KHRISTIAN PAWLIH ATNAK (5)

KHRISTIAN PAWLIH ATNAK (5)
1. Fimnak hrampi Cungnungbik Pathian zum cingin fimnak thupi ih ret lo, mai atnak le fim zir paihlo men ruangah fimnak in Pathian sunlawinak a lang ter lo, Pathian sunlawi nak a hmu ban lo, Pathian duhnak thawn a kalhaw tin Thufim 1:7; 9:10 vekin Pathian ṭihzah nun nei paih lo atnak.

2. Farah hi poi tilo in Pathian remruat sawn a si tiih mai’ farahnak hnemawk le hmaiphaw tuam ah Pathian in mifarah a khaisang ti ringring tho si ih ziangkim neitu Pathian cu farah pathian tluk fang ih hmuhnak, ruahnak le lungput thawn Matthai 6:33 rinsan na’n farah ringring Khristian atnak.

3. Vancung ram cu ka ta ti ngam ringring si in Johan 3:16 lawng rinsan ih hnangam huahhi, 1 Korin 6:9-11 le Galiti 5:19-21 siar paih lo, Jeim cabu tla siar paih lo, thisen kutneh le thinlung balh nun borhhlawh mahte ngaidam aw ringring atnak.

4. Kawhhran hruaitu dingah Pathian thungai piangthar mi hnakin paisa nei, zirsang tapoh full mark pek thluh, Pathian duhmi ka thlun ding ti hnakin Kawhhran ah ka cal lang ve ding ti lungawi phur men ih hruaitu ṭuan. A hriltu khalin mai’ hril mi hman thei ter aw nawn lo in thlacam sakih thapek lamlam fei le naam ṭongkam thawn hruaitu relsiat lo um theilo 1 Thesalon 5:12-13, Hebru 13:17 ziang ih siar lo atnak.

5. Pathian hnaṭuantu si cing khalin Pathian duhmi hnakin mai’ hlawknak hawl ringring ṭanghma sial thuthangṭha au ur-o, mipi khalin Pathian lungawi zawng a si maw, a si lo tiin Bible zohṭhim cuang lo’n ka-naal hnihsuah saithiam ta poh ngaisang ih Satan lungawi ter phahphah, Tirhthlah 17:10-11 siar lo, phuanglo Pathian siahhlawh le thluntu piangthar pawlih atnak.