan unaupi refugee million tampi pawl hrang huapih Pathian uknak le remruahnak thu mi zahuap ruahnak nei kan tul a si. *(1 million = 1,000,000) -www.unrefugees.org
Milai Ruk-zuarnak
++++++++++++++
Leitlun ah namnuai tuar-hnatuan khung tuan termi, ruk-zuarmi, sal vekih hremmi a phunphun harsatnak tuartu (20-37 million) an um ih kumtin mi (600,000 - 800,000) pawl cu ramri kaan in ruk le zuar hnawihnih namnuai mi an si ringring. Himi pawl lakah Chin mi ziangzat kan tel, ziangtin kan humhim awk ding, a tuar zo pawl ziangtin runawk sal thei ding ti thu pawl ruah tikah a luatmi, a himmi pawlih mawhphurhnak hi daithlang ih topi men ding
a si hrimhrim lo. -http://humantraffickingcenter.org

An Thei Lo - Kan Thei Lo

An Thei Lo - Kan Thei Lo
>>>>>>>>><<<<<<<<<
A lang lawnglawng thei thei thei
A deng le kawm ih sui thempel
A lu le zim ih sui tumbawr
A theitu le neitu anmah
An thei lo – kan thei lo!


Kawhhran ih loram sumtual rawn
Anmah kanmah nanmah tiahtiah
Sui le Ngun le Lungvar tlatla
Pekmi le ngahmi thatha
An thei lo – kan thei lo!

Hmuh lo lo thei thei thei a cu cu
Hmuh lawnglawng a si lo lo
Hmuh lo theih ding tamtam
Lu lam maw ke lam lam
An thei lo – kan thei lo!
https://www.facebook.com/amoschinbk

Friday, 27 July 2018

Khrih Sungah Mithar (Siamthar Mi) Sinak


Khrih Sungah Mithar 
(Siamthar Mi) Sinak
(2 Korin 5:17) Zozo khal Khrih thawn an pehzom awk tikah cun a nun hlun cu  a cem ih nun thar a thok zo.


Jesuh Khrih ah Pumkhat Sinak
Thihnak:          Rom 6:6 (Kan nunhlun cu Khrih thawn thinglamtah parah khen cih a si zo)
                        Rom 6:8 (Khrih thawn a thi tlang, nung tlang ding)
Galati 2:20 (Daan ruangah thinglamtah parah Khrih thawn thahmi kan si zo)
Kolose 3:3 (Khrih thihnak ah kan thi zo ih nunnak taktak cu Khrih thawn
        Pathian sungah thun mi kan si)
Phumnak:        Rom 6:4 (Baptisma: Amah thawn phum, Amah vekin a thar in nung ding)
Kolose 2:12 (Baptisma: Amah thawn phum, Amah vekin a thar in nung ding)
Thawhsalnak: Johan 6:54 (Jesuh: Ka taksa ei, thisen in tu cu kumkhua nunnak ah ka tho ter ding)
                        Johan 11:25 (Zokhal keimah i zumtu tu thi hmasehla a nung ding)
Kolose 3:1 (Nunnak ah Khrih thawn thawhter mi kan si zo)
Efesa 2:6 (Khrih thawn uk tlang dingah in thoter sal zo)

Pathian Fa (Christian / Zumtu) Pawlih Hlawknak


Pathian Fa (Christian / Zumtu) Pawlih Hlawknak


Pathian Khuakhannak
Khaukhihnak: Rom 8:29; Efesa 1:11
Hrilnak: 1 Thesalon 1:4; Rom 8:33; 
     Kolose 3:12;  Titas 1:1; 1 Pet. 2:4; Matt 22:14
Kawhnak: Rom 9:11; 1 Thesalon 5:24

Pathian Hnen Thlennak
Remnak: 2 Korin 5:18; Kolose 1:20; Rom 5:10; 2 Korin 5:20
Tlennak: Kolose 1:14; 1 Peter 1:18; Rom 3:24
Pehzomnak: Efesa 2:12-18; Rom 5:2; Hebru 4:14-16; 10:19-20

CALAI THUTAWI

CALAI THUTAWI

Tuanthu (Thuanthu) Tawi: 
* Leitlun ih calai hmaisiabik cu Egypt calai le Sumerian  calai pawl hi a si ding tiah thuanthu thiam pawlin an sim.
* Atui kan hmanmi cahnah ih nganmi calai cu Tuluk ramih serthokmi a si.
* India calai khal calai lamah mi hmaisabik dunthluntu a si ve.

Chin Calai (Chin Literature)
* Lakher (Mara) ca ngandan cu kum 1852 ah Capt. S.R.Tikell in a tuah.
* Mizo ca ngandan cu Kum 1874 ah Lt. Col. Thomas Herbert Lewin in a tuah.
* Kuki ca ngandan cu kum 1874 ah C.A Soppit in a tuah.
* Siyin ca ngandan cu kum 1891 ah Capt. Rundal in a tuah.

Tuesday, 10 July 2018

SATAN HNAṬUAN

SATAN HNAṬUAN
*Satan in Pathian kan zumnak, kan rinsannak le tuartheinak kan neihmi parah in hniksak ṭheu. Pathian dokalh zawngih thiltuah dinghi Satan ih tumtahbik a si. Matt. 4:11-11; Job 1:6-2:10
* Pual in milai a mawhthluk tum lo, Kawhhran sungih hlawhtlin lonak hi Satan ih thlemnak, Satan ih dawnkhamnak a si zia fiangten a thei.
1 Thessalon 1:18 Nanmah ra tlawn sal kan duh. Kei tla cu voi tam nawn nanmah ra tlawng dingah ka tum rero nain Satan in kan lamzin in kham ṭheu.
1 Thessalon 5:5 Curuangah Timote ka hun thlah. Nan thuhla zianghman thei loih um cu ka tuar thei nawn lo ruangah le nan zumnak thu theih ka duh ruangah ka hun thlahnak a si. Satan in a lo thlem ding ih kan hnaṭuanmi hmuahhmuah a lakah a cang ṭheh pang pei ti ka phang.
* Pathian hna ṭuan phah, Amah rian phah cingin Satan Lungawizawng tuah pang a olte.
Vei tampi Pathian duhnak hnakin kanmai duhnak thupitter in thil kan tuahpang caan ah
a netnak ahcun Satan lungawizawng a rak si ṭheu.

Aw...Thihnak Nunnak

Aw...Thihnak
Aw... Nunnak
Kan suak kan thi
Kan sual kan thi
Kan lungawi kan thi
Kan hlawhtling kan thi
Kan mawi kan thi
Kan hmelsia kan thi
Kan nun a sau kan thi
Kan nun a tawi kan thi
Kan duhlo khalle kan thi
Kan sianglo khalle kan thi
Kan man hrih lo khalle kan thi
Kan nun theinak dingah kan thi.
“Kei cu thawhsalnak le nunnak ka si. Zokhal keimah i zumtu cu thi hmansehla an nung ding. Zokhal keimah sungah a nungmi le i zumtu cu an thi nawn lo ding." Johan 11:25-26

Tluangdang Lailungrawn - GE-14

Tluangdang Lailungrawn
Mei a thim zawhlam a daiZinpi zinte tthing ririah
An hril mi an thlir mi
An hram an hlam
Cui zan ah...

Thla a ttem lung a phang
Darkhing awn ralrinnak
An tum dar tum dar
Sunnak nehnak
Cui zan ah...
Ramdang mi vaivaak mi
Ralring ralring uh tiah
Tualsung mi leng mi
Hnihnak ttahnak
Cui zan ah...
Thlapi thim seh Ninu eng seh!
Rallian kiang seh Rualtha hram seh!
Tuarnak dem seh Uannak kiam seh!
Remnak leng seh Daihnak leng seh!
Malaysia!

Malaysia GE-14 Election zan ih ngan mi.

NEHNAK

NEHNAK

Saam 20:7 "Mi hrekkhat in an raldonak rangleng an ring,
A hrek in an rang an ring; Asinan kannih cun
Bawipa kan Pathian ih cahnak kan rinsan."

Kiosa sinak hin ramsa zaten nehnak a si lo
Kiosa ih cahnak lawng hi ral nehnak a si
Kiosa thazang neih lo cun san a tlai lo
Kiosa cu Kiosa si ko hmansehla
Kiosa a sinak in a runaw thei lo.
Nehnak cu sinak dinhmun a si lo
Nehnak cu sunglam ih thazang a si
Nehnak cu hmuh theih lo cahnak a si
Nehnak cu neihmi thahram cahnak a si
Nehnak cu tuartheinak thazangih rah a si.
Pathian cu nehtu a si
Satan cu sungtu a si
Zumtu cu nehtu kan si.
Amen.

Thihnak

Thihnak
World Cup:
Team tampi an thi zo
Team tampi an thi lai ding
Team khat siar lo an thi theh ding...
Sualnak:
Adam a thi ticun Eve khal a thi
Abraham a thi ticun Sarah khal a thi
Sualnak ah mi hmuahhmuah kan thi...
Tuarnak:
Sual man cu tuarnak-thihnak
Zum lo cu sualnak ih sual tumbik
Sual tumbik cu Jesuh zum lo sualnak...
Nunnak:
Jesuh a thi sualnak a thi
Amah a nung sualthihnak a neh
Amah zumnak sual le thih nehnak...
Thihnak Nunnak:
Jesuh kan zum kan sual kan thi
Jesuh kan zum kan nun kan nung
Amah lo cun thihnak, Amah thawn cun nunnak..
A hmaisa maw neta cu lawnglawng!
Nunnak hril sawn uh si.

D- June 26, 2018