Riahsiatza India Christian Pawl Hremnak

Riahsiatza India Christian Pawl Hremnak

September 8, Open Doors USA thuthang ih a than mi vekin tulaifang India ram ih Christian pawl Jesuh Khrih dungthlun an sinak ruangah tidai phihsak, rawl lei sianlonak, tlawngkai sianlonak le thlankhur man kaihnak pawl tla an tuar laifang a si.

India ah Christian hremnak a sosang sinsin, ziangruangah so?
2014 ah Christian hremnak nasabik ram (28) nak asinan 2019 ahcun ram (10) nak rori a si. 2018 sung lawngah Christian hremnak vei (775) a um; thahnak (14) a um, hrem tuartu mi (50,819) an siih mipa (18,956) nunau (18,858) le nauhak (12,790) an si.

Hitiih thil umdan zoh tikah 2014 ihsin 2018 karlak hi India Christian pawl hremnak a sosang sinsin ti a lang. Christian le biaknak tenau deuh nunau tampi cu hramhram ih ihpi an si, cucu hremdan phunkhat ah an neihmi a si.

“BIBLE SUAL”

“BIBLE SUAL”
“Bible Sual” hi (Wicked Bible, Adulterous Bible, Sinners’ Bible) tiah kawh a si. King James Bible suah salmi a siih kum 1631 ah Robert Barker le Martin Lucas in London khawpi ah an suahmi a rak si.

Ziangruangah Bible Sual tiah kawh a rak si tile cuih Bible sungah Thukham (10) sungih pakhat ngansual ruangah a si. Cucu Suahlannak 20:14 ah “Ṭangṭawm sualnak nan tuah lo pei” timi zawn ah “LO” pakhat ngan hrelh ruangah a si. Mirang in “Thou shalt not commit adultery” tiih ngan ding asinan “Thou shalt commit adultery” tin ngan sual a rak si. Cucun, a sullam cu “Ṭangṭawm sualnak nan tuah pei” tiah a letling ta riai!

Control Ka Lo Pek (I Give You Control)!

Control Ka Lo Pek (I Give You Control)!

~~~~~~~~~~~~~~~~~~~~~
MMID nehzul, MM Election hrang timlamnak, AA ralbuainak, Australia Meikang, US-Iran buainak pawl thawn January kan lut tlang. 

Veikhat cu ka tomi taxi driver lamzin a fehsual ruangah thlen olnak lamzin i sut, ka theihtuk mi lamzin ti nana cu ol ten ka sim thei. Cutin tluangten tikcu tlai lo ten kan thleng thei. Taxi cu ka mawng lo nain diver cu ka control ko.

US le Iran Buainak Christian Tlang-au

US le Iran Buainak Christian Tlang-au
•••••••••••••••••••••••••••••••••••••••••••••
Nan thei maw, US><Iran buainak le leitlun ralpi hnakih a tihnung sawnmi ralpi cu SUAL ral a si. SUAL ralpi cun meithal, cerek le ralthuam ralhriam a keng lo. Veto power neitu ram lal a simi Trump, Putin, Boris, Philippe, Jinping pawl khal a ngam tuk. Sual sir lo le sualnak tuah man cu thihnak a si Rom 6:23. 

Trump cun US cozah le a ralkap pawl thu a pek thei. Cozah rambawi pawlin anmai' ramri sungah thu an nei. Kan Pathian cun ziangkim, miphun hmuahhmuah tlunah thu a nei (Saam 22:8).

Siar Cawk lo Kum Ka Siar

Siar Cawk lo Kum Ka Siar
Atu caan timi a um lo,... Atu kan ti laiah cuih caan cu a liam cih zo,... A liamcia caan le hmailam caan lawng a um an ti,.... Caantha kan hmang ngahmi zaten an liam zo... Pathian in caantha in pekmi hmang thiam uh si.

Caan hi zohman ih simfiang thei lomi a si,... Caan siarnak nazi khalin cuih caan cu cekci a siar thei lo,... Caan hminsinnak khal a siar thiamlotui hrang man a nei lo,... Caan siarnak sun le zan timi khal hi leilung kapkhat hrang a si,... Caan hi a liam rangtuk kan ti, taktak ahcun a kelte a si ringring.

Second khat hi siar malbik a si lo,... Second khat sungah veisarih ka siar man,... Second khat sungah voi siar cawk lo a um,... Second, minutes ti pawl hi a siar thiamtu hrang men a si,... Kei cun Pathian siardan in semtir hlan ihsin kum ka siar,... Curuangah ka suahcam ah siar cawklo kum ka siar!
(FB August 18)

Khuai hi

Khuai hi...
1. Khuaitizu tuah thei khuai in pumpi pahnih an nei. Pakhat cu rawl hrang, pakhat cu khuaizu hrangah a si.
2. Khuaitizu tuah thei khuai pakhat in nikhat ah pangpar 2,000-5,000 lai a fu thei.
3. Khuai hi Bible ah a langtel mi a si ve.
4. Khuai ahhin hnatuantu, bawinu, le cithlahtu tin an um fingfing.
5. Khuai nun in zir theih mi cu:
- Lungrualnak le pumkhatnak
- Burkhawmnak le hmunkhatnak
- Hnatuan taimaknak le zuamnak
- Iksikawk lonak le huatawklonak
- Tumtah hmunkhatnak le midang hrang thiltha tuahnak

Zuk le video: Chongkak khuai (FB June 27)

"Pa Ni hi..."

"Pa Ni hi..."

1. Pa hi milian, mifim le a thiamthil tlintlaknak ruang lawngah upat si loin semnak, hringtu Pa a sinak ruang rori ahhin upat pek kan si. Cuti si lo sehla upat tlak lo mi Pa kan tamtuk. Bible cun Thufim 23:22 ah (A lo hringtu na pa ih thu ngai aw; Amah um hlah sehla na seem lo ding) tiah in sim a si.

2. Pa a si lomi pai' tuanvo a latu Nu pawl upat tlak an si. Pai' hnatuan a sawngtu zaten upat ding an si ve. Culosehla Pa Ni hi mikip hrang thil remcang lo mai a si. Mi tampi cu Pa veikhat khal hmu ngah lo, Pa ko dah lo (keimah vek) vonlai pai' thihsan mi khawvel ah kan tam tuk. Mi tampi cu sentet laiah pai' thihsan an si. Mi tampi cu Pa nung lai nan tong ngah hrih lo, pai' kut veikhat khal kai hrih lo ralhla ih thenawk an tamtuk. Mi hrekkhat phei cu Pa hman theih sian lo mi an um sisi. Hibangtuk fate hrangah Pa Ni cu ruahnak titamtu le thinlai kekkuai nak ni duhnung lo men a si.

Zumtu Zalennak

Zumtu Zalennak
Zumtu hi a zalen mi kan sinan pumpak zalennak si loin Kawhhran sungah burkhawm zalennak le kaihhruainak sungah a um mi kan si. Cuih ramri kan lan ahcun Satan thangkam ah awk a ol tuk.

Lungawinak...
Zumtu pawl hmunkhat ih umkhawm le Pathian thu sungah pawlkomawk tlang hi khawvel ih kan co mi lungawinak hlubik a si.

Hotu / Hruaitu cun...
Kum tawkfang thiam lo cingin group leknak ka hoha ve, ka thiam ruangah si loin - tuah vivo tikah thiam vivo sawn mi a si. Zozo

Kuala Lumpur Baptist Church (KLBC)

Kuala Lumpur Baptist Church (KLBC)
KLBC hramthoknak Pathian thu simtu USA missionary Miss Jessie Green (Southern Baptist) cu 1951 August ah Malaysia a thleng. Jalan Pasar (atui Pudu Bazaar) zin parih innkhan teah thlacamnak le Bible zirnak tete an nei thok. Cuihhnu ah Hongkong missionary Miss Lau Ching Han, Miss Mak Kwai Lan le Pastor Loh Yan Kwong pawlin an ṭanpi ih an ṭhangso deuhdeuh.

Kumkhat a rei hnu 1952 December 14 ah zumtu member (18) thawn Kuala Lumpur Baptist Church tiah cozah theihpimi Kawhhran hlawhtling takin dinsuak a rak si. Culai ah Dr. Eugene Hill cu pastor (honorary) a siih Pastor Loh Yan Kwong cu mission hnaṭuan hotu a rak si.

Biakinn neih theinak dingah innhmun le biakinn thilri an khawlkhom hnu kum (2) sungah atui' KLBC biakinn hmun hi an ngah. Biakinn sak khal thokcih a siih 1955 November 20 ah KUALA LUMPUR BAPTIST CHURCH biakinn cu Pathian hnen pekhlannak an rak nei thei. Culai ah pastor cu Ps Loh Yan Kwong a rak si.

Bible hi Cahnah Par Lawngah Si loin A Thu le Thinlung ah A Si

Bible hi Cahnah Par Lawngah Si loin A Thu le Thinlung ah A Si
Khawmpi zawh cu kan phur, Conference cu a tam ih zawhtu khal tam, Bible Conference le Study cu a malih zawhtu khal mal.

Crusade le Camping cu Zarhtin khawm tlukin kumtin tuah ringring. Gospel Concert khal tuah ringring. Sing Song Service le Worship Night tivek khal tuah ringring. Dinhmun khal si ding awmang hnakin puitling thei cuang lo kel ringring.

Sermon, Crusade le Camping tinten Bible siar kan ṭulnak simzirh asinan siar cuang lo, hnasiat tunsan men.

Holy Bible version (3) le hrinhnam ṭong (tampi) in kan nei zo asinan a siar taktaktu malzet thotho.

Editing Age (Edit San)

Editing Age (Edit San)
Ziangkim hi edit san ah kan thleng.
Edit ti cu a umcia mi thil pakhat kha a ṭuldan vekin rem, tuahṭhat le a ṭulmi bet ih a ṭul lomi hlon khi a si.

Thinlung Edit: Ca le Video-zuk pawl cu a langlomi langtertu an si. Minung hi a langmi lenglam cu edit (makeup) a ol zet. Kan ṭul taktak mi cu thinlung editor Thlarau Thianghlim a si. Tisa duhnak cun lenglam a edit ih Thlarau Thianghlim cun sunglam a edit hnu ah lenglam a mawi ter, a thianghlim ter, a ṭha ter ih dik le famkim in a tuahṭha a si.

Video&Zuk Edit: Duh lomi hlon, duhmi zawn lak, a dangdang kom, color mawi terih cangan mawizet le music duhmi thawn video mawi le ṭha sersuak a si.

Rawl thiang ei uhsih!

 Rawl thiang ei uhsih!

Nunnak hi Pathian pekmi a si, rawl cu nunnak dingah kan ṭulmi a si. Rawl khopkham ten ei hi nun damnak a si. Asinan rawl ei sual hi natnak-thihnak a si.

Rawl ei-in ruangah natnak phun zaran 200 le cancer tiang kan ngah thei. Ei-in thianglo ruangah natnak ngahtu hi mi pahra ah pakhat (1/10), cutin 420,000 kumtin an thi. Cumi lakah nauhak 125,000 kumtin an thi.
Rawlsuan pu (chef) rualpi pakhat in, "kan dawrih zuarmi cu ka ei duh lo, ka ei ding cu a dangten ka suang," tiah in sim.

Rualpi Kan Hawl (Urgent)!

Rualpi Kan Hawl (Urgent)!
💞Fala le Tlangval tampi rualpi nei lo lileng in an tawivak. Duhmi an co na'n rualpi an nei lo. Degree an ngah na'n rualpi an nei lo. Tlawngkai rualpi le hnaṭuan rualpi lawng an neih ruangah tlawng ṭheh hnu le hnaṭuan bangh hnu ah rualpiawknak a cem vivo ih a rei cun nelawknak a mal ih pehzomawknak a cat. Lungawi riahsiat ṭawmpitu rualpi an hawl. Rualpi neih lo ruangah mi hrekkhat in zuu le ritsii thawn an hnemawk, siatralnak sawn a si. An ṭul taktak mi cu rualpi a si. 

🤴👸Milian zet le larzet hrekkhat cu rualpi an nei na'n an kawm man lo, caan an pekawk thei lo i poimawh caan lawngah an tongawk. Thunuam relpi ding, lenvah pi ding, nomnak le harnak ṭawmpitu taktak rualpi an nei lo. Curuangah mi hoklak vekin an tawivak i holam thil tete an tizok rero. Khikhi an aat thu men a si lo, rualpi an ṭul ruangah a si. Kiangnai ah dai theih rualpi a um lo ruangah le a um na'n caan an pekawk thei lo ruangah a si.