THLARAU THIANGHLIM

THLARAU THIANGHLIM

Pathian A Sinak  (Matt. 12:31-32; Marka 3:25; Heb. 10:29).

Fiangtein ka lo sim: milai in ziangvek sualnak an tuah ih ziangvek ṭong siava an ṭong khal le ngaithiam theih an si. Asinain Thlarau Thianghlim a thangsiattu cu ngaithiam an si lo ding. ³²Milai Fapa

a relsiatu cu ngaithiam theih an si ding. Asinain Thlarau Thianghlim a relsiatu cu atuih sanah siseh, hmailam sanah siseh, ngaithiam an si lo ding. (Matt. 12:31-32)

Sikhalsehla Thlarau Thianghlim a thangsiattu cu ngaidam a si lo ding, ziangah tile kumkhua daih sualnak a tuah a si,” tiah a ti. (Marka 3:25)

Cuti a sile, Pathian Fapa ziangih a siar lotu le sualnak ihsin mi a thianfaitertu Pathian thukamnak thisen nautattu le, zaangfahnak a neitu Thlarau a hmuhsuamtu pawl teh ziang bangtuk in tuah an si pei? Cubangtuk minung cu ziangtlukih a nasami hremnak an tuar ding tikha ruat hnik uh! (Heb. 10:29)

Bawmtu Thlarau Thianghlim a siih, thu in zirhtu khal a si (Johan 14:26; 14:16-17).

Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding. (Johan 14:26)

Pa hnenah ka dil dingih nan hnenih kumkhua a um dingmi Bawmtu dang a lo pe ding. ¹⁷Amah cu Pathian thutak a langtertu Thlarau a si. Leilung in Amah cu a hmu thei lo ih a theih thei fawn lo ruangah a pom thei lo. Sikhalsehla nannih cun nan thei, ziangah tile amah cu nan hnenah a um ih nan sungah a caam ding a si.  (Johan 14:16-17)

Thlarau mi, nunthar ih in siamtu a si (Johan 3:5-8).

Jesuh in, “Thungaite in ka lo sim: zokhal tidai le Thlarau in hrin sal a si lo ahcun Pathian Uknak sungah a lut thei lo ding. ⁶Minung cu taksa lam cun a nu le a pa sung ihsin hrinmi a si; sikhalsehla thlarau lamah cun Thlarau ih hrinmi a si. ⁷Hrin salmi na si a ṭul ka ti tikah na mangbang hlah. ⁸Thli cu a duhnak poh ah a hrang; a thawm na thei, a sinain khuitawk ihsin a ra ih khuilamah a feh ding ti na thei lo. Thlarau ih hrinmi khal cu cubangtuk in an si,” tiah a ti. (Johan 3:5-8)

Pathian fa kan sinak aamahkhan le hminsinnak a si (Efe. 1:13-14; 4:30).

Nan hnenah rundamnak a thlentertu Thuthang ṭha a dikmi thuthang cu nan theih tikah nannih khal Pathian minung nan si ve. Khrih nan zum ih Pathian in amah ih ta nan sinak langternak ah hminsinnak cu nan parah a khen; cuih hminsinnak cu pe dingin a lo tiam ciami Thlarau Thianghlim kha a si. ¹⁴Pathian in a minung hnenah a kam ciami kan ngah tengteng ding ti langternak ah cuih Thlarau Thianghlim cu aamahkhan a si ih a minung hnenah cun luatnak tlamtling in a pe ding ti kan theih fiangnak tla a si fawn. A sunlawinak cu thang\hat si ko seh. (Efe. 1:13-14)

Pathian Thlarau Thianghlim kha riahsiater hlah uh; ziangah tile Thlarau cu Pathian ih ta nan si ti hminsinnak a si ih Pathian in a lo luatternak Ni a ra thleng ding ti theihnak aamahkhan a si. (Efe. 4:30)

Pathian thu Cathianghlim, phuangtu le fiantertu fimnak a si (1Pet. 1:20-21; 1 Kor. 2:10-15).

Thil dang hmuahhmuah hnakin himi hi ciing ṭha uh: zokhal amah bul in Ca Thianghlim sungih profet thusimmi kha a fiangter thei lo ding. ²¹Ziangah tile profet ih thusimmi cu milai duhnak meen ihsin

a rami a si lo; Pathian hnen ihsin a rami thuthang an phuan tikah Thlarau Thianghlim forhfialnakin an phuanmi a si. (1Pet. 1:20-21)

Cuih a thuthup cu Pathian in kan hnenah a Thlarau in a phuang. Ziangtin a si tile Thlarau in ziang hmuahhmuah kha a hawlsuak ih Pathian ih tumtahmi thuk bik hman a pur ngah a si. ¹¹Minung hi

a sungih a ummi a thlarau lawng in a thinlung sungih thu cu a thei. Cuvek thotho in Pathian Thlarau lawng in Pathian ih sung thu cu a thei a si. ¹²Kan ngahmi thlarau cu leilungih thlarau a si lo; Pathian ih thlahmi Thlarau a si sawn. Pathian ih in pekmi laksawng hmuahhmuah kha kan theih theinak dingah Pathian Thlarau cu kan ngah zo a si. (1 Kor. 10:12)

Thlarau minung a si lomi pawl cun Pathian Thlarau hnen ihsin a rami laksawng cu an co thei lo;

a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si. ¹⁵Thlarau a neitu cun ziang hmuahhmuah kha a ṭhat a siat vekin an thleidang thiam; sikhalsehla amah cu zohman in an mawhthluk thei lo.

(1 Kor. 2:14-15)

Pathian fa in cantertu a si. Nunnak kan co theinak, nunnak petu a si (Rom 8:1-17; Gal. 4:6-7).

Ziangah tile Khrih Jesuh thawn pehzomnak thawngin nunnak in petu Thlarau ih daan in sualnak le thihnak daan sung ihsin in luatter zo. (Rom 8:2)

Minung sinakih a ukmi pawlih ton dingmi cu thihnak a si; Thlarau ukmi pawlih co dingmi cu nunnak le daihnak a si. (Rom 8:6)

Khrih nan sungih a nun ahcun Thlarau cu nan hrangah nunnak a si; ziangah tile sualnak ruangah nan ruangpi cu a thi ding nain nannih cu Pathian thawn remtermi nan si zo. ¹¹Thihnak ihsin Jesuh

a thawhtertu Pathian ih Thlarau nan sungih a nun ahcun thihnak ihsin Khrih a thawhtertu Pathian in nan sungah a Thlarau a umternak thawngin a thi theimi nan taksa ruangpi cu nunnak a pe ve ding a si. (Rom 8:10-11)

Pathian Thlarau ih hruaimi pawl cu Pathian ih fa an si. ¹⁵Ziangah tile Pathian in a lo pekmi Thlarau cu sal ah a lo tuahtu ding Thlarau a si lo ih ṭihphang in a lo tuahtu khal a si fawn lo. Cuih Thlarau cun Pathian ih fa ah a lo canter ih Pathian hnenah, “Abba, Ka Pa,” tiih kan au theinak thazaang in petu khal cu Thlarau a si. (Rom 8:14-15)

Cule a faale nan si langternak ah Pathian in a Fapa ih Thlarau cu kan thinlung sungah a run thlah.

Kan thinlung ihsin, “Abba, ka Pa,” tiah a autu cu cuih Thlarau cu a si. ⁷Cuti a si ruangah sal nan si nawn lo; fa nan si zo! Cutiin a fa nan si ruangah Pathian in a rocotu ah a lo tuah zo. (Galati 4:6-7)

Khrih ih Rundamnak thuthup, Thutak phuangtu a si (Efe. 3:5; Jn. 15:26; 16:13-15).

 Hlanah cun cuih thuthup cu milai hnenah phuan a si dah lo; sikhalsehla atu-ah cun Pathian in

a thiangmi a tirhthlah le a profet pawl hnenah a Thlarau in a phuang zo. (Efe. 3:5)

Ka Pa hnen ihsin Bawmtu Thlarau a ra ding ih amah cu Pathian thutak langtertu a si ding. Ka Pa hnen ihsin ka run thlah ding ih keimah ih thuhla simtu a si ding. (Johan 15:26)

Sikhalsehla Thlarau a run tikah cun Pathian thutak langtertu a si ruangah thutak hmuahhmuah ah a lo hruai ding. Ziangah tile amah ih thuthu in zianghman a ṭong lo ding; a sinain a theihmi kha a sim ding ih a ra thleng leh dingmi thu tla kha a phuang ding. ¹⁴Amah in sunlawinak i pe ding, ziangah tile ka sim ciami kha a lak ding ih nan hnenah a phuang ding. ¹⁵Ka Pa ih neihmi hmuahhmuah cu ka ta a si, curuangahThlarau in ka pekmi cu a la ding ih nan hnenah a phuang ding, tiah ka lo tinak a si.

(Johan 16:13-15)

Gentile pawl in Jews pawl thawn bangrep in Pa (Pathian) kan thei theinak le Pa ih innsang sungtel kan si theinak cu Thlarau thawngin a si (Efe. 2:18 – 19; 1 Kor 12:12-13).

Khrih ruangah Judah mi siseh, Zentail mi siseh, kan zatein Thlarau pakhat thawngin Pa kan nei thei. ¹⁹Cuti a si ruangah nannih Zentail mi pawl ramdangmi le khuatluang nan si nawn lo; Pathian ih miphun pawl thawn laikhat le Pathian innsaang ih sungtel nan si zo.(Efesa 2:18-19)

Khrih cu taksa ruangpum bangtuk a si. Taksa ruangpum cu pakhat a sinain taksa ṭhen cu tampi an si. ¹³Cubangtuk in kannih khal hi Judah mi le Zentail mi, miluat le sal tiin um hman nungla kan zate hin cuih ruangpum pakhat sungah cun Thlarau pakhat ih baptisma lami kan si ih kan zate hin cuih Thlarau pakhat cu in tlaang dingah tuahmi kan si. (1 Kor. 12:12-13)

Thlacam dingih zirhtu, hruaitu a si (Efe. 6:18). Himi pawl nan tuah tikah thlacam phah in tuah uhla Pathian hnenah bomnak dil uh. Thlarau ih a lo hruainak bangtuk in ziangtik caan pohah thlacam uh. Hi ruangah ralring ciain um uhla nan beidong hlah uh. Pathian minung pawl hrangah cat loin thlacam uh.

Pathian lung tong in thla in camsaktu le bawmtu a si (Rom 8:26-27).

Cuti vek ṭhiamṭhiam in kannih cu a ṭawnṭaimi kan si ruangah kanmah bawm dingah Thlarau a ra. Ziangtin so thla kan cam ding ti hman kan theih lo laiah, hmurka hmanin simsuak thei lomi hrum-ainak thawn Thlarau in kan hrangah Pathian hnenah in dil sak. ²⁷Cule kan thinlung a hmutu Pathian in Thlarau ih ruahmi cu ziang a si ti a thei; ziangtin tile Pathian duhzawng in a mithiang pawl hrangah Thlarau in Pathian hnenah in dil sak a si.

Thlarau laksawng petu a si (1 Kor. 12:4-11).

Thlarau laksawng cu a phunphun a um, a sinain cuih laksawng pawl hmuahhmuah a petu cu Thlarau Amahlawng a si. ⁵Bawipa ih hnaṭuan hi a phunphun a um, a sinain kan renmi Bawipa cu Amah pakhat lawng a si. ⁶Hnaṭuan theinak hi a phunphun a um, a sinain cuih hnaṭuan theinak cu zozo hnen khalah an tawkzawn ciar in a petu cu Pathian Amah thotho a si. ⁷Kan hnenih Thlarau a um kha phunkhat khat in a lang ih cumi cu miseenpi ṭhathnemnak hrangah a si. ⁸Thlarau in mi pakhat cu fimnak thawn simthiamnak a pek ih a dang pakhat cu cuih Thlarau in theihnak thu simfiang thiamnak a pek. ⁹Cuih  Thlarau thotho in mi pakhat cu rinnak a pek ih midang pakhat cu mina damter theinak a pek. ¹⁰Thlarau in mi pakhat hnenah mangbangza tuah theinak a pek ih a dang hnenah profet bangin thusim thiamnak a pek; a dang pakhat hnenah Thlarau laksawng thleidan thiamnak a pek. Cuvek thotho in mi pakhat hnenah theih lo ṭong ih ṭong theinak a pek ih midang hnenah cutiih an ṭongmi simfiang theinak a pek. ¹¹Hi hmuahhmuah a petu cu Thlarau pakhat lawng a si; Amah ih duh vekin laksawng dangdang kha pumpak hnenah a pek fingfing.

Pathian cu Thlarau le thutak in biak ding a si (Johan 4:23-24; Filipi 3:3).

 Sikhalsehla Pathian Thlarau hruainak thawngin Pathian a bia taktaktu in Pa cu thlarau le thutak thawn an biak caan a ra thleng ding; a si, cuih caan cu atu-ah a ra thleng zo. Cutiih biak cu Pathian in a duhmi a si. ²⁴Pathian cu Thlarau a si ih a biatu pawl in thlarau le thutak in an biak ding,” tiah a ti. (Jn 4:23-24)

Hminsin: Hitawk ih “Thlarau” tile “thlarau” tiih cangfang ngandan hi ahhin,

King James Version (KJV) cun “spirit and truth” “God is Spirit” tin a ngan.

New International Version (NIV) cun “Spirt and truth” “God is spirit” tin a ngan.

English Standard Verson (ESV) cun “spirit and truth” “God is spirit” tin a ngan.

Annih si loin kanmah sawn hi a dikmi serhtannak a cotu kan si; ziangah tile Thlarau in Pathian kan bia ih kan nunnak cu Khrih Jesuh thawn kan pehzom awknak ruangah lungawinak in a khat. A lenglamih tuahmi parah zianghman rinsannak kan nei lo. (Filipi 3:3)

Fianternak: “Annih” timi hi Moses daan thluntu Judah mi zirhtu pawl an si.

Thlarau Thianghlim thawngin “Jesuh cu Bawi A Si” tiah kan au thei hi a si (1 Kor. 12:13).

Asinain Pathian Thlarau ih hruaimi pawl cun, “Jesuh cu siatserh si ko seh,” an ti thei lo ding ih Thlarau Thianghlim ih hruaimi pawl lawng in, “Jesuh cu Bawi a si,” an ti thei ding. (1Kor. 12:13)

Pathian ih Thlarau umnak inn kan si (Efe. 2:22; 1 Kor. 3:16; 6:19-20).

Amah thawn nan pehzom awknak thawngin nannih khal amah zumtu dang pawl thawn Pathian in a Thlarau a umnak dingih innah a sak cihmi nan si. (Efe. 2:22)

Nannih cu Pathian biakinn nan si ih a Thlarau nan sungih a um kha nan thei lo maw? ¹⁷Curuangah zokhal hih Pathian biakinn a siatsuahtu cu Pathian in a siatsuah ve ding. Ziangah tile Pathian biakinn cu a thianghlim ih a biakinn cu nanmah hi nan si. (1 Kor. 3:16-17)

Nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah

a um ih Pathian ih pekmi a si. Nannih cu nanmah ih ta nan si lo, Pathian ta nan si. ²⁰Man pek ih leimi nan si. Curuangah nan taksa cu Pathian sunlawinak ah hmang uh. (1 Kor. 6:19-20)

Thlarau ih rahsuahmi cu minung tisa duhnak thawn an ralaw a si (Galati 5:1-26).

Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, ²³nunnem tangdornak le suup theinak tla an si. Cubangtuk rah umnak ahcun daan cu a ṭul nawn lo. (Galati 5:22-23)

 Ziangtik caan ah Thlarau Thianghlim ih umpinak, ziangtin na co ṭheu?

Thlacam tik ah                   _______________________________                     

Hlasak tikah                      _______________________________

Hla, sermon ngai tikah      _______________________________

Biakkhawm tikah              _______________________________

Bible siar tikah                  _______________________________

Harsat ton tikah                 _______________________________

Damlo tikah                       _______________________________

Ahlu pek tikah                   _______________________________

Mahlawng um tikah          _______________________________

A dangdang…

10.  _____________________

Thlarau laksawng pawl ngan aw                               Thlarau rah pawl ngan aw

1.________________________________                 1. ___________________________________

2.________________________________                 2. ___________________________________

3.________________________________                 3. ___________________________________

4.________________________________                 4. ___________________________________

5.________________________________                 5. ___________________________________

6.________________________________                 6. ___________________________________

7.________________________________                 7. ___________________________________

8.________________________________                 8. ___________________________________

9.________________________________                 9. ___________________________________

10.________________________________               10. ___________________________________

Pathian Thlarau in kan nun lamhruai camcin seh!