Billy Graham: Pastor Cuaitah (Relsiat) cu Sual A Si

Billy Graham: Pastor Cuaitah (Relsiat) cu Sual A Si

Ziangruangah mi hrekkhat in pastor pawl ih tlamtlinlonak relsiat hi an diriamtuk si pei? Ka mitheihmi hrekkhat cun Pastor pawl ih tipalhnak le tisualmi pawl lawnglawng rel ih simsiat a hmangtu an um. Cupawl hnen ah hitin sim ka duh.

Sawiselbo pastor tlamtling a um lo. Cuti si cingin Pathian cun a ko ih a tuurun khaltu dingah hriak a culh, curuangah bom le thazang pe an tul a si. Bible in, “Tuahmawh hrimhrim hlah aw. Bawipa ih sahriak a culh ciami siangpahrang a tuahmawhtu pohpoh cu hremnak tuar loin an luat lo ding.” (1 Samuel 26:9)

Cutin titikah pastor pawl hi an sualpalh ih an hnatuan le tuanvo ziangsiarlo ih an um khalle sualphawt an luat ding tinak a si maw? Sihlah ee, Kawhhran hruaitu hrekkhat pawl cu ziangkim hi bangran mit thawn zoh tum lo in Kawhhran daan le Admin ih thuneihnak hmangin sualmit hlir in thil an hmu theu. Paul in Conrin Kawhhran hnen ah hitin a sim, “Ziang hmuahhmuah cu rualremte le zoh mawite in tuah ding an si.” (1 Korin 14:40)

Riahsiatza a si, kawhhran member hrekkhat tla pastor relsiat ta rori nuam an ti ka thei.

Cutin hnatuan tha tuan pastor vekah an ruat aw. Ziangruangah ti ka thei thiam lo, mi in kan thu hi dik ti haiseh tin an ruat-aw si pei maw. Ziangziang khalle, pastor relsiat dodal cu a diklo mi a si, Pathian mithmuh ah sual a si. Kawhhran ah tumsuknak a suahpi lawng si lo, an thinlung hrimhrim Pathian thu lun, ngai duhnak sangka an khar-aw a si.

Na pastor hrangah thlacam sak sawn uh, thazang pek in bawm sawn uh. Hitin hna an tuan theinak dingah thlacam sak uh, “Pathian ih a lo pekmi tuurual khaaltu si uh; nuar phahih a khaaltu si loin Pathian ih duhnak bangtuk in thinlung thote ih a khaaltu si uh. Hna nan ṭuan tikah hlawhman ngah duh ruangah si loin duhnak taktak thawn ṭuan sawn uh.” (1 Peter 5:2).

-Charisma News(11-3-2015)

Siarbet dingah:

*** Miriam le Aaron in Moses an simsiat ruangah Miriam cu pharnat a tuar (Mipum. 12:10)

*** Israel mipi pawlin Pathian le hruaitu Moses an thangsiat tikah Pathian in an parah micuk hrang rul tur nei tampi a thlah ih Israel mi pawl an cuk ih mi tampi an thi

(Mipum. 21:5-6)

*** Korah, Dathan le Abiram le midang 250 pawl in Moses le Aaron an dodal ruangah leikak in a dolh thluh.  (Mipum 16:31-34)

*** Mipa nauhak hrekkhat in Elisha an zawmtai ruangah Vom pinu pahnih in nauhak ( 42) an bauhthlek theh.  (2 Siangpahrang 2:23-24)

*** Jesuh thihnak thureltu Pontius Pilate khal mahte a thataw tiah thuanthu a um.

*** Jesuh zuartu Judas khal lungsir in mahte a that aw sal (Matt. 27:5)

*** Mifir thinglamtah parih khaimi pahnih lakin pakhat sawn cun Jesuh a dodal ruangah vancung a thleng ve lo.

*** David parah Sual in thil thalo tampi a tuah nan David cun Pathian hriakculh mi a si ruangah kutthlak in lehrul a tum lo (1 Samuel 26:11).