Paul ih Zirhmi Kawhhran Hruaitu Nun

Paul ih Zirhmi Kawhhran Hruaitu Nun

Kawhhran Hruaitu cu Ziangkim ah Zohthimtlak An Si (1 Tim. 3:1-13; Titas 1:6-9).

Kawhhran hruaitu si a duhtu cu hnatuan tha duhtu a si tiah Paul in fiangten a sim. Cuih Kawhhran hnatuan a duhtu cun ziangkim ah zohthimtlak nunzia neih a tul ih soiselnak nei lo mi a si ding. Pual ih zirhnak khaikhawm tikah a tanglam vekin a si.

     A si ding

1. Soiselnak nei lo mi

2. Nupi pakhat lawng neitu

3. Rit theinak thil ih suup aw thei mi

4. Mah le mah a uk aw thei mi

5. Felfai zohrem in a nung mi

6. Mikhual zohthiamtu  

7. Mizirh thiamtu

8. Mi lungneem

9. Daihnak duhtu

10. Innsang kilkhawi theitu

11. Misenpi ih upat mi

12. Ziaza tha a nei mi

13. Thinlung tluangtlam mi

14. Thinlung thiang thawn thutak pomhngettu

15. Mi ding, mi thiang le suuptheinak neitu

    A si lo ding

1. Zuu rit hmangmi a si lo ding

2. Thinsuup aw thei lo a si lo ding

3. Midang thawn to aw theu mi si lo ding

4. Tangka duhtuk mi a si lo ding

5. Mi puarthau, thintawi helhlong a si lo ding

Kawhhran Hruaitu cu Riantu An Si (2 Tim. 2:24-26).

Jesuh cun hruaitu ih nundan ding dik amah bulpak nun in a hmuhsak. A dungthluntu pawl ih ke a kholh sak. A dungthluntu pawl a uk in a uk lo, tangdornak thawn a rian sawn. Cuvekin Kawhhran hruaitu cu zumtu pawl ih tulsamnak aiawh theitu a si dingih, zumtu pawl parih lal duh thuneitu a si lo ding. Mi thawn hau aw rero lo, mi zangfah thiamtu, thinsau in mi zirh thiamtu a si ding. 

Kawhhran Hruaitu cu Tuukhaltu An Si (Tirh. 20:28). 

Tuukhal tha cun tuu pawl a cawm tha, a kilhim, hramhring le tithiang umnak ah a hruai. Sahrang le ral dangdang ih siatsuahnak in tuu pawl a kilhim. Kawhhran hruaitu cu tuukhal tha vek a si. Zumtu pawl Pathian duhnak ah  a hruai ih Satan sualforhnak ah tla lo dingin a kilhim. Zumtu pawl ih thinlung, taksa le thlarau pitlinnak dingah nun pek ngam tiangin a raltha.

Kawhhran Hruaitu cu Khrih Nundan Cawngtu A Si Ding (1 Kor. 11:1). 

Paul cun Khrih nundan hi a zohthimbik mi nundan a si. Kawhhran hruaitu khal in a pakhatnak ih zohthim dingmi nundan cu Khrih nundan hi a si. Bawi Jesuh Khrih cun duhdawtnak, ngaidamnak, zangfahnak, zawnruahnak, tirhsiannak, bangrannak, thungainak, thatnak phunkim a zirh ih cumi cu hruaitu pawl in nunpi rori ih zumtu mipi hruai ding hi Paul ih zirh duhmi a si.