THEI KAU TUAN MAL

THEI KAU TUAN MAL

                                

Thuhmai hruai

“Nei lo hnakin thei lo a har sawn,” timi tongfim hi a ol zawngin kan pom hmang. Pacang pa pakhat cun a note-book ah “thei na in nei silo ah cun thei lo ih nei lo hnak in a har sawn,” tin a ngan. Kan harsatnak a tamsawn hi kan thei lo ruangah maw kan  nei lo ruangah a si pei. Asilole kan thei nain kan nei lo ruangah a sisawn pei maw. Cuih thu cu himi cahram  nih a  cangtheitawk tarlang ding tumtah in ngan mi a si.

Theihnak

Theilo tikah tuah a theih  lo vek in, tuah lo ahcun nei a theih ve lo. Mifimthiam pawl vek in ceet (engine), computer le thil dangdang tampi kan tuah ve thei lo. Ziangahtile a tuah dan le a tulmi pawl kan nei lo ruangah a si. Mifim pawl cun an theimi thu pakhat cu a tuahsuak tikah thu dang tampi an theibet ih thildang tampi an tuah. Nang le kei teh kan thei lo ruangah kan tuah lo a si maw, kan tuah lo ruangah kan thei lo a sisawn pei. Laimi pawl in kan thei ih kan tuah theimi, kan tuah lo mi thil tampi a um.

Fimnak

Laimi kan thangso sinsin theinak dingah kan hawl ding thupi bik pakhat cu fimnak a si. Ziangahtile

laimi hnenah Pathian  in fimnak thluasuah a pek tihi a fiang. Cun, mifim pawl in ziang an tuah, ziangtin an tong,  ziangtin an nung ih khua an sa tihi kan thei. Kan lai pupa tongfim ah tuah tha, tuah tha lo tampi kan thei, Bible (Proverbs) sungah mifim nun dan le fimnak lamzin tampi a um, kan thei. Asinan mifim kan bang lo nakzawn a tam ko. Fimnak thu kan thei lo ruangah maw mifim nun kan nei lo ruangah so, laimi in phun le hnam,  calai thu ah a phunphun  in ka elawk lawng silo kan hua awk bet lai? Thil thupi a suahpi lomi elawk nak cu el awlnak thahnem lo a si.  

Hnatuannak

Laimi (tlangmi) cu mi farah kan tam. Kan farahnak, kan nunharnak a san tampi a um. Kan leiram a cul tuk. Hna kan tuannak ah santhar fimthiamnak kan nei mal lai. Kan lamzin a har. Thil zuar nak ding le lei theinak ding hmunhma tha lairam ah kan nei mal. Cawm cawk lo ding khopin fahring innsang kan tam. Curuangah lairam tan in kawlrawn, ramdang ah kan vai cuahco a silo maw. Asinan kan vainak ram pawl khalah kan nun a har thotho. Ramdang kan thlen khal le mi tamsawn in kuli kan tuan. Hnatuan dan, paisa hawl dan, kan thei lo ruangah maw, kan thiam lo ruangah so—ziang tin na ruat ve? Culaiah u nau laimi hrekkhat cu an lian, an nei zetzet fawn. Asile, thu kan thei a tlai maw, kan thei vekin kan tuah lo maw, a tuah (tuan) dan kan thiam lo maw, kan zangzel ruang ah so? Khui khua khui ram khal ah laimi kan nun a har.

Biaknak

Laimi hnakin biaknak lam a buai celcel miphun dang a um nawn pei maw. Khrihfabu thenthek tla ziang poi kan ti lo, thiltha tuah vek in kan ruat sawn. Khrihfabu sung hruaitu pawl lungrualnak a um thei lo. Pawlkom nak Area ah, Association ah, Convention ah kan buainak a kai vivo. Mipi  in hruaitu pawl, hruaitu in  mipi pawl, mipi le hruaitu in pastor pawl  mawh kan puh awk, relsiat awknak a tam.  Pathian duhnak le zumtu nun Bible ih zirhmi kan thei lo teh a simaw. Cule kan buainak kan remlonak pawl hi remhthat saltu ding cu miphun dang an si lo. Laimi kan lungput le kan nun remsal kan tul tihi kan thei awk cio mi thudik a si.

Harhdamnak

Laimi cu hnatuan hrang a tuanmi    miphun kan si. No lai, cak lai ah thazang kan hmang thiam lo theu. Curuangah kum 40 kiangkap kan si cun ka el a na, ka  pumpi a na, ka liang a na, ka haa a na, ka nauinn a damtha lo tin kan natnak kan sim kan rel.  Ziangahso, thazang hmang thiam lo ruangah natnak tampi kan tuar ti kan thei awk lo a si maw. Taksa thianhlimnak kan daithlang maw, tikcu ruat lo in ei le in tha lo kan ei kan in maw. Nu le pa tampi an thiangfainak an daithlang, mino tampi ei, in, hmuam, khai tha lo kan hmang—kan khop thei lo.  A tha lo ti kan thei lo ruangah kan tuah rero siding ahcun a awm lo ngaingai.

                                                             

Refugee

Kan suah semnak leiram tanta in  lai le kawl khuate fa pawlin leitlun ih khuapi tumbik le ram tumbik  ah kan pan vurvo thei hi zoih khuakhan nak a sipei? Israel thuanthu hi laimi cun kan theih cio mi thu a si. Refugee kan sinak ah ka laimi nunzia mawi le zumtu kan sinak pawl kan thlauthla pang maw.

Thuphan thiang (rang) kan per kan tinak zawnah kan nun a borhhlawh cih pang maw. Kawlram in siesh, ramdang in siseh pastor le pawlkombu hruaitu pawlin profet Amos bangin an au thawng laimi hnenah a thang. Hla phuahtu le ca ngantu pawl khal in laimi refugee pawl hnenih thucah mi a mal nawnlo. Mi khua mi ramah mi nun cawngthiam cu a thazet, Pathian theilo pawl nundan le tuahmi cu cawng ding a si hrim lo. Kan theimi thu cu laimi kan nun remhthat nak  hrangah si  hram seh.

Thu netnak

A ngaingai ah cun, laimi pawl hi leitlun nun thu theitu kan si. Ziangahtile  nun nuam thu kan thei ih nun harsa tla kan tep. Ramdang mi hausa tampi cun farah nun an thei zik lo ih, an tep zik lo. Asinan, thutha thlun lo in tampi kan thei men. Nundan tha tampi kan thei nan laimi kan nun (kawlmi, ramdangmi) karah a mawi lo vivo. Laimi covo co ngah lo in tampi kan sung. Hihhi, thu kan thei lo ruangah a silo so khaw, kan tuah lo ruangah a sisawn. Thei lo hi nei lo nak a siih nei lo khal hi thei thei lo nak a si. Cun thei silo nei silo cu harnak lam a siih thei si nei silo cu harnak taktak a si. Curuangah laimi kan za in “ theikau tuanmal” kan nunzia tannin “ theikau tuantam” si dingin rak zuam cio uhsi.

Note: FCC - Shekhem Mekazin (2011) ih suahmi ah ka ngan mi a si.